Algo mas cu un siman pasa nos a publica un Editorial na ocasion di Dia Internacional di Prensa, unda a duna nos opinion tocante e importancia pa medio di comunicacion haci mas investigacion y mustra mas critico cu loke ta sucede den nos comunidad. Esaki specialmente dirigi na operacion di sector publico, cu mester t’ey pa sirbi comunidad. Den e siman despues nos a duna amplio cobertura na e proceso di consulta cu mester tuma lugar a base di e propuesta conhunto di gobierno di Aruba y di Hulanda pa introduccion di un ley di supervision financiero di Reino, y un di Aruba. Esaki a base di un acuerdo cera entre gobierno anterior di Aruba y gobierno anterior di Hulanda. For di e acuerdo aki a sali un labor conhunto na nivel di ambtenaar, cu naturalmente no tabata opera den un bashi, sino bao di guia y den comunicacion cu ambos gobierno. Esaki no solamente den e caso di e gabinetenan cu a pasa pa pasado, sino tambe cu e actual gabinetenan, cu den e caso di Hulanda ta demisionario, pero asina mes ta considera e tema aki di tal importancia cu ta continua e labor conhunto.
Nos por ripara na reaccion cu nos a haya cu e mero hecho cu nos a tuma e molester pa lesa y studia e propuesta di ley aki a lanta e sospecha cu e informacion, o sea e contenido di e propuesta aki, ta un asunto di opinion di e medio aki. Esey no ta asina, e articulonan cu a sali pa divulga e contenido di e propuesta, ta refleha solamente y exactamente esey. E contenido di e Editorialnan si ta opinion di e medio aki, y por lo tanto por ta suheto na critica di cualkier lector; diferencia di opinion no ta algo negativo, al contrario. Awor, por surgi e pregunta pakico enfatiza tur esaki asina ampliamente. E motibo principal ta cu nos tur ta perdiendo un oportunidad grandi aki pa ta bon na altura kico ta propone den e caso aki. Contrario na e procesonan den pasado, unda publico en general tin mas problema pa haya sa den detaye kico ta loke e gobiernonan ta propone, e biaha aki a scoge pa bin cu un presentacion den forma di un consulta. E documento divulga actualmente no ta un propuesta di ley acaba, sino un documento di consulta; esey ta loke su titulo ta bisa bon cla. Nos ta mira esaki como un oportunidad pa: pone nos mes bon na altura den ki direccion e plannan ta bay, y por opina concretamente riba loke ta propone, pa despues por valora opinionnan diverso cu nos por tende o lesa.
E forma aki ta realmente e manera con semper mester presenta propuesta di ley, envez cu den mayoria di caso te na ultimo ta bira conoci loke ta propone, na momento cu e aprobacion di e ley ya casi ta un hecho caba. Nos por tin comprension tambe pa e hecho cu den e caso aki a scoge pa presenta e asunto asina. Nos tabatin un ronda caba di consulta parlamentario den pasado recien, unda den parlamento di Aruba no tabatin un mayoria pa aproba e propuesta y por lo tanto finalmente no tabatin un propuesta cu por a sigui su caminda den parlamento Hulandes. Actualmente ta haci un intento pa logra yega na consenso, a traves di informacion duna di antemano y no solamente na parlamentario. Esey anto ta e parti di informacion; despues ta sigui nos opinion cu no conoce tanto variacion a traves di mas di un decada cu e tema di supervision financiero ta hunga un papel cerca nos.Desde inicio nos a opina cu e hecho cu gobierno di Reino a interveni den nos finanzas publico tabata algo ocasiona na banda di Aruba a traves di mal gobernacion y cu tabata logico cu gobierno di Reino a asumi e papel cu e tin dentro di nos sistema di gobernacion. Den e sentido aki nunca tabata un cuestion di ‘perde autonomia’, sino di yega na e limitenan di autonomia, unda supervision di Reino ta tuma over. Na e momento ey nos por ripara cu nos no ta un pais independiente, sino un entidad gubernamental local cu ta parti di algo mas grandi cu nos. Claro cu cada ken por tin nan opinion tocante e necesidad, of no, di e intervencion ey. E ta un hecho awor, diez aña caba, pero importante ta con pa sali di e situacion aki, pa bolbe na un gobernacion sin supervision den e forma actual, pero cu e capa superior di Reino na e distancia normal.Y lo ta bon tambe pa nos comprende cu e supervision aki no ta algo cu nos por simplemente rechaza. E ta un medida imponi riba nos pa via di mal gobernacion local y den e sentido ey en berdad e ta diferente di e caso di e supervision financiero di e dos otro islanan, cu si tabata di consenso.
Ta pesey tambe cu no ta necesario pa yega na un consenso pa e ley di Reino. Den e caso cu pa di dos biaha tin un rechazo den parlamento di Aruba di e propuesta di ley di Reino, nos lo keda cu e ley local di supervision, cu tin den linea general e mesun mecanismo di control cu e ley di Reino lo bay tin.Nos por ripara cu nos politiconan na Aruba ta opina ampliamente, pero nunca ta splica e aspecto aki na pueblo. Duna opinion sin duna informacion, aparentemente ta hopi mas facil.
