Diahuebs mainta Departamento di Impuesto (DIMP) a tene un conferencia di prensa caminda a informa tur nan clientenan di e cambionan cu lo drenta na vigor entrante 1 di januari den cuadro di e introduccion di Plan di Impuesto 2023.

Un di e prome cambionan cu e directora di DIMP, Luenne Gomez-Pieters, a splica cu ta hopi importante pa menciona ta cu ta bay introduci un tarifa nobo di BBO. E tarifa actual di BBO ta wordo ahusta na 2.5%, esey kiermen cu tin un aumento di 1%. Ta introduci e cambio aki entrante 1 di januari 2023 y lo resulta den de un tarifa combina di 7% di BBO, BAVP y BAZV.

 

Conhuntamente cu e cambio aki ta introduci tambe un pakete di compensacion pa mitiga e efectonan di inflacion door di e introduccion di e ahuste den e tarifa di BBO.

Naturalmente ora tin un cambio di impuesto semper tin efecto riba inflacion. Gomez-Pieters a señala cu e ahuste den e tarifa di BBO cu 1% ta trece un inflacion di 1.4% di efecto den prijsnan y pa cu esaki tin un pakete di compensacion cu ta bay man den man pa asina por alivia e peso extra di impuesto cu lo tin un efecto riba cada ciudadano of contribuyente.

El a splica cu e compensacion pa contribuyente individual ta encera cu ta baha e tarifa riba e dos prome categorianan di impuesto riba entrada cu 2%. Riba website di impuesto tin e grafica y un calculator pa asina contribuyentenan oficial calcula e diferencia di e peso di impuesto cu e ta pagando awo den 2022 y loke ta bay paga den 2023 segun e ahustenan den ley.

60 porciento di forsa laboral no ta bay paga impuesto

Ta aumenta tambe e suma liber di impuesto pa tur contribuyente individual y empresa chikito (eenmanszaak) di 28.861 florin pa 30.000 florin pa aña. Esaki ta conta pa tur contribuyente naturalmente.

Gomez-Pieters a menciona cu 36.161 contribuyente no ta bay paga inkomstenbelasting, loonbelasting, mirando cu esaki ta e cantidad di contribuyente cu tin entrada bao di 30 mil florin pa aña cu ta e suma liber di impuesto. Pues 36.161 ta cay bao di e suma liber di impuesto y ta representa 60% di e forsa laboral.

Den e grafica por mira e montante di contribuyentenan cu ta cay den cada categoria di impuesto y por mira con e reparticion ta den cada categoria y tambe den e entrada di cada contribuyente.

Ta bay separa cobransa di impuesto riba entrada di pensioen di biehes di SVb. Esey kiermen cu un pareha cu ta cobra pensioen di biehes lo paga impuesto apart. Ta aumenta tambe e suma di ‘reparatietoeslag’ pa tur pensionado di SVb di 125 florin pa 170 florin pa luna, dus esaki ta aumenta cu 45 florin pa luna. Manera Minister di Labor, Glenbert Croes a informa caba, salario minimo ta aumenta tambe pa 1.893,40 florin.

Gomez-Pieters a sigui splica cu ta aumenta tambe e uitkering di pensioen di biehes cu 5%: pues un pareha casa lo conoce un aumento di Afl. 98 pa luna y pensionadonan soltero lo conoce un aumento di Afl. 58 pa luna. El a menciona tambe cu no ta bay cobra impuesto di entrada riba tips, esey ta un decision cu Gobierno di Aruba a tuma den e trayecto di e reforma fiscal.

Gomez-Pieters a duna como ehempel, pa duna un ilustracion di e base di entrada fiscal y con ta cobra impuesto riba entradanan di pensioen di biehes, un pareha na unda e meneer tin un entrada di 36 mil florin pa aña y tin un pensioen di 10.455 pa aña y unda e señora ta disfruta di solamente e pensioen di biehes. Actualmente ta combina e entradanan hunto cual ta yega na 56.910 florin pa aña, ta aplica e suma liber di impuesto y finalmente e suma cu mester wordo cobra ta sali na 3.365 florin

A base di e cambio di ley, e señora y e meneer nan pensioen di biehes ta wordo cobra separa, esaki kiermen cu e señora ta paga apart ariba su entrada di pensioen y e meneer igual. Den e caso aki e señora no ta paga nada pasobra e suma liber di impuesto ta 30 mil florin y su entrada ta cay bao di 30 mil florin. Di otro banda e meneer lo paga un suma di impuesto di 1.645 florin.

Comparando e dos ehempel por mira cu e suma di cobransa di impuesto ta menos cu un diferencia di 1.720 florin. “Bo ta wak ta un adelanto grandi si ta trata di un pareha casa cu tur dos ta gosa di un pensioen di biehes y e meneer tin un salario tambe di empleo.” Gomez-Pieters a señala.

Pa loke ta trata cambionan pa negoshi, Gomez-Pieters a indica cu ta baha e tarifa general di winstbelasting entrante 1 di januari 2023 di 25% pa 22%, ta subi e porcentahe di deduccion di inversion (“investeringsaftrek”) di 6% pa 10%, ta introduci restriccion di deduccion di entre otro pago di interes pa uso di bienes y servicio na entidadnan y personanan afilia y ta introduci un deduccion maximo riba gastonan di devaluacion (“afschrijvingskosten”) pa cu propiedad inmobil te cu 50% di e balor di propiedad stipula pa grondbelasting.

El a agrega cu ta elimina tambe e posibilidad di forma un pensioen den propio maneho entrante 1 di januari 2023 y a duna un periodo transitorio te cu 31 di december 2023 durante cual ta mantene un tarifa reduci di 15% riba compra di pensioen pa asina facilita e cambio di ley.

Negoshinan cu tin status di IPC (“Imputation Payment Company”) ta conoce aworaki un tarifa reduci den winstbelasting, depende di e categoria e por ta 10%, 12% of 15%. E tarifanan reduci aki ta bay wordo elimina entrante 1 di januari 2023 y tur compania lo paga e mesun tasa di impuesto den winstbelasting cu ta 22%.

Gomez-Pieters a remarca cu naturalmente pa e companianan cu tin un IPC status tin un periodo transitorio di 3 aña na unda te cu 31 di december 2025 lo por keda aplica e tarifanan reduci, pa asina den 2026 ta cuminsa cu e tarifa di 22% den winstbelasting.

Man den man, el a agrega, ta elimina e tarifa di 0% di dividendbelasting como resultado di eliminacion di e tarifa reduci di IPC entrante 1 di januari 2023 cu un periodo transitorio pa distribucion di dividendo aplicabel bou di e regimen di IPC cu ta keda realisa prome cu 1 di januari 2028.