Segun a bisa den un publicacion recientemente riba su rednan social, Departamento di Impuesto a ripara cu ultimamente tin varios automobilista coriendo cu plach’i number falso. DIMP ta enfatisa cu esaki ta ilegal y como tal ta castigable.

Kico ta plachi falso?

Plachi falso ta tur plachi di number blauw cu blanco cu no a ser entrega door di Departamento di impuesto; tur plach’i number di añanan bieu – esta plachinan di prome cu aña 2020, por ehempel, plachinan oraño cu blanco; tur plachi traha di papel, carton, sticker, plastic, metal of cualkier otro material.

DIMP ta enfatisa cu plachi falso no ta legal ni permitible riba carteranan publico.

Y mientras cu e plachinan cora cu blanco di aña 2020 ta permitible ainda e luna aki, for di dia 1 di october tur auto mester tin e plachinan di number 2025-2029. Esaki ta nifica cu e ultimo dia cu por core cu e plachinan cora cu blanco di aña 2020, ta 30 di september 2025.

“Nos ta pidi tur contribuyente cu ainda no a paga nan impuesto of no a paga e impuesto di e di dos mita di 2025, no a paga e seguro y/of no a haci un cita pa busca e plachinan, pa actua lihe,” DIMP a bisa den otro post. “Cuerpo di Polis lo bay intensifica e controlnan caminda cu lo controla tambe esnan cu ta core riba careteranan publico cu plachinan falso.”

Meld e caso
 DIMP ta haci un apelacion pa ciudadanonan cu por mira un auto, motorcycle, truck of otro vehiculo di motor cu ta core cu plach’i number falso, pa notifica esaki na e departamento mediante e formulario digital di fraude: https://www.impuesto.aw/fraude

Ora di notifica e caso, no ta rekeri pa bo duna bo nomber. Por haci esaki den forma anonimo. Si ta consehabel pa duna mas detaye cu ta posibel, por ehempel fecha y lugar unda a wak e auto, tipo y color di auto etc. Mas hopi detaye bo duna DIMP, miho nan por investiga e caso. Alabes por upload un of mas potret di e auto pa por tin un bon bista di e vehiculo.

FIOT ta investiga

FIOT (Fiscale inlichtingen- en opsporingsteam), departamento di inteligencia fiscal di DIMP, ta encarga pa investiga casonan di plachi falso. E casonan aki ta ser considera como fraude fiscal y eventualmente hunto cu otro instancianan hudicial, lo por persigui esnan cu a comete e actonan aki. Alabes, nan lo investiga e personanan y/of empresanan cu ta traha of print plachinan falso pa nan clientenan.

Comportamento corecto y honesto
“Departamento di Impuesto kier reitera cu nos contribuyentenan mester tin un comportacion corecto y honesto pa cu nan debernan di impuesto,” DIMP a finalisa bisando. “No ta corecto pa esnan cu no ta paga nan impuesto di vehiculo di motor, ta trafica cu plachi falso riba nos careteranan publico y di otro banda e no ta husto pa esnan cu si ta paga nan impuesto debidamente tin cu topa cu e mal comportacion aki cu na final di dia ta perhudica nos Pais! P’esey, notifica! Paso mal comportacion no por wordo hustifica!”