E no ta recomendabel pa habri e pesca riba animalnan marino cu ta protegi sin cu a haci investigacion riba nan. Asina Tadzio Bervoets di Dutch Caribbean Nature Alliance a bisa Bon Dia Aruba. E comentario aki ta bin riba pregunta si e decision di Minister di Sector Primario Demisionario, Chris Romero pa laga saca kreeft for di awa ta un decision prudente of no.

Particularmente pasobra kreeft ainda ta riba e lista di animalnan protegi pa ley. E Minister Demisionario a bisa cu investigacionnan a mustra cu por cuminza saca kreeft di 12 centimeter of mas for di awa sin ningun problema. E punto ta cu ni Parke Marino Aruba, ni Fundacion Parke Nacional Aruba of otro instancia sa di e investigacion y a pesar di diferente intento, no a haya contesta riba e supuesto investigacion riba kreeft.

Y ta netamente investigacion mester determina si ta na su luga pa comercialisa kreeft atrobe, sin core risico cu ta perde e especie completamente.

Director Interino DCNA

Tadzio Bervoets ta di St. Maarten y a studia Relacion Internacional y Geo Management na Universidad di South Floriday y University of Miami. Banda di su dos Bachelors Degree, e tin un Masters den Maneho di Recurso Medioambiental di Vrije Universiteit Amsterdam, cu specialidad den ecosistema di rif. Entre su trabaonan boluntario, ta e fundacion Ocean Care. E tin experiencia internacional, unda Bervoets a yuda desaroya incentivo pa piscadonan di Tanzania bira rangernan di e parke marino di e pais pa yuda maneha e populacion di bushi di lama. Despues di sirbi como manager di e parke marino di St. Eustatius, el a bolbe St. Maarten 12 aña pasa, pa maneha e St. Maarten Nature Foundation. Y desde 2019, e ta e Director Interino di DCNA, na cual Fundacion Parke Nacional Aruba tambe ta afilia.

Bervoets tabata na Aruba pa un tayer riba con pa colecta data di especienan marino, incluso calco y kreeft cu ta dos especie cu ta cay riba lista protegi, pero cu ta un secreto publico cu ta sigui comercialisa nan na Aruba. Den otro palabra, hopi hende ta saca calco y kreeft sin cu tin mucho consecuencia huridico. E consecuencia por ta ecologico.

Calco

Por ehempel, Aruba por poco a keda sin calco. Si no tabata pa un programa di cultivacion artificial den decada di 70, e populacion di calco na Aruba lo a caba. Pero, aunke e unico investigacion cu tin riba calco, dirigi pa Dr. Adeljean Ho, ta mustra cu ainda e populacion no ta stabiel, toch tin hopi piscamento di calco tumando luga.

Tadzio Bervoets a bisa cu na momento cu un especie bolbe cuminza reproduci e ta hopi natural cu mas hende ta mira su potencial comercial. E mes ta sostene programanan pa cria e especienan” pasobra nan ta tene e populacion natural intacto. Pero locual nos kier comunica na nos partnernan cu proteha funcionamento di procesonan natural no ta unicamente importante pa proteha especienan cu ta importante pa comercio.”

E ta enfatisa particularmente e areanan unda e especienan mester di nan espacio pa nan por procrea ta protegi, pa permiti nan bira adulto, y percura cu nan no ta exponi na presionnan externo. “Un calco no ta animal cu ta move hopi, pero tin estudio cu a mustra cu separa un espacio unda e animal por biba sin presion externo ta esencial. Un animal marino no tin concepto di frontera, unda ta parke marino of no, of unda nan ta gosa di proteccion of no. Eventualmente, pa motibo cu e animal mes ta move of pa motibo di e larva di e calco ta keda plama pa motibo di e coriente di lama, ora nan pone webo.” Loke ta purba comunica ta, cu ta importante pa e pais por tin un especie comercial. Sinembargo locual ta mas importante den nos opinion, ta cu e funcion natural den cua e animal ey ta move rond, ta proteha, el a bisa.

Crisis no ta motibo pa laga los

Berdad e ta hopi dificil, no solamente pa sector comercial, sea operadornan turistico of piscado, pero tambe pa e Parke Marino Aruba y otro organisacionnan di proteccion di naturalesa pa anda cu otro den un situacion di crisis. Mester busca un manera pa sali di e crisis di COVID-19, den un forma sostenibel, unda ta haci bon uso di recursonan, sea ta uso sostenibel di un tipo di piscamento, y areanan cu ta bon maneha y protegi, y tambe e sistema pa keda monitorea areanan.

Ta pa e motibo ey, kreeft y calco ta den e lista pa observa y acumula datonan esencial, pa asina haya un idea con saludabel e populacion ta, con grandi of con poco, y ki medida mester tuma pa percura cu e populacion ta crece.

