Directie Ouderenzaken ta organisa expo pa conscientisa hoben adulto tocante embehecimento saludabel

Ayera mainta durante un conferencia di prensa Departamento Directie Ouderenzaken a anuncia nan expo “Live Well, Age Strong” cu tin como meta conscientisa e hobennan adulto tocante temanan cu ta importante pa tene cuenta pa yega na edad di adulto mayor den un forma saludabel.

Damara Rasmijn, Medewerker Communicatie y PR di Directie Ouderenzaken, a indica cu nan tin como tarea no solamente pa ta encarga di loke ta relaciona cu adultonan mayor actual, pero nan tin e tarea tambe pa conscientisa e hobennan adulto cu ainda no a yega na e edad di adulto mayor di con nan por prepara pa ora cu eventualmente nan yega na ta un adulto mayor.

El a splica cu e expo aki nan kier brinda informacion y haci e hobennan adulto un poco mas consciente di tema of aspectonan cu nan no a pensa riba dje ainda pasobra nan ta den edad un poco mas hoben, pero cu eventualmente ta importante pa tene na cuenta prome cu yega na edad di adulto mayor.

Conhuntamente cu Oderlingehulp y Raw Fitness Aruba Directie Ouderenzaken a bin cu e idea pa e expo “Live Well Age Strong” cu lo ta tuma luga dia 23 di mei.

Rasmijn a splica cu pa e expo aki e partnernan a delibera y a yega na cuater tema cu nan a haya mester atencion pa ora cu bira adulto mayor. E temanan aki ta salud, bienestar, vivienda y entrada.

“Puntra bo mes con bon prepara bo mes ta actualmente si bo lo pensa riba e cuater topiconan aki, s bo tin falta di mas informacion of no a pensa riba e topiconan aki ainda. Esey ta e idea cu nos kier trece pa e expo aki y brinda informacion,” Rasmijn a remarca.

El a indica cu nan a parti e expo den cuater parti cu ta consisti di presentacion di diferente instancia cu nan a busca y cu lo por brinda e pueblo informacion relaciona na e cuater temanan menciona. Ta bay tin tambe entre 15 pa 20 mesa di diferente instancia na e parti pafo di e edificio cu lo brinda informacion relaciona cu e cuater topiconan di enfoke di e expo.

Den gym tambe lo tin actividadnan fisico, cual tambe ta un aspecto importante pa tene cuenta pa ora yega na edad di adulto mayor, y tambe lo tin un competencia fisico cu premionan pa e ganadornan pa di e forma aki purba di motiva y conscientisa e personanan riba e parti fisico.

Rasmijn a splica cu durante expo tambe nan lo haci un encuesta cortico pa e personanan cu ta presente. E idea tras di esaki ta cu manera a indica caba nan a scoge cuater tema, pero alabes nan kier haya sa for di comunidad mes ki otro tema of topico nan ta sinti cu falta mas informacion cu nan lo desea di ricibi, por ehempel den otro actividad, lezing, tayer, etc. pa asina nan por busca e manera pa brinda informacion riba e topiconan cu nan ta sinti falta relaciona cu aspectonan pa ora nan bira adulto mayor.

Desiree Helder, director Directie Ouderenzaken, a splica cu pa loke ta e tema di bienestar esaki tin di haber hopi cu e aspecto di salud mental tambe, con un persona ta sinti den su curpa. “Ora cu nos ta hoben nos ta pensa nos por haci tur cos, kico nos kier y despues nos ta wak, pero mester enfoca pa na un edad hoben caba enfoca riba un bon estado di salud mental,” el a remarca.

Pa e motibo ey tambe durante e expo lo tin presentacion di Stichting Hunto y Sociale Zaken cu ta enfoca riba e importancia pa tin un bon estado di salud mental.

El a enfatisa cu nan kier tene e informacion amplio pa tur hende cu mester di informacion y cu ta desea di sa kico nan mester tene na cuenta ora ta trata nan salud, bienestar, nan entrada y nan vivienda.

Relacion cu e parti di vivienda, nan lo enfoca riba e parti di costo di vivienda, pero tambe

con nan mester cuminsa plania nan vivienda. El a splica sa pasa cu ora un persona hoben construi un cas e por traha esaki cu yen di trapi, subida, bahada etc.

Durante e expo nan lo trece dilanti informacion importante pa pensa tambe na momento cu ta e hoben adulto ey yega na edad di adulto mayor y kizas e no por subi trapi mas, of por ta e baño mester ta mas hancho, of portanan talbes tambe lo por ta un tiki mas hancho. Den e sentido ey, Helder a subraya, nan kier duna informacion tocante kico mester tene na cuenta ora di construi un cas of den caso cu tin un cas caba, kico mester pensa riba dje pa na momento di yega na edad di adulto mayor mester di algun adaptacion den e cas, cuanto esey lo costa y kico tur mester tene na cuenta.

E expo ta enfoca riba conscientisa e hobennan adulto, pero hopi biaha e hobennan adulto no tin hopi interes den e tipo di exponan aki. Helder a enfatisa cu hustamente p’esey na kier haci e expo na un gym pasobra asina nan kier incentiva e hobennan pa nan tambe yega y participa.

El a agrega cu DVG tambe lo ta presente pa duna presentacion tocante e importancia pa preveni compleho di sald cronico y Healthy Lifestyle Center tambe lo ta presente pa haci midimento di salud.

“Asina nos kier incentiva e hobennan pa yega na e expo pa nan competi tambe, participa na actividadnan di movecion y pa haya e informacion cu nan tin mester. E idea ta pa conscientisa pa no warda te na ultimo, cuminsa trempan pasobra mas trempan bo cuminsa, mas chens tin berdad pa yega na edad di adulto mayor saludabel fisicamente, mentalmente, cu tin suficiente entrada, cu tin un vivienda apropia. Juist eynan nos ta trahando como Directie Ouderen Zaken riba e conscientisacion y splica pakico ta importante pa cuminsa trempan,” el a remarca.

Pa loke ta su trabou como director y kico ta su analisis te cu awor di e situacion di adultonan mayor na Aruba, Helder a splica cu esey ta un preocupacion pa nan tambe pasobra hopi biaha ta mira cu ora hendenan yega edad di adulto mayor nan tin diferente tipo di malesa cronico locual ta preveni nan di keda activo.

P’esey tambe nan kier cuminsa enfoca riba e participacion di adulto mayor den comunidad pa nan keda activo y participa pa asina nan keda hopi mas largo saludabel fisicamente y mentalmente.

“Mesora cu bo keda sin ta activo, bo ta bay tras, bo curpa ta bay atras y mas lihe e ora bo mester di cuido. Y manera ta conoci no tin suficiente hende pa duna cuido, no tin suficiente cama na e casnan di cuido y cada biaha e ta bira mas caro. P’esey nos ta enfoca riba e futuro adulto mayor pa cuminsa enfoca riba con nos kier yega na e edad aki,” el a enfatisa.