Gobernador den su discurso di inauguracion a cuminsa cu referi na e importancia di Parlamento, di su autonomia, pero tambe di e importancia cu Parlamento tin como e organismo cu mester duna proteccion na e ciudadano contra decision di gobierno.

Tambe Gobernador a mustra riba importancia di fortifica y crea mas transparencia den e proceso electoral y di garantisa integridad di esunnan cu ta asumi responsabilidad di un funcion publico. Den e cuadro aki, Gobernador a referi na e institucion di un Oficina di Integridad y cu despues lo sigui tambe cu un Camara di Integridad cu mester bay vigila bon gobernacion. Hunto cu Banco Central di Aruba ta trahando riba un codigo di maneho empresarial pa introduci guianan general riba e tereno aki.

Pa loke ta maneho economico, a menciona e sectornan clave, anuncia anteriormente caba pa gobierno, cu ta turismo, economia di conocemento, logistica, sector primario, economia circular y industria creativo y cultural. Pa loke ta e papel di turismo, a haci mencion di e proyectonan di aeropuerto (Gateway 2030); e proyecto di ‘Port City’ (desaroyo residencial/recreativo y comercial riba ex-tereno di waf na Playa), y e desaroyo di diferente proyecto na San Nicolas, como parti nobo di Aruba su infrastructura turistico.

Finanzas publico ta un factor indispensabel, ‘e gasolin den e motor di nos economia’ ta loke Gobernador ta bisa na nomber di gobierno. “E normanan den e ley di 2015 pa supervision financiero no ta vigente mas y ta p’esey gobierno a traha e Memorando Financiero Economico 2018-2021, pa stipula e caminda pa yega na un maneho di finanzas publico saludabel.” E Memorando aki ta base pa e Protocol acorda y firma cu Hulanda na november 2018. “Hunto cu Conseho di Minister di Reino ta buscando e alternativa con pa hancra esaki den ley manera palabra.”

Seguidamente ta haci mencion di e reforma fiscal, unda ta haci mencion di incentivo pa comercio local como tambe internacional. Tambe ta enfatisa e necesidad di haci e sistema ‘transparente, accesibel y husto’. Ta menciona tambe e evaluacion bastante positivo di Fondo Monetario Internacional y di e rating agencies S & P y Fitch, unda ta referi tambe na e aspectonan cu merece atencion ainda, ‘pa motibo cu nos no ta ainda unda nos mester ta’.

Atencion tambe pa maneho di e fluho di persona cu ta drentando na nos pais, principalmente esunnan cu ta procedente di e pais bisiña Venezuela. Segun gobierno, ta sinti e presion aki riba tereno di turismo, comercio, migracion, salubridad y siguridad. “Den e cuadro aki ta necesario sigui hiba un maneho stricto pero alabes humano, pa combati entrada y estadia no permiti na nos isla. Di e forma aki lo proteha orden publico y nos mercado laboral.” Ademas a introduci cambionan substancial den nos leynan di admision y expulsion, percurando pa tin un procedura moderno pa atende cu asilo.

Den su prioridadnan, gobierno ta tene cuenta tambe cu e Metanan di Desaroyo Sostenibel di Nacionnan Uni. E obhetivonan aki lo ta manera un liña cora den e politica general di gobierno y lo sirbi como punto di salida pa accionnan gubernamental. Algun di e Metanan di Desaroyo Sostenibel tin relacion cu iniciativa empresarial. Den e cuadro ey, a firma na maart un acuerdo financiero cu Fondo di Desaroyo di Union Europeo. Universidad di Aruba – den cooperacion cu Universidad di Leuven y UNDP – a inicia e facultad SISSTEM. E facultad aki lo brinda hobennan di Aruba y den region un estudio tecnico avansa na Aruba dirigi riba carera den ramo di tecnologia y sostenibilidad.

Otro prioridad di Gobierno den cuadro di un desaroyo sostenibel ta innovacion. Gobierno lo actua como catalisado pa esaki. Importante lo ta e preparacion y implementacion di e Plan di Transformacion Digital (e-Government), cu actualmente ta den desaroyo cu ayudo di partnernan internacional y demas experto.

