Stichting Monumenten Fonds Aruba (SMFA) ta hopi orguyoso y contento cu finalmente nan por a cuminsa cu e proyecto di restauracion di e forno di calki na Rancho. Un trabou cu aparentemente por a mustra uno senciyo, pero nan a yega di confronta reto y te hasta haya algun sorpresa cune.

Directora di e fundacion aki, Anne Witsenburg a relata na Bon Dia Aruba cu e forno di calki tabata hopi deteriora, ya cu e no tabata haya su mantencion durante hopi aña. Esaki no tabatin di haci cu vandalismo so cu a yega di sucede, pero tambe a presenta otro problema cu tin di haci cu e material di cual a construi e forno aki mas cu 100 aña pasa.

Pero di otro banda e fundacion aki tabata buscando fondo loke no tabata facil, ya cu e forno tabata un obheto usa como un industria cu fin economico. E no ta manera un cas monumental, pa cual ta mas factibel haya hipoteca, y despues huur e propiedad mes. E hecho cu nan a combina e parti di educacion pa siña con pa traha cu calki, caminda nan por a haya hopi hende cu por a yuda cu e restauracion, a facilita e proceso pa finalmente e proyecto di e forno di calki por a bira realidad.

Sorpresa

Sra. Witsenburg a bisa cu aworaki nan ta yegando na final di e proyecto. Semper den e tipo di trabou asina, nan ta haya basta sorpresa. Pero e biaha aki nan a haya mas sorpresa cu loke nan a pensa, ora cu nan a cuminsa cu e trabou di restauracion. Esaki a pesar cu e structura di e forno ta mustra uno masha simpel mes.

Ademas durante e forno su historia di mas di 100 aña, den diferente etapa nan a purba di drecha esaki cu material y conocemento cu nan tabatin disponibel e temponan aya. Pero ora cu SMFA a cuminsa cu e proyecto, nan a ripara varios cos, un tin di haci cu e forma di e forno mes.

E forma di e forno antes tabata otro, ya cu el a wordo construi den un forma mas rondo, manera expertonan di SMFA tabata sa caba a base di nan investigacion. Dor cu nan a mira tur e capanan cu e construccion aki tabatin, nan a cuminsa kita tur e pleisternan bieu. Eynan e sorpresa a cuminsa sali, asina sra. Witsenburg a splica.

Aparentemente, despues di algun aña cu a construi e forno aki, el a cuminsa zak caba, caminda e tempo aya nan a pone piedranan di coral pa fortalece su structura y evita cu e por a cay mas. Ta asina cu el a haya su forma un tiki mas cuadra cu e tin aworaki.

Tambe ora cu e piedranan chikito a cuminsa cay nan a pone pleister riba nan, djis pa tapa e parti cu a cuminsa daña of cay. Den e proceso aki nan por a haya capa di pleister di diferente material, entre nan pleister di calki, di piedra di coral y di cement. E ultimo aki a resulta esun mas moderno y nobo cu nan a usa mas cu 40 aña pasa, pero tambe esun mas dañino.

E forno no tabata algo di bunitesa, sino cu e tabata algo mas bien industrial, construi pa traha calki. Y cada bes cu un parti tabata daña, simplemente nan tabata pone un tiki di pleister tur caminda pa cera su heridanan.

Restauracion.
Durante e trabou di restauracion, SMFA a documenta tur e sorpresanan cu nan a haya. Nan ta haya hopi interesante tambe, e forma con den diferente epoca di e forno su bida, nan a percura pa mantene su structura bibo. Nan a documenta tur e capanan di pleister y unda exactamente a haya nan.

Pero otro sorpresa tabata ta cu bou di e capa di cement nan a descubri cu e calki paden a bay full, ya cu e cement literalmente tabata come e calki haciendo e structura di e forno mas vulnerabel.

“E ta algo cu nos tabata sa caba, pero nunca a experimenta esey,” el a bisa. E problema mas grandi cu nan a confronta tabata ariba, na e top di e forno, unda tabatin un capa di casi 5 centimeter di cement. Ora cu nan a habri e parti ey pa kita e capa di cement, tur cos a cuminsa cay ya cu e coral a bira manera un puiro paden.

