Recuperacion economico di Aruba ta avansando cautelosamente despues di e crisis di Covid-19, pero toch ta keda vulnerable pa shock externo, desbalansa structural, y fragmentacion institucional. Den e contexto aki, Capitulo 8 di e rapport di implementacion di reforma den contexto di e Landspakket cu Aruba a acorda cu Hulanda ta pone un ruta pa reforsa e fundeshi economico door di mehora formulacion di politica economico, reforsa condicion di inversion y diversifica e base economico.

E metanan ta ambicioso: reduci dependencia riba turismo, stimula productividad den sector priva, y construi un ambiente di politica cu ta fomenta crecemento inclusivo y sostenible.

E periodo di reportahe di april – september 2025 ta refleha un mescla di progreso den planificacion y trabaonan di preparacion, pero tambe ta revela inercia den ehecucion y atrasonan notable den implementacion, similar na otro sectornan evalua den e rapport.

Falta di ehecucion
 Na nivel di politica, Aruba a haci algun progreso den delinea su vision economico, notablemente mediante e nota actualisa di politica economico. E documento aki ta destina pa sirbi como un compas pa intervencionnan economico na nivel di gobierno. Mientras e nota di politica a keda finalisa y comparti cu stakeholdernan, ainda e ta pendiente pa adopcion den Conseho di Minister. Sin e sosten politico aki, su operacionalisacion y integracion den ciclonan mas amplio di planificacion ta keda limita.

E documento ta delinea obhetivonan a largo plaso rond di resiliencia economico, diversificacion y transformacion digital. Sinembargo, e plan di implementacion cu mester traduci e politica aki den accion concreto ainda ta den su fase inicial di preparacion. Ademas, e pronostico economico multianual cu mester sostene pronostico y planificacion a base di escenario ainda no a keda desaroya, limitando e capacidad di Aruba pa gobernacion cu mira pa futuro.

Un logro notable ta e comienso di un auditoria di data pa estadistica economico. E auditoria aki, lidera pa Bureau Central di Estadistica (CBS) tin como meta pa evalua e disponibilidad, confiabilidad y oportunidad di data necesario pa formulacion di politica economico. Ta spera cu e auditoria ta bay identifica gap y propone medida di modernisacion, cu ta urgentemente necesario pa guia intervencion basa riba evidencia. Sinembargo, resultadonan ta pendiente, y accionnan di siguimento ainda no a cuminsa.

Ambicion ta topa cu bottleneck
 Mehoracion di e clima di negoshi na Aruba ta keda un prioridad top den e agenda di reforma, ya cu peso administrativo halto y marconan regulatorio anticua pa largo ta bareranan pa inversion. Un componente central di e esfuerso aki ta e roadmap Doing Business, cu ta delinea reforma den areanan manera lanta un negoshi, registra propiedad, paga impuesto y obtene permiso.

Durante e periodo di e rapport, Aruba a finalisa un set di evaluacionnan base riba procesonan administrativo actual y barera di negoshi. Esakinan a inclui analisis di bottleneck, estudionan di mocion di tempo, y revisionnan legislativo. Sinembargo, traduci e diagnostico aki den reforma legislativo y procedura simplifica a proba di ta mas dificil. A pesar cu algun reforma piloto a keda proponi – manera digitalisacion di registro di negoshi of simplificacion di entrega di documento di belasting – mayoria ta den etapa preparatorio.

E hopi-anticipa Strategia Nacional pa Desaroyo di Sector Priva tambe a enfrenta atraso. Mientras cu conceptualmente e ta vincula na e nota mas amplio di politica economico, e strategia ainda mester keda prepara formalmente, discuti, of adopta. Sin e marco aki di guia, reforma di clima di negoshi ta core riesgo di ta fragmenta y sin suficiente recurso.

Den e area di infrastructura digital, Aruba a desaroya un plan di maneho pa transformacion digital, cu meta di integra ICT den planificacion economico, entrega di servicio y simplificacion administrativo. E plan a keda completa e semester aki y awo ta pendiente di alocacion di presupuesto y implementacion. Si e keda ehecuta, e por sirbi como un catalista pa reforma mas amplio, pero te cu e periodo reporta, progreso tangible ta limita.

Diversificacion y innovacion
 Diversificacion economico ta otro ambicion central di e plan di reforma economico di Aruba. E dependencia pisa di nos isla riba turismo ta lag’e vulnerable pa shocknan internacional, manera a keda den evidencia durante e pandemia. Den respuesta, gobierno tin como meta stimula crecemento den sectornan manera industria creativo, logistica, agricultura y servicio digital.