Gobernador a señala cu ‘e capital di mas grandi cu Aruba tin ta su hendenan’, haciendo referencia na e motto di gobierno, ‘pone e ser humano central’. Lo inverti den conocemento a traves di programanan innovativo pa desaroya habilidad na tur edad, pa desaroya economia a base di conocemento, cual no ta pone presion riba recursonan natural, y lo crea un economia mas resistente y flexibel. Den e Plan Educacion Nacional 2030 ta delinea un vision strategico pa e proximo 10 aña di educacion en linea cu desaroyo internacional y e Metanan di Desaroyo Sostenibel. Actualmente den esaki por mira implementacion di Scol Aruba Multilingual y Papiamento den educacion.

Maneho di Vivienda lo ta dirigi riba crea mas hogar independiente, organisando nos pais structuralmente pa sigura calidad di bida a traves di e Plan di Desaroyo Urbano, regulando desaroyo pa proteccion di nos recursonan.

Remarcabel ta cu den e discurso no a dedica tanto atencion na e tema candente di e momento, cu ta e futuro maneho di desperdicio. “Riba tereno di medio-ambiente, lo sigui atende cu e tema di desperdicio den e periodo nos dilanti. Gobierno ta dedica na combati esaki y ta sigui tuma pasonan pa percura pa atende esaki den forma responsabel.” Ademas a menciona Fundacion Parke Aruba y e Parke Marino como esfuersonan pa proteccion di naturalesa.

Prevencion ta bira e direccion pa cu maneho di Salubridad, pa cual a traha un Plan Nacional di Prevencion, sosteni a nivel internacional door di Organisacion Panamericano de Salud, cual implementacion lo cuminsa proximo aña. Lo promove deporte, no solamente den e angulo di cuido di salud, sino tambe e aspecto social pa preveni delincuencia y violencia, a traves di enfoke riba mehoracion di infrastructura di facilidadnan deportivo. Tambe lo crea Fundacion Nacional di Salud y Recreacion pa genera fondo pa inverti den salud y deporte.

Riba e tema di siguridad, lo aumenta visibilidad di Cuerpo Policial y tambe proteccion di frontera. Den cuadro di cooperacion multidisciplinario pa preveni y combati criminalidad, lo duna contenido na Cas di Siguridad, y tambe introduci leerorkest pa duna acceso na les di musica. A cuminsa cu e proceso di construccion di un facilidad coreccional nobo, tambe reforsando facilidadnan existente y optimalisando siguridad mediante tecnologia y ley penal.

Gobernador a expresa preocupacion pa e situacion fragil di hobennan, pa cual a introduci Crisisplan Social. Tambe ministerionan lo traha hunto pa mehora y regula calidad di cuido pa hendenan di edad avansa. Ta trahando riba proyectonan pa stimula mamanan soltero y persona cu capacidadnan diferente, y fortifica proyecto Formacion Social.

Pa cu formacion y desaroyo laboral, a sostene fundacion di e Aruba Vocational Educational Training Institute, cursonan hunto cu sector priva pa certifica participantenan pa integra den forsa laboral basa riba e necesidadnan di e sector priva.

Cultura ‘ta identifica nos como pais’, y esaki tambe den linea cu e Metanan di Desaroyo Sostenibel. Tambe lo bin enfasis riba agricultura y cria di bestia local na escala chikito. A reconoce baluartenan cultural y ‘fortalece herencia cultural’ a traves di por ehempel e biyetenan nobo, cual ta duna prominencia na ‘loke ta di nos’. Ademas, ‘pronto’ Museo Arkeologico lo habri bek. A menciona diferente proyecto, manera Arte di Palabra, Gang di Arte, y Fiesta di Cunucu como maneho integral di cultura.

Gobernador a remarca cu ta ciudadanonan ta carga un comunidad, pero ta spera pa gobierno resolve tur problema. “Nos sociedad ta funciona mucho miho ora e ciudadano puntra su mes kico e por haci pa e otro, prome cu wak den direccion di gobierno pa soluciona su problemanan”, a comenta, elogiando iniciativanan priva, enfatisando riba respet, responsabilidad, y duna cuenta na otro, como maneranan pa eleva calidad di bida, poniendo enfasis riba transparencia como un forma di respet di gobierno pa comunidad.

E discurso a conclui enfatisando cu ciudadano y gobierno mester traha hunto ‘pa logra solucionnan duradero y sostenibel’.

 

LEAVE A REPLY

Please enter your comment!
Please enter your name here