Esaki tabata un di e peligronan mas grandi cu nan a haya durante e restauracion, pero tambe e dolor di cabes mas grandi con pa drecha e situacion aki.

Segun sra. Witsenburg, e conocemento di e compania contratista Parvenir Heritage Restoration and Maintenance Company Ltd. di Trinidad and Tobago a hunga un rol positivo, ya cu pa e fundacion aki tabata e prome biaha cu nan a atende un situacion asina, y tambe pa nan colega di Monumenten Bureau.

Esaki tabata e prome biaha cu nan ta haci restauracion di un forno di calki y di un tipo di construccion asina. P’esey e ta mir’e di e forma mas positivo y constructivo, ya cu nan tur a siña hopi di e proceso aki.

El a bisa cu nan a invita Monumenten Bureau pa wak kico nan a haya den e prome dos of tres siman di trabou. Nan tur a bay hunto pa djis check kico ta kico, y con e forno aki a wordo construi. Pero tambe e dañonan cu a haci ora a pone pleister di cement.

Sra. Witsenburg su intencion no ta pa culpa niun hende, ya cu e tempo aya tabata normal pa drecha e tipo di monumento aki cu cement. Pero nan no tabata sa e daño cu e uso di cement a ocasiona den e structura caminda a usa piedra di coral tambe.

Directora di SMFA a caba di bini di un reunion cumbre na Hulanda, unda e expertonan por a conclui cu den mundo di monumento, ora ta referi na diferente capa di historia di un monumento, casi ningun di nan tabata den su forma original. “Cada generacion ta añadi algo of ta kita algo, y asina e tin su historia.” Den e caso aki loke a haci finalmente tabata pone un capa nobo den historia di e forno di calki.

Pleister di calki.
El a splica cu nan prome idea tabata kita full e pleister bieu y pone un capa hopi fini di pleister riba e fondo di calki, manera parti di dje tabatin antes. Pero pasobra parti di e construccion a cuminsa cay, nan a pone un capa un tiki mas diki, a base di conseho di Monumenten Bureau.

Sra. Witsenburg a bisa cu ta prome biaha den historia di e forno di calki, cu el a haya un capa full rond. “Ya cu ta imposibel pa dicidi, unda bo ta pone algun pleister si y algun pleister no,” el a bisa. Si no a tuma e decision aki finalmente, e forno lo a bay cay. Ademas e capa cu nan a usa ainda ta asina fini cu e ta sigui e forma original di e forno di calki. Pero importante ta cu e ta wanta tur su piedranan y e no ta cay mas.

E hecho cu nan a usa calki como material original, esaki ta mas faborabel pa evita mas daño, compara cu e material di cement cu tabatin prome. Sra. Witsenburg a bisa cu si den futuro mester cambia algo, e ta mucho mas facil cu cement. E por yega di sucede, mescos cu 40 pa 50 aña pasa cu nan a pone cement, ya cu na e momento ey, esey tabata e miho solucion. Pues e uso di calki ta e miho solucion cu tin aworaki, el a splica.

Awor e pregunta cu a bini ta e color original di e forno, considerando cu e no ta un cas cu bo ta verf den un color specifico. Mientras cu varios color tabata representa den e diferente capa y piedranan cu e forno tabatin. Pero pa atende e color, nan a haya conseho di Monumenten Bureau.

E proyecto no ta full cla y ainda SMFA ta buscando solucion pa otro reto. Entre nan e plataforma cu e forno den su forma original tabatin full ariba. Pa esaki nan a busca algun potret di antes. Pero den e potret por ehempel, nan no por mira e tipo di palo y con grandi e tabata.

Den sintesis, esaki tabata e sorpresanan, pero igualmente e problemanan cu SMFA a haya durante trabou di restauracion di e icono aki di bario di Rancho. Na final directora di SMFA a gradici tur partner cu a haci posibel e realisacion di e proyecto di restauracion di forno di calki, y muy specialmente Stichting Rancho y Monumenten Bureau Aruba.

 

 

 

 

 

 

LEAVE A REPLY

Please enter your comment!
Please enter your name here