E historia tristo di e servicio publico Serlimar no a yega na un fin, aunke ta parce asina. A dicidi di cambia director, cu den poco tempo a logra pasa di e candidato faborito di e ministro di e momento ey, te na e ‘chivo expiatorio’ cu ta carga cacho pa tur cos cu a bay robez ultimamente. Sin duda algun su maneho lo no tabata bon, pero pa nos kere cu e ta carga tur e culpa, ta bay demasiado leu, pero laga nos cuminsa na e inicio mes di su carera cortico na Aruba.

Tabata tende bastante critica tempo cu a nombra e persona aki. Nos como medio tambe a expresa nos duda den e capacidadnan profesional di e persona, di loke nos a mira publica di su carera anterior. Nos comentario e tempo ey tabata entre otro, cu nos no tabata kere cu un persona cu no por mustra mas cu un diploma di HAVO y algun experiencia di trabao aki aya, tin e base profesional pa maneha e compania aki. En todo caso, a tuma e persona den servicio sclamando cu e lo tabata e persona idoneo pa e job. Nos ta apenas un par di aña mas leu y ta resulta cu e no ta sirbi, y cu un ‘management team’ lo bay tuma e tareanan di dirigi e compania. Nos no sa ken nan ta ni kico nan por, p’esey nos no lo comenta riba esey. Ta di spera cu awor si ta pensa un tiki mas leu prome cu djis nombra hende pasobra nan ta pertenece na e ‘circulo di confianza’ di e mandatario di momento; esey nos a mira demasiado biaha caba.

Pero nos analisis no por caba na comenta e director cu enberdad no a resulta e persona pa e trabao. Que hubo di e Raad van Toezicht? Nan no ta carga ningun responsabilidad? Nos ta kere cu si, y pa hopi mas aña cu e director. Pa cuminsa, articulo 5 di e ley cu ta goberna Serlimar ta indica cu e director mester, entre otro, aprobacion di Raad van Toezicht pa tur transaccion riba Afl. 250.000,- y pa cera o garantisa acuerdo di prestamo di mas di Afl. 50.000,- pa aña. Nos por imagina cu den maneho di un compania di e tamaño aki ta varios momento tin cada aña unda e director mester bay cerca e Hunta di Supervision aki pa laga aproba proyecto cu e ta entama. Banda di esey, e mester responsabilisa su mes pa su presupuesto y cuenta anual, cu mester carga aprobacion di Raad van Toezicht. Siendo esey asina, ta bira dificil pa deposita tur e critica cerca e director y e resto di e compania ta sigui biba feliz. Ademas cu a resulta recientemente cu e problemanan di cuenta anual ta data di prome cu e persona aki a bira director. E conseho supervisor aki tambe ta carga responsabilidad pa e maneho cu a haci e compania termina unda e ta awor. Pregunta ta, si nos ta bay mira accion den esaki.

Tambe, no ta cerca e compania so algo lo mester cambia. Cerca gran parti di e ciudadania e actitud di simplemente no paga mester cambia. Ta trata di un servicio publico cu di tur manera nos mester carga e gastonan. Prome cu a cuminsa cobra pa e servicio aki, hasta tempo e compania no tabata existi, tambe nos tabata paga esaki, cu e diferencia cu nos no tabata sa ni mira con e placa pa opera tabata yega na e servicio. For di e recursonan general di gobierno tabata haci esaki y ta di e pagador di belasting esaki tabata bin. Awor cu a opta pa haci e pago di manera separa, en principio esey no ta e problema. E problema ta e manera con kier a haci e cobramento, di un manera asina controversial cu aki a bin topa cu un fenomeno poco conoci na nos isla: desobediencia civico. Masalmente Aruba a keda sin paga Serlimar, a sabiendas cu e compania no tabatin, y no tin, capacidad pa cobra tur hende. Pero, ta bira tempo si pa saca e compania for di e debate interminable aki, pa tur hende reconoce nan responsabilidad y nos bolbe na normalidad. Sin embargo, pa esey sucede algo otro lo mester cambia.

Esey ta encera sigur e proyecto di ley controversial cu a topa asina hopi resistencia, cu ta bira dificil pa pasa esaki manera e ta awor. Ademas e alternativa pa Parkietenbos na Sero Teishi tambe a bira un problema caba y ta ilustra claramente e dilema cu nos tin: nos isla ta asina yen y asina desaroya, cu nos tin hopi mas desperdicio pa cual mester busca un solucion, mientras no tin caminda mas di bay cune…

E idea di exporta desperdicio no ta nobo y no ta idea exclusivo di e compania competidor di Serlimar. Pa hopi aña caba tabatin interes di industria den e rama aki na Colombia pa importa diferente tipo di desperdicio for di Aruba. E solucion menos deseable awor ta pa sin mas bulldoze e ley den parlamento, cu e pensamento cu awor si tin e 11 votonan pa aproba esaki. Pero tempo ta cuminsa preta y nos no mester ta sorprendi si esaki sucede toch. Palabra ta na gobierno.

 

LEAVE A REPLY

Please enter your comment!
Please enter your name here