Minister Richard Arends di Asuntonan Economico a confirma atrobe cu 2017 ta wordo categorisa como uno prometedor pa e reapertura di e refineria. E ta reconoce cu tabatin un discrepancia entre gobierno y IMF ya cu normalmente –segun e mandatario en cuestion- ora cu bo tin inversion plania pa un aña pero si bo tin un retraso e modelo mes ta pusha e inversion pa e aña siguiente.

Mientras cu gobierno ta bisa cu nan tin indicacion cu inversionnan cu a wordo palabra rond di e refineria lo sosode prome cu 31 di december 2017. El a argumenta cu ya caba e refineria a start cu e prome 350 hendenan cu ta preparando pa e rehabilitacion fisico tuma luga di e refineria opera pa Citgo.

Esaki ta e di cuater mision di IMF na Aruba cu e minister di Economia a participa den dje, prome como consehero y e recientemente como mandatario. Y el a cualifica e delaster bishita aki di IMF como uno “hopi placentero”. E ta haya cu e discusionnan cu nan a hiba tabata hopi interesante ya cu e team di IMF a comparti modelonan economico cu nan. Tambe a debati riba kico e reformanan cu ta propone ta costa. “Nan a duna nos un palet di kico kiermen ora cu bo ta corta 100 miyon na inversion, kico esaki kiermen”,el a bisa.

Midi a base di GDP
IMF tabatin atencion riba e cinco areanan cu a bira e base di e modelo economico pa e proximo añanan. El a splica cu despues di inverti for di 2010 riba e tereno di infrastructura, desaroyo urbano y energia, gobierno a identifica cinco areanan unda nan por desaroya actividadnan economico: Area di infrastructura cu ta inclui e waf nobo di Oranjestad.

Segun nan calculacion cualkier inversion substancial por tin un efecto directo riba nos GDP. Otro areanan tin di haber cu rehabilitacion di nos refineria; area rond di e waf di Barcadera y areanan rond di expansion y renobacion di nos hospital. Intencion ta pa e areanan aki lo wordo desaroya a base di e cuater top sector cu gobierno a delinea cual ta tecnologia berde, logistica, industria creativo y exportacion di conocemento riba tereno di turismo y tecnologia.

E mandatario a laga sa cu IMF a indica cu un di e causante mas importante di e resultado economico di e ultimo tres aña tabata e inyeccion financiero cu gobierno a hinca den nos economia pa medio di diferente proyecto. Un factor di e ultimo aña tabata turismo slow pero tambe e medidanan di reforma fiscal cu gobierno ta haci pa reduci deficit. E cifranan cu Aruba mester cumpli cu ne ya cu nos pais ta wordo midi na dje, ta reaccion compara cu bo GDP . “Nos deficit ta wordo refleha como parti di bo GDP, como un porcentahe di bo GDP. Bo debe tambe ta wordo refleha como parti di bo GDP.”

Un recomendacion cu IMF a duna ta stop y no sigui compara cu criterio aki di GDP, pero uza criterionan nominal. E ta un punto cu segun e mandatario na aña 2014 durante un combersacion cu Hulanda ora cu nan tabata papia riba establecimento di nos propio ‘fiscal consolidacion’, e parti di e criterio di midimento aki a bira un punto di discusion. E ta bisa cu e rasonamento tras di esaki ta pa ehempel ta cu via GDP nos economia di henter un pais ta wordo afecta dor di operacion of no operacion di un solo compania cu den e caso aki tabata Valero. Obviamente esaki ta duna un perspectiva un poco robes y un peso demasiado grandi pa e parti di midimento di henter nos economia a base di e normanan refleha dor di nos GDP.

Parti positivo y negativo
Riba e parti menos faborabel, IMF a indica cu nos e economia a cay of “shut down” durante ultimo aña no solamente cu turismo y muy particularmente nos mercado di Venezuela a cay. Pero tambe cu gobierno su deficit a bira hopi menos y awor e ta bay bira un surplus. “Tur e deficit cu gobierno tabatin bon of malo tabata fondonan cu tabata circula den nos economia “, segun minister Arends. Unabes cu gobierno ta cuminsa corta gasto ta menos actividad economico cu ta wordo promove den nos economia.

IMF a indica cu nos mester tin “plan B”, y esaki ta e prudencia cu e organo aki a bin cu ne pa e maneho financiero/economico di nos pais. Pero a base di e cinco area describi ariba, minister Arends ta kere cu gobierno tin’e den su luga, unda nan lo por duna mas empuhe na e GDP cu ta un refleho di e actividad economico cu tin na Aruba.

Burocracia
Un critica di IMF tin di haber cu un critica constante riba un mercado laboral cual no ta suficiente flexibel, tambe e burocracia cu tin pa establece un negoshi y e costo pa inverti riba nos isla. Den e caso aki y durante dos siman di reunion cu IMF y demas gremio, gobierno a haya señalnan mixto. Un ta bisa cu mester tin pa ehempel ‘red tape’ pasobra e ta fungi como filter; y di otro banda inversionista nobo ta critica e tardansa pa bin establece negoshi. Pero e mandatario a Sali na defensa bisando cu departamento economico a reduci e tempo aki.

Sinembargo e mandatario a destaca tambe e parti positivo. IMF ta premira si –segun minister Arends- cu a parti di 2017 actividad economico lo mehora y esaki no solamente tin di haber cu e proyecto publico priva (PPP), cu ta wordo desaroya. Pero tambe turismo cu ta den mira pa mehora y mas cu tur cos e reapertura di e refineria.

Dunando un interpretacion di e rapport preliminar di IMF, minister Arends a indica cu e organismo internacional aki a duna elogio na Aruba pa cu e modelo di negoshi cu a wordo scogi. E prome fase tin di haber cu e reforma pa reduci e deficit y e di dos fase pa por bay over na e reduccion di e debe. Teniendo un balansa semper pa no bay atras den e area social economico y laboral. Igualmente e mercado di nos pais como producto Aruba cu a wordo inverti hopi den dje, tambe ta forma base pa un crecemento positivo pa e añanan nos dilanti.

Energetico
Otro punto cu IMF a destaca tin di haber cu e maneho energetico di Aruba cu tin un componente economico hopi grandi tambe a yuda pa garantisa un crecemento economico nos dilanti. E reduccion di prijs di coriente na cuminsamento di e aña aki ta un ingrediente cu a yuda pa mehora e poder di compra di nos hendenan, pero tambe mehora e situacion financiero di empresanan. Esaki ta crea mas espacio financiero pa nan por inverti den nos economia.

Pa ultimo minister Arends a declara cu IMF a aplaudi inversion cu gobierno a haci riba e area energetico no solamente pa e parti medio ambiental, pero riba e efecto economico cu esaki a bin cu ne.