Dialuna durante un conferencia di prensa di minister di Finanzas, Geoffrey Wever, tocante e uitvoeringsrapportage di presupuesto pa prome seis luna di aña, director di Departamento di Finanzas, Derrick Werleman a comparti algun comentario tocante e gestion financiero.

“Manera minister a menciona corectamente, nos a logra entrega e reportahe akinan na tempo, conforme stipulacion den Articulo 17 den ley di LAft, ley di supervision financiero,” Werleman a bisa tocante e uitvoeringsrapportage, bao di cual despues di seis siman di finalisacion di e kwartaal, mester entrega e rapport aki.

Sr. Werleman a splica cu “esaki ta den un proceso tambe cual ta inclui e inhaalslag cu nos ta hibando pa cu e cuentanan anual di gobierno di Aruba.” Un par di siman pasa a entrega e cuenta pa 2022 na Contraloria General, y awor nan ta bezig cu e cuenta anual pa 2023, cual Werleman a indica ta spera cu comienso di september ta bay por entreg’e na Contraloria General, y pa fin di aña lo por entrega e cuenta anual di 2024, “y e ora ta pasa pa historia e retrasonan cu tabatin den e cuentanan anual.” El a menciona cu e proceso aki a dura basta tempo, desde pandemia, y cu a haci hopi trabao pa recupera e posicion aki, “pero mi ta hopi contento di por bisa cu nos a logra basta, cu hopi esfuerso di hopi hende, y contribucionnan di hopi departamentonan tambe, no di departamento di Finanzas, pero hopi partnernan den e cadena.”

Segun Werleman, awo nan por “presenta den un periodo hopi liher e cifranan actual cu ta tumando lugar den gestion financiero, den e resultadonan financiero di gobierno di Aruba, pero tambe cu nos por bisa cu e responsabilisacion di gobierno a base di cuentanan anual tambe por yega na un, ya, nos yam’e un final feliz, cu por duna cuenta den actualidad di kico ta pasando.”

Surplus ta bay pa paga debe prome

Despues di e declaracion di director Werleman, minister Wever a contesta algun pregunta di prensa.
Un tema cu tin hopi atencion den esfera politico di Aruba ta e surplus, cu gobierno anterior, Gabinete Wever-Croes II ta bisa di a laga den presupuesto pa e gobierno nobo. Un di e preguntanan tabata tocante si gobierno actual a “hereda” un surplus, y economia ta creciendo, con por hustifica cu ainda tin necesidadnan den institucion y organisacionnan manera Respaldo, of algun remedi pa pensionado cu ainda AZV no ta cubriendo.
Teniendo na cuenta cu e placa cu gobierno ta maneha ta placa di pueblo, con por tin un surplus mientras tin deficiencia den cierto servicio riba cual pueblo mes ta depende?
Wever a contesta bisando: “Ta un bon pregunta. Mi ta bisa den un bon maneho, tin diferente minister trahando riba diferente punto, y mirando cu bo ta wak cu e entradanan di e pais ta mas halto cu e gasto, y tin espacio, esey ta nifica cu cada minister mester pone prioridad pa su maneho, pa nos por incorpora esakinan por ehempel den presupuesto.” El a bisa cu awo cu tin espacio financiero lo mira cu por atende algun asunto riba cual tin preocupacion pa basta tempo caba, “pasobra e espacio financiero ta duna pa resolve problemanan den nos comunidad.” Como ehempel el a menciona cu Gabinete AVP-Futuro a percura pa duna 250 florin extra tur luna pa pensionadonan, kedando den espacio financiero, dus manteniendo e surplus di 1.1 porciento, kedando den e marco cu ley ta prescribi. El a recorda tambe cu ley di LAft ta stipula cu mester tin un surplus di 1.1 porciento den presupuesto di gobierno cu ta destina pa paga debe di pais Aruba, pa reduci e peso di interes di e debenan aki riba e presupuesto di pais Aruba. “Pakico nos ta haci esaki? Pasobra esey ta crea espacio financiero pa bo por ehecuta maneho,” Wever a bisa.

Referiendo na un grafico cu el a mustra anteriormente durante e conferencia di prensa, minister Wever a bisa cu tin un cargo di interes den 2025 di 292 miyon florin, cu ta bay pa paga interes di debe, no reduci e debe sino e interes. “Y ora bo usa bo surplus pa cuminsa pay off bo debenan di pasado, bo ta baha e carga di interes. Anto ora bo baha bo peso di interes den bo presupuesto, bo ta crea espacio cu bo por duna back na comunidad.”

Wever a enfatisa cu “no mester wak e surplus manera un pochi di placa cu bo por djis yega gasta, pasobra esey no lo ta maneho financiero responsable y no ta conforme e LAft tampoco,” pero si cu e surplus ta indica cu economia ta fuerte, tin confiansa di sector priva, e pais ta draai bon, e producto turistico ta bon.

Wever a continua bisando cu “naturalmente ora bo prepara bo presupuesto y bo ta ripara bo tin un espacio riba 1 porciento, e espacio riba 1 porciento bo por aloca pa ehecuta maneho.” Por ehempel, pa 2026, ta spera cu economia lo ta miho y cu surplus riba 1 porciento lo por bin cu incentivo pa mehora poder di compra y atende dificultadnan den comunidad.

Ademas, Wever a menciona cu ta trahando riba un plan integral di mehoracion di poder di compra, spera pa drenta na vigor pa dia 1 di januari 2026. El a menciona cu na entrada di Gabinete AVP-Futuro a aumenta e reparatietoeslag pa pensionado cu 250 florin tur luna, y cu gobierno anterior a reduci loonbelasting riba gran parti di e clase medio entrante 2025, y hunto cu e reduccion di accijns riba gasolin y diesel, esaki tabata manera e prome pakete di medida pa mehora poder di compra. Pero cu “aworaki ta toca otro gruponan tambe.”

P’esey pa 2026 “ta preparando e di dos parti di mehoracion di poder di compra.”

Tocante su plan, minister Wever a menciona cu e ta integral, y ta inclui diferente grupo di persona cu tin diferente necesidad, y ta busca e miho manera pa yuda cada un. Esaki ta algo cu ya caba Wever a menciona durante campaña prome cu eleccion como algo cu e tabata trahando riba dje tempo cu e tabata minister den e gabinete anterior. “Tin personanan cu tin entrada, bo por yuda nan cu reduccion di loonbelasting, pero tin esnan cu esey no ta yuda nan. Tin por ehempel e grupo di personanan vulnerable cu tin mester otro tipo di sosten pa bo mehora nan situacion. Y tur eseynan ta bira parti di e plan cu ta aworaki den preparacion, y cada grupo ta bay wordo adresa corectamente y usando e espacio financiero cu tin na e momento aki.”