Parlamento Hubenil ta un organisacion cu ta purba scucha hopi for di e hobennan, specialmente kico nan ta haya como un reto den nan scolnan y cu awor nan lo ta bezig creando proyectonan cu apoyo di Ministerio di Enseñansa.

Un di e reto cu nan ta presenta, hopi biaha nan ta argumenta cu nan no ta keda scucha door di hende grandi. Awendia e hobennan tin hopi informacion na nan disposicion y hopi cos cu nan sa hasta mas cu hende grandi mes, p’esey nan kier haya e voz pa por splica kico ta nan opinion, kico nan ta wak y kico nan ta pensa di un obstaculo cu un posibel solucion.

Pa esaki, Dave Martinus presidente di e directiva di Parlamento Hubenil den un entrevista cu Bon Dia Aruba, el a splica cu tin cu duna e hobennan e oportunidad di laga nan siña pa nan mes y tambe siña di e foutnan, cu nan mester ta liber di por pensa, di purba y esey ta sigur un di e retonan di e hobennan hopi biaha.

Segun Martinus, esaki tambe ta trece e problematica cu nan ta yama “Mental Health” dependiendo di e topico, “tin ora e ta trece cierto frustracion, depresion, pasobra simplemente no tin un caminda pa canalisa e voz. Por ehemplo, akinan na Parlamento Hubenil nos tin hopi hoben cu ta mas critico y nan ta puntra con nan por haci ora nan maestro no ta duna les bon? Unda mi por expresa mi mes cu esey? Mi tin cu djis acept’e?”, Martinus a señala.

Pa e motibo ey, esaki ta un di e proyectonan cu Parlamento Hubenil ta haciendo cu Gobierno di Aruba, manera el a informa, cu nan a yega na un acuerdo pa un proyecto pa investiga e topico aki, con posiblemente un hoben por vocifera su mes pa no drenta den e parti di falta di respet tanto pa e profesionalismo di e docente, como tambe pa no perhudica e hoben.

Nan a acerca na minister di Enseñansa unda hobennan a wordo scucha y nan a acorda pa haci un proyecto hunto cu Parlamento Hubenil pa nan haya sa con ta e miho manera pa trata e problematica aki, aworaki nan ta den e fase investigativo y basa den esey, ta bay sali e proyecto concreto cu lo ta e voz di e hoben na scol.

Pa yuda e hobennan, Parlamento Hubenil a scoge tambe pa busca un financiamento unda nan por busca un persona profesional pa guia nan den e proceso. “Hopi importante ta e parti di investigacion y hobennan no tin tur e conocemento. Ademas nos tambe ta bay busca un profesional cu ta bay guia e docentenan den e proceso pa nan por yega na un solucion y presenta esey na gobierno”, Martinus a bisa.

Den esaki, segun Martinus tin otro cosnan cu tambe ta hunga un rol pa motibo cu ora hobennan tabata haci e investigacion riba nan mes, cu ora nan a bay scol pa haci un encuesta pa haya sa kico maestronan di scol ta pensa, tin caminda cu maestronan a bisa cu nan no ta participa y no kier duna nan opinion pa nan no wordo perhudica.

“Eynan bo ta mira cu pa maestro tambe e ta dificil pa duna su opinion den esaki y ta p’esey cu ta importante algo asina, cu ya e ora ey ta tene na cuenta cu tur dos banda, pa por yega na un consenso caminda cu ta tene na cuenta tanto cu e alumno como cu e maestronan”, el a bisa.

Aworaki, nan ta den proceso unda nan a caba di recluta un coordinador cu ta bay guia e organisacion den ehecucion, pa motibo cu Martinus a conta cu durante ultimo añanan nan directiva tin dos aña cu nan a caba sinta unda den tempo aki nan a haci un analisis y nan a yega na e conclusion cu mester haci un restructuracion pa e organisacion, debi cu e organisacion pa hopi biaha tabata envolvi riba proyectonan y masha tiki den e parti di desaroyo.

Nan a dicidi di scoge e direccion pa bay den caminda di desaroyo a traves di proyectonan pa asina ey nan por ta consciente di kico ta e desaroyo cu por trece pa e hoben, “den cuadro di esey tambe aworaki nos a recluta un persona cu ta hopi profesional den e materia y pa cu dilanti lo tin hopi cos great unda nos no ta bay solamente yega na scolnan sino yega na full barionan di Aruba”, el a indica.

Den su opinion, Parlamento Hubenil mester bira como parti esencial di un organisacion caminda cu tin hobennan cu tin e chens di haya nan voz, esaki ta e proyecto principal cu Martinus a splica cu nan ta trahando riba dje pa restructura e modelo cu nan a cambia.

Di e modelo aki, el a señala cu ta bay bira cu tur hoben ora ta drenta Parlamento Hubenil ta bay haya e chens di drenta den e ‘Voz Hubenil’ y nan ta haya tres nivel di preparacion, despues cu nan lo pasa den e tres nivel ey, nan tin e oportunidad pa lo keda eligi den e Parlamento Hubenil unda nan lo bira parlamentario hubenil, caminda nan lo tin tareanan specifico como un parlamentario, como pasa un mocion of bin cu iniciativanan.

Un bes cu nan lo haya mas experiencia unda nan lo conversa dunando conseho na gobierno tambe, ta bay crea un gobierno hubenil cu ta consisti di diferente minister cu nan tarea ta pa bira lider di e proyecto un biaha pa aña, enfoca riba cultura den hobennan por ehemplo, of salud y deporte pa hobennan.

“Asina cada un lo tin oportunidad di haci un proyecto como un minister y esey ta pa duna oportunidad na e hoben entre 12 cu 17 aña y esun di 18 pa 24 aña nan ta bay haya mesun cos pero na luga di bay den un gobierno, nan lo bay na un Algemene Rekenkamer pa e hobennan, treciendo cosnan mas complica pero nan ta bay implementa nan pensamento y nan nivel di scol.

Esaki ta bay wordo ehecuta awor cu e coordinador nobo di Parlamento Hubenil den e aña venidero, manera Martinus a finalisa.