Ayera a tuma luga e reunion publico den Parlamento di Aruba durante cual Minister di Asuntonan General, Cultura, Medio Ambiente y Naturalesa, Mike Eman, Minister di Relacionnan den Reino, Enseñansa, Hubentud, Inovacion y Deporte, Gerlien Croes, y Minister di Finanzas, Asuntonan Economico y Sector Primario, Geoffrey Wever, a duna informacion pa loke ta trata e Ley di Supervision Financiero di Aruba, manera pidi fraccionnan di PPA y MEP.

Manera ta conoci dia 29 di augustus a tuma luga e prome reunion publico caminda e mandatarionan di Gabinete AVP-FUTURO a duna informacion pa loke ta trata e Ley di Supervision HOFA.

Prome minister Mike Eman a indica cu den cuadro cu esaki tabatin negociacionnan di e gabinete anterior caminda tabatin bestuurlijk overleg y despues bestuurlijk akkoord cu a ser realisa. Despues di cambio di gobernacion, Gabinete AVP-FUTURO a sigui cu e comision cu tabata traha riba esaki y durante e reunion publico a informa parlamento cu den Conseho di Minister di Reino di ayera, gobierno di Aruba a presenta e concepto di Rijkswet.

Despues cu prome minister Mike Eman a duna splicacion ya haci entrega di concepto di ordenansa nacional cu ta garantisa finanzas sostenibel di gobierno, presidente di parlamento a schors e reunion, a peticion di fraccion di AVP.

Mas cu siman despues, cual tabata e tempo inicial cu a pidi pa schors a reunion, ayera Parlamento di Aruba a bolbe reuni pa asina continua cu e discusion riba loke ta trata e Ley di Reino HOFA.

Durante e reunion publico aki, cu a cuminsa cu tensionnan halto, fraccion di MEP a expresa duda tocante si Gobierno a tuma un decision valido referente na e propuesta di ley. Segun MEP, pa un decision asina por bira oficial, mester tin un aprobacion formal di e Conseho di Minister, pero Gobierno no a presenta evidencia di tal documento.

Sin embargo, Gobierno a sostene cu den e etapa actual no tabatin necesidad pa esey, pasobra e proceso solamente tabata pa pidi opinion riba e propuesta di ley cu Hulanda a pone online pa consulta publico. Despues di e periodo di consulta, un version ahusta lo ser manda pa Raad van Advies pa revision.

Un aspecto cu tambe a hala atencion durante e reunion ta e hecho cu parlamentario Mike de Meza (AVP) a scoge banda di oposicion den loke ta e tema aki. El a expresa cu e no ta di acuerdo cu e Ley di Reino HOFA y alabes a recorda cu den 2024 partido AVP mes a indica cu tambe tabata contra un Ley di Reino.

E situacion actual ta crea un impasse, pasobra no ta cla con e procedemento lo sigui, ni kico ta e paso siguiente den e tramite legislativo. Loke ta sigur ta cu e documento actual no ta trata di un aprobacion formal, sino simplemente di un etapa informativo den e proceso. No a trata ningun contenido sustantivo di e ley mes, y por tanto e cuestion aki ta mas administrativo cu politico.

Keda pendiente pa informacion detaya tocante e topico aki den nos siguiente edicionnan di Bon Dia Aruba.