Ayera Bon Dia Aruba a tuma contacto cu Directora di Censo, Sharin Luydens riba e acusacionnan serio cu sr. Francisco Diaz Mendoza a haci contra su persona na Ministerio Publico.
E funcionario a bisa cu lo trece su banda di medaya por escrito tocante e detayenan riba con e proceso di registracion a bay cu fecha y tur cos. Igualmente el a laga sa cu lo entrega un keho di difamacion contra Diaz Mendoza na Ministerio Publico, y ya e proceso aki ta andando. Tambe e lo bay polis den transcurso di e dianan venidero.
E proceso aki di registracion di e baby a wordo realisa pa medio di e hurista di Censo y hefe di e seccion concerni, y no pa directora di Censo directamente. Den su carta sr. Diaz Mendoza ta trece dilanti puntonan cu no ta klop, entre nan e dianan cu a pasa pa registra e baby. Directora di Censo a indica cu tanto diabierna 1 como diasabra 2 y diadomingo 3 di januari, censo tabata cera te dialuna 4 di januari cu tabata dia laboral. E dianan ey, dialuna y diamars – segun directora di Censo- e tabata liber.
Registracion di prome baby di aña
El a splica cu e tata di e baby a presenta dialuna 4 di januari pa registra su yiu, pero nan no tabata registra como casa, y tampoco e tata no por a duna e declaracion di nacemento di e criatura, ya cu nan no a bin cu niun papel.
E ora ey, Censo a pidi e mayor pa bin cu e mama di e baby y asina Censo por registra e baby cu el a nace. Pero te dia 7 di januari e mayornan di e baby a presenta. El a laga sa cu Censo no ta bay hospital sino cu ora cu e baby ta nace, e mama ta wordo presenta na Censo pa nan por traha e acta di nacemento y esey ta locual nan a haci dia 7 di januari.
Ordo publico
Di otro banda el a indica cu aunke ta trata di un delito cu e tata di e baby a tene relacion cu un menor di edad, e ta un aspecto cu no ta concerni na Censo, sino na Ministerio Publico. Apesar di esey nan a laga e tata reconoce e mucha dor cu Censo no a reconoce e matrimonio.
Directora di Censo a bisa Bon Dia Aruba cu nan no a reconoce e matrimonio inicialmente pasobra e tabata contra nos ordo publico. El a splica cu nos ordo publico ta mara na regla internacional cu nos mester mantene na dje. Si un homber –pa ehemplo- ta casa cu un mucha di 14 of 15 aña, esey no ta wordo permiti na Aruba. Si un caso asina ta wordo permiti den otro pais ya cu nan ley ta otro, den nos ordo publico di Aruba, e no ta aceptabel, el a bisa.
El a señala cu ora un ciudadano Hulandes ta casa afo cu un pareha di otro nacionalidad y e ta inscribi den registro di Censo (no den registro civil), normalmente tin un proceso largo pa pasa, ya cu nan mester averigua cu no ta trata di un matrimonio ficticio.
Tur e factor aki a hunga un rol pakico Censo no a registra inicialmente e matrimonio entre e mayornan di e baby cu a tuma luga na Venezuela. E mucha a casa cu 15 aña y den nos ordo publico na Aruba, e no ta aceptabel. Manera e mucha a haci 16 aña dia 14 di februari, dos dia despues Censo a registra e matrimonio aki. Nan a acepta di registra e matrimonio, ya cu e mucha ya a haci 16 aña. Censo por a pidi pa anula e matrimonio ya cu e mucha a casa cu 15 aña, pero pa evita cu e mayornan di e baby pasa den henter un proceso di tramite y placa, entre otro pidimento di permiso na Minister di Husticia na Aruba pa e casa cu 16 aña pasobra el a haya yiu, etc… Censo a dicidi pa sinembargo registra e matrimonio.
Directora di Censo a declara cu el a yama diferente via na OM y papia cu e fiscal riba e pasonan cu e ta bay tuma rond di caso aki. El a indica cu conscientemente nan a haci tur cos basa na e reglanan di ley cu tin vigencia, y nan no a haci nada cu ta pafo di e reglanan cu nos tin. Tanto e baby su acta di nacemento a wordo traha dia 7 di januari, ora e mayornan a bin hunto pa registra e criatura.
Censo a laga e tata reconoce e mucha di biaha. E mucha a bira Hulandes pasobra e ta yiu di un ciudadano Hulandes. Nan a inscribi e mucha di biaha den Censo y e matrimonio tambe a keda registra debidamente, segun splicacion duna pa Sharin Luydens. P’esey directora di Censo no ta compronde di kico e persona cu a denuncia su persona na ministerio publico ta papiando.