Te awo, Aruba a completa scan di sector identificando areanan prometedor pa inversion, specialmente den logistica y agro-tech. E scannan aki a involucra participacion di stakeholder cu negoshi, camara di comercio y expertonan regional. Sinembargo, stapnan concreto di siguimento – manera incentivo, programa di construccion di capacidad, or marco di inversion publico-priva – ainda no a materialisa.

Un stap positivo ta e preparacion di un politica di innovacion y startup. E politica aki ta bay enfoca riba crea un ecosistema di sosten pa entrepreneur, incluyendo acceso na finanzas, mentoria, y regulacion simplifica.
Ministerio di Asunto Economico a cuminsa prepara e politica cu input di incubadornan local y conseheronan internacional, maske entrega formal y aprobacion ainda ta pendiente.

Ademas, Aruba ta explorando oportunidad pa usa fondonan di desaroyo di Union Europeo y na nivel di Reino pa innovacion di sector. Sinembargo, no entrega ningun aplicacion formal of propuesta di proyecto durante periodo den e rapport. Esaki ta refleha limitacion den capacidad administrativo y falta di claridad den e alineacion entre prioridadnan nacional y criterio pa eligibilidad pa fondo.

Coordinacion ministerial
 Un tema recurente den Capitulo 8 di e rapport di implementacion ta e necesidad pa mehoracion institucional y miho coordinacion entre ministerionan. Varios componente di reforma – manera mehoracion na clima di inversion, politica di innovacion y programanan di diversificacion – ta involucra multiple entidad incluyendo Asunto Economico, Finanzas, Planificacion Teritorial, y Departamento di Legislacion. Coordinacion ta keda ad hoc, y mecanismonan di responsabilidad comparti ainda ta deficiente.

Un area di friccion ta e division di responsabilidad tocante procesonan di permiso, unda competencianan cu ta toca mas cu un ministerio y agencia ta causa atraso y guia inconsistente na inversionista. Mientras cu a propone un task force inter-ministerial pa simplifica e procesonan aki, ainda no a keda lansa formalmente.

E Plataforma di Coordinacion di Politica Economico, cu tabata destina pa reuni cada kwartaal pa alinea strategia y cronograma di implementacion, a reuni apenas un solo biaha durante e periodo den e rapport. Como resultado, varios linea di politica – manera e agenda di economia digital y reforma regulatorio – ta progresando den paralel en bes di den sineriga.

Reforma pendiente y riesgo
 Pa fin di september 2025, varios logro a keda pendiente, incluyendo e aprobacion final y lansamento di e Nota di Politica Economico; finalisacion di plan di implementacion; finalisacion di Strategia di Desaroyo di Sector Priva; adopcion formal di plan di transformacion digital; actualisacion di legislacion pa reforma di Doing Business; ehecucion di programanan di diversificacion.

E efecto cumulativo di e atrasonan aki ta riesga un atraso den e recuperacion mas amplio di Aruba y e agenda di reforma. Sin un marco di implementacion coherente y cu recurso, hasta e miho intencion di politica por keda sin genera impacto economico real.

Ademas, un falta di data economico robusto – particularmente metrica di prestacion sectoral real-time – ta continua afectando monitoreo efectivo. Aruba ta keda dependiente riba encuesta periodico y colecta manual di data, cu ta limita agilidad den responde na tendencia economico.

Momento critico pa implementacion
 E trayectoria di reforma economico di Aruba ta mustra cu tin un vision cla y a tuma stap importante pa defini e direccion di maneho. Di prepara un nota di politica economico te e analisis di bottleneck den haci negoshi y oportunidadnan di diversificacion sectoral, e trabao di fundeshi ya ta casi completo. Loke ta necesario awo ta e cambio di planificacion pa implementacion.

Acelera implementacion – specialmente den area di prioridad manera clima di inversion, infrastructura digital y desaroyo di sector – ta bay ta crucial pa logra resiliencia y crecemento sostenible. Haci esaki ta bay rekeri no solo compromiso politico y fondo, pero tambe coordinacion mas fuerte, capacidad administrativo, y herment di data.

Aruba ta para na un punto critico. E componente pa reforma ta disponible, pero ainda mester ehecuta. Cu alineacion strategico, participacion di stakeholder y un enfoke riba ehecucion, e isla por realisa su potencial economico necesario pa consturi un economia mas inclusivo, dinamico y resiliente pa shock.