Na DIP tin un proyecto den finalisacion pa mehora, amplia y modernisa e aplicacion cu ta wordo uza pa entre otro registra e derechonan di erfpacht otorga y genera e cobranzanan anual pa esakinan.

Mehoracionnan en general segun e departamento, ta encera cu lo por registra mas tipo di derecho den e mes aplicacion y tambe genera cobransanan di forma mas lihe y automatisa. Un mehoracion specifico ta cu lo bira posibel pa ricibi cobransa di erfpacht via e-mail en bes di via post. Tur persona of otro entidad legal cu ta desea di ricibi nan cobransa di erfpacht via mail, por manda un e-mail na info@dip.aw.

Den e espacio pa “subject” mester yena “aanslag via e-mail”. Sea asina bon di pone den e texto di e mail: 1. e persoonsnummer di e entidad cu tin e derecho; 2. identificacion (kadastraal) di e percela(nan) pa cua ta desea di ricibi e aanslag via e-mail; 3. ariba cua e-maildres(nan) ta desea di haya e cobransa. En conexion cu trabounan cu mester tuma luga pa saca cobranza di 2017 solamente e-mailnan cu drenta prome cu 15 di juni por wordo registra pa haya e cobranza di erfpacht 2017 via e-mail. E-mailnan cu wordo ricibi despues di dia 15 di juni lo wordo uza pa cobranza di 2018.