Directie Luchtvaart a informa cu dia 28 di november 2025 e autoridad di aviacion Europeo (EASA) a emiti un directiva technico obligatorio (“Airworthiness Directive”) cu ta aplica pa avionnan tipo Airbus A320.

A duna e directiva aki pa motibo cu aerolineanan rond di mundo a reporta problemanan cuminsando fin di siman mientras nan tabata drecha software riba avion comercial ampliamente usa, cual ta e tipo Airbus A320, despues cu un analisis a haya cu e codigo di e computer por a contribui na un caida repentino den e altitud di un avion luna pasa.

Airbus a bisa diabierna cu un examinacion di e incidente a revela cu radiacion solar intenso por afecta data critico pa e funcionamento di controlnan den e avion di e famia A320.

Union Europeo su autoridad pa seguridad di aviacion, EASA, a publica un directiva unda a rekeri tur aerolinea atende esaki cu un actualisacion den e software di e computernan abordo di e avion, un rekisito cu FAA tambe a implementa.

E directiva aki ta instrui usuarionan di avionnan Airbus A320 pa reemplasa/modifica un pieza, e asina yama “elevator aileron computer” prome cu e siguiente vuelo. E computer aki ta controla e movemento di nanishi (ariba/abou) y hala (ariba/abou) di e avion. Ta premira cu e directiva aki lo ta aplicabel pa un gran cantidad di e avionnan A320 den servicio mundialmente, y tur avion afecta lo mester keda para pa por haci e modificacion.

Airbus, cual ta registra na Hulanda pero tin base di operacion principal na Francia, ta un di e fabricantenan di avion mas grandi na mundo banda di Boeing. E model A320 ta uno di e modelnan mas usa rond di mundo y Airbus a actualisa su motor na mita di 2010, cu avionnan den e categoria aki yama 320neo.

Airbus su CEO Guillaume Faury a pidi disculpa na su clientenan despues cu rekisito aki a causa “desafionan significante den aviacion y atraso. Nos ekiponan ta trahando pa sostene nos operadornan y garantisa cu e actualisacionnan aki keda desplega lo mas lihe posible pa asina e avionnan por sigui cu operacionnan normal, cu e garantia di seguridad cu ta spera di Airbus,” el a skirbi den un mensahe publica riba LinkedIn diasabra.

Mike Stengel, un partner di e firma di consulta AeroDynamic cu ta traha den e industria di maneho di espacio aereo a bisa cu esaki ta algo cu por atende den algun ora, pero “definitivamente no ta ideal pa esaki sucede den un tempo festivo” unda tin un aumento den biahe. “Aunke atrobe, e parti bon ta cu e lo mester tuma algun ora so pa actualisa e software.”

“Airworthiness directive” y seguridad

Den mundo di aviacion e ta algo comun pa emiti un directiva manera esaki.

E directivanan aki ta emiti pa por mehora e seguridad di e tipo di avion concerni, y ta haci a base di feedback di operacionnan.

Segun Directie Luchtvaart, loke no ta hopi comun ta cu un cantidad asina grandi di avionnan ta afecta na mesun momento, manera ta e caso cu e directiva aki. Directie Luchtvaart a agrega mester bisa cu e avionnan tipo Airbus 320 cu si ta keda bula ta avionnan cu no ta afecta door di e directiva, of ta avionnan cu a modifica caba segun e directiva.

Tambe ta importante pa trece dilanti cu en general e avion tipo Airbus A320 riba su mes ta un avion sigur cu un bon record di seguridad.

Efecto pa Aruba

E avion tipo Airbus A320 ta un di e avionnan mas usa na mundo.

Pa e motibo cu tin un cantidad sumamente grandi di e tipo di avionnan aki cu ta afecta, e lo tin como consecuencia cu aerolineanan afecta lo cancela cierto vuelo, y den esaki Aruba no lo ta un excepcion. Por spera cu vuelonan pa Aruba lo keda cancela, pa motibo cu e avion Airbus A320 a uno ampliamente usa pa vuelonan pa Aruba.

Segun Directie Luchtvaart ta anticipa cu e situacion aki lo por dura por lo menos 1 pa 2 siman, y pa motibo aki ta conseha e pasaheronan pa revisa ki tipo di avion nan aerolinea ta usa y mantene contacto cu e aerolineanan afecta. Tambe ta conseha pa keda monitor e website di aeropuerto pa cualkier informacion relevante.