Data ta crucial

Tadzio Bervoets a bisa cu tin simpatia pa tur sector envolvi, pero mester corda cu mester tin un vision a termino largo cu ta sostenibel, y cu ta bringa e oportunidad pa por tin actividad comercial sin cu ta haci daño na especienan y nan sobrevivencia. Tur especie mester di proteccion debido y cay bao protocolnan pa sigura nan existencia.

Data mester guia decision particularmente ora ta trata di bida marino cu ta bao presion, Tadzio Bervoets a comenta. Mester tin data confiabel y amplio pa yuda mandatarionan yega na e miho decision posibel. “No por desaroya un bon maneho sin cu tin investigacion. E ta inclui investigacion riba recurso natural, e impacto di pesca, con piscadonan ta participa den e ecosistema. Hopi hende ta kere cu sigui e desaroyo di e bida marino ta malo pa piscadonan, pero piscadonan ta beneficia di proteccion di especie.”

Saba Bank

DCNA a ripara esaki cu piscadonan na Saba. Despues cu a nota un caida den pisca na e Saba Bank, particularmente den pargo (red snapper) cu ta un especie hopi importante pa comercio, e piscadonan di Saba mes a pidi pa pone un embargo temporario riba piscamento di pargo. Ta e tipo di procesonan aki, unda ta mustra specificamente con e desaroyo ta bay pasobra tin coleccion di data apropia, por realmente tuma decisionnan crucial y maneho apropia, den un forma mas obhetivo posibel. “Data ta un mantra cu ami ta biba cune y cu mi ta purba comunica na cu tur hende cu mi ta traha cune, ta cu data ta determina decision.”

No harpun na Saba

Saba Bank no ta permiti ningun tipo di piscamento di harpun, Tadzio Bervoets a bisa. Esaki ta ironico, pasobra Minister di Husticia Demisionario Andin Bikker a bisa cu el a usa e sistema di Saba pa propone un maneho di piscamento cu harpun. Finalmente e Minister no a presenta ningun ley y lo no presenta ningun tampoco pasobra tanto Bikker como e Minister Demisionario encarga cu pesca, lo no bolbe den Gobierno por lo pronto. Mientrastanto nan a pusha pa un maneho di tolerancia pa por usa harpun pa pisca.

Pero henter e idea cu esaki ta basa riba e ehempel di Saba ta incorecto. “No ta permiti uso di harpun den e Saba bank y piscamento en general ta hopi regula den e area aki. Tin unicamente un cantidad limita pa piscamento comercial pa piscadonan di Saba, nan ta mara na quota, y ta traha hopi cerca cu e Unidad di Maneho di Saba Bank, cu ta e NGO specificamente encarga pa supervisa e uso di e area natural importante. Esaki ta un area hopi grandi, cu tambe tin hopi tribon, pues lo mi no recomenda hende pa bay sambuya tampoco,” Bervoets a bisa Bon Dia Aruba.

E ta criticamente importante den discusionnan di actornan, manera piscadonan, Gobierno y organisacionnan cu ta traha pa conservacion di naturalesa, cu tur ta bin hunto y colecta informacion di tur sector y usa data cu por colecta den e areanan y yega na synergia. “Esey ta algo cu nos di henter Caribe Hulandes lo beneficia di dje.”

Conseho na Parlamento

Tin hopi ehempel rond di Caribe, con decisionnan politico a crea un crisis memey di especienan y den recurso natural, Tadzio Berevoets a bisa. “Mi sugerencia principal ta pa prome cu tuma decisionnan, trece tur actor envolvi hunto, y no enfoca solamente riba uno cu tin interes specifico. Mester tin biologonan, expertonan den conservacion, maneho di recurso natural, y yega na un consenso basa riba informacion concreto, y asina por yega na decisionnan obhetivo y cu tur por carga cu no ta basa riba e necesidad di un solo grupo. “E decision mester ta sostenibel. Pasobra Parlamento of Gobierno por tuma un decision pa yuda un grupo specifico, pero a termino largo, despues di dos, tres aña, e paso aki lo afecta e propio piscadonan, por ehempel. E bista mester ta semper dirigi na termino largo, y pa esey mester tin envolvimento di expertonan riba tur area, incluso maneho di sostenibilidad.

Sietske van der Wal, cu ta e Director Interino di Parke Marino Aruba, ta bisa cu en principio, e organizacion no ta contra e uso di harpun pa piscamento. Es mas, un hende por causa menos daño na un populacion di pisca usando e harpun cu por ehempel liñanan ekipa cu haak y otro forma di piscamento comercial.

Sinembargo, e uso di harpun mester ta para na condicionnan stricto y sigur un bon dominio di e aparato, cu tin su peliger tambe. Parke Marino Aruba en todo caso lo no permiti uso di harpun den su area y tin e compromiso di Wardacosta (Kustwacht) cu ta bay yuda controla e mantencion di ley, incluso e Ley di Proteccion di Naturalesa, cu ta inclui e especienan calco y kreeft.