Siman pasa tabata circula e noticia cu directora di Dimas a haya orden di ministro encarga cu Labor y Integracion cu e mester bay traha seis luna na Departamento di Legislacion y Asunto Huridico como hurista. Esaki pasobra aparentemente e ministro no ta desea pa e continua su trabao como hefe di e departamento menciona. Nos por a ripara cu e noticia realmente no a ocasiona masha reaccion, sigur no di politico tanto di banda gubernamental como di oposicion. Nos ta kere cu lo ta un eror pa no presta atencion na e caso aki, no pa expresa simpatia cu e persona, o laga di haci esey, sino pa e manera preocupante di atende e tipo di caso aki, segun nos opinion.
Pa cuminza nos ta haya straño cu ta djis anuncia cu a manda e persona bay traha na otro departamento, como si fuera e cosnan aki ta bay automaticamente asina. Kico ta e caso? Cu semper lo mester tin un acuerdo entre dos ministro, pasobra den e caso aki ta trata di dos departamento cu ta cay bao di dos ministerio diferente. Legislacion y Asunto Huridico ta cay bao di nos Promer Ministro y si e asunto a anda normal, e mandatario aki tambe lo mester tabata involucra den e asunto, dunando su aprobacion pa tal cambio, hasta si e ta algo temporal. Sin embargo, no ta duna e claridad ey. No ta conoci tampoco si a trata e asunto den Conseho di Ministro, y kico tabata resultado di esey. Nos por imagina cu ta trata di un asunto bastante incomodo pa e mandatario involucra directamente, ya cu caso den corte no a resulta asina faborable pa su deseo di saca e empleado aki di su puesto, pero aparentemente no sa ta con ta haci e cosnan aki, respetando ley den tur sentido. Ademas, si nos informacion ta corecto, e investigacion pa cual a pone e empleado sinta na cas cu suspension, no a duna indicacion di mal funcionamento di e persona, pues a base di kico no ta lag’e bolbe.
Promer cu tur cos, laga nos contesta e pregunta cu por surgi, si gobierno por manda un ambtenaar bay haci otro trabao na otro departamento. Esey ta posible, segun e ley principal pa maneho di empleado publico, Landsverordening Materieel Ambtenarenrecht (LMA). Articulo 52 inciso 1 ta bisa cu un empleado publico ta obliga di eherce otro trabao cu esun cu e ta haci normalmente. E articulo general aki no ta duna mas splicacion, pero e siguiente, articulo 53 ta bisa cu: “Si e interes di e servicio ta requeri tal, e ambtenaar ta obliga di, sea o no den su profesion/funcion, y sea o no na e mesun lugar, acepta otro funcion o empleo, cu pa e, relaciona cu su personalidad, su circunstancianan y e perspectivanan existente pa su persona, razonablemente por ser encarga cu esey. Inciso 2 di e arrticulo aki ta bisa cu “Otro funcion o otro empleo no ta ser encarga na su persona, salvo caso di urgencia, sin scucha su persona di antemano. Den e caso aki nos no sa kico a sucede exactamente, y si en berdad a cumpli cu tur e requisitonan di ley pa e caso aki. Di tur manera nos ta supone cu e bataya legal no a termina aki y cu proximamente lo tende mas di esaki den corte. E impresion ta cu a core busca un solucion temporal pa e asunto, pero no ta haya claridad kico ta e problema fundamental aki.
Sin embargo, nos mester señala un problema mas amplio cu tin, y esey ta cu a hinca parti di e tarea di husticia bao di ministro encarga cu Labor, bao di denominacion di “maneho di stranhero y integracion”. Esaki ta implica cu cierto aspecto di e ley clave di Admision y Expulsion lo ta cay bao di e ministro aki, pero por lo demas tin cierto tarea cu ta keda pertenece na e mandatario encarga cu husticia. Nos no por comprende pakico e gobierno aki no por a bolbe simplemente na e forma anterior, unda desde 1986 semper e ley (LTU) tabata cay completamente bao di responsabilidad di Husticia. Talvez no ta agradable pa nan recorda cu ta den e promer decada di 2000 a bin cambio den esaki, tempo cu pa scapa cara y mas di e ministro di Husticia di e tempo ey, a pasa e cartera di Admision y Expulsion pa e colega ministro encarga cu Infrastructura. E siguiente gobierno unipartidista di 2009 te 2017 a continua e maneho robez aki, y lo tabata logico si na 2017 lo a coregi esaki, pero esey no a sucede.
Awor, loke a ser ‘bendi’ na pueblo como un bentaha pa pone tanto Labor (e conseho) como Integracion (e admision) den un man, lo keda duna problema, hustamente pasobra e decisionnan di e ministro aki por ta conflictivo cu e actuacion di e ministro encarga cu “rechtshandhaving” segun e definicion di e ministerionan. Nos no por comprende con un ministro di Husticia mester hiba un maneho di detencion y eventual expulsion di stranhero indocumenta, si na cualkier momento su accion por haya obstaculo di su colega, cu por dicidi di duna e stranhero en cuestion un paso liber na nos pais. Tin mas problema den maneho di stranhero, por ehemplo e pregunta di ‘amnistia’si o no, mientras gobierno no ta dunando claridad den esaki. Ta bay ehecuta un maneho no explicita? En todo caso, no ta e conflicto cu e directora so ta causando problema.
