E tema di parcelanan di saliña na Malmok pa wordo otorga ta bolbe bin dilanti despues di algun siman. Organisacion ambiental Aruba Birdlife Conservation a emiti un comunicado riba nan pagina di Facebook cu terenonan cu a wordo firma pa proteccion a keda otorga. Departamento di Infrastructura y Planificacion (DIP) ta desmenti atrobe cu esaki ta e caso.

Den comienso di siman Aruba Birdlife a comparti un texto riba social media cu ta bisa: “Cu hopi dolor den nos curason, nos kier informa e 11.000 personanan cu a firma e peticion pa proteccion di 16 areanan di naturalesa, cu un di e areanan Saliña Malmok a keda otorga. Nos nunca ta bay purba di stop destruccion riba nos naturalesa.” Presidente di ABC Greg Peterson a laga sa cu awe nan ta bay emiti un update general riba e status di e 16 areanan aki. E no a duna nos mas informacion cu el a haya actualmente riba e Saliñanan na Malmok, cual e ta bisa lo ta un topico riba nan update cu lo emiti awe.

Reaccion DIP
Directora di Departamento di Infrastructura y Planificacion, Isabel Dammers a bisa Bon Dia: “Asina leu cu mi sa, te awor no tin akte cu a pasa pa tereno den saliña na Malmok.” Sra. Dammers a bay verifica esaki bisando nos cu “e noticia ey a laga mi poco babuca tambe.” Nos a keda pendiente cu DIP durante dia ayera pa un elaboracion riba kico a pasa e biaha aki pero no a logra haya mas informacion. Algun siman atras Bon Dia a publica riba e tema aki, unda cu Dip a confirma cu ta wardando decreto y por lo pronto no lo otorga e terenonan aki. Nos a informa tambe cu departamentonan di gobierno ta trahando tambe riba e delineacion di e area pa fiha unda e area proteha ta caba y unda ainda tin espacio p terenonan otorga pa vivienda. Con a sigui cu esaki no ta conoci. Segun un fuente den ministerio a bisa nos algun siman atras, e terenonan cu kier destina pa erfpacht no ta cay den e area di naturalesa (wetland).

No tin decreto ministerial
Segun DIP, e terenonan en cuestion den e ROP en berdad ta destina como saliña/wetland. Y door cu nan ta cay na rand di plangrens, por ta eligibel pa wordo otorga bou di un decreto ministerial conforme e ROP actual. Adelantando riba e ahust’e di areanan defini globalmente den e plankaart di e ROP entre otro na Malmok a tuma luga midimento di algun tereno. Sinembargo segun DIP a bisa nos algun siman atras, ainda no tin un decreto ministerial pa desvia for di e ROP y no a tuma luga niun otorgamento den erfpacht di e terenonan en cuestion tampoco.

Bon Dia ta keda pendiente cu e desaroyo di esaki.