M’a bira mama prome cu Google of telefon celular. Mi tabatin e buki popular, ‘What to expect when you are expecting,’ cu tabata splica e proceso fisico ora cu bo ta na estado. Locual no tabata skirbi den dje, ta con ta duna bo yiu pecho.

Esaki ta e periodo prome cu Fundacion Pro-Lechi Mama. Pues, despues di a pasa un parto poco complica, unda mester a keda 10 dia den hospital cu infeccion, e tabata un ‘eye-opener’ pa mi. Hospital na 1990 no tabata promove dunamento di pecho na yiu. Al contrario.

Mi a dicidi for di comienso cu mi ta bay duna pecho. Mi tabata papia cu mi mesun Mama, kende a bisa cu den su caso, su lechi a bay cu tres luna. Pero esey tabata e unico biaha cu nos a bay den profundidad riba e tema. Pasobra na 1990, ningun hende tabata papia di duna baby pecho. Cu tabatin mama cu ta cria nan yiu na pecho ta un hecho, pasobra botica tabata bende e asina yama ‘milkpads.’ E material caro aki tabata pa capta e lechi di mas. Pues, duna lechi pecho no necesariamente a sali mi asina barata. Pasobra mi tabata produci lechi 24 ora pa dia y nunca ma siña domina e pomp.

Pero bek pa mi experiencia. Baby a nace y a bay den su sala apart. Esey tabata tempo cu babynan tabata keda separa di nan mama. Y na momento cu a trec’e mi yiu pa prome biaha, e nursenan a trece e botter cu formula. Ma bisa nan, cu mi no mester di dje pasobra mi ta bay duna pecho. Lo mi no lubida nunca mas e expresion di e dos enfermeranan. Nan a wak mi manera mi tabata kens y a cana bay, laga mi cu mi baby sin ningun por a duna mi tips con pa cria, ni con largo. Riba dje, mi no por a yama mi Mama pa tips.

Enfin, tur dia mi tabata haya e mesun expresion di e enfermeronan, pero mi a persisti. Mi yiu tabatin 10 dia ora m’a bay cas. Eynan panico a dal. Con largo e mester bebe? E ta haya suficiente? Mi tabata pisa mi recien naci prome cu mi dun’e pecho, pa sigura cu e tabata haya su 30 mililiter di lechi cada tres ora. Mi yiu tabatin otro pensamento. E no tabata drumi drechi y e unico cos cu e tabata kier ta bebe. Pues mi yiu a bira mi guia.

Cu tur e gasto di e pads, e infeccionnan di pecho (hopi dolor), y hendenan (hasta famia) ta wak mi straño cu mi tabata cria mi yiu tur caminda, mi ta super contento di a tuma e paso. Mi yiu tabata cana y bin ranca mi blusa pa bebe. E tabata tur ora cu mi. Duna pecho a nifica cu ademas di e 9 lunanan den bariga, mi yiu a keda exclusivamente di mi pa otro 13 luna. Tur su rumannan tabata exclusivamente di mi pa mas luna. Y no tin un miho regalo pa un Mama.

 

LEAVE A REPLY

Please enter your comment!
Please enter your name here