Dominicanonan na Aruba ta bisa: Accion di protesta contra suspension di eleccion ta apolitico

Pedro Hogando ta un humilde trahado Dominicano cu a dicidi di uni su mes cu otro paisanonan pa lanta nan bos di protesta contra e suspension di eleccion municipal na Republica Dominicana.

E tin mas cu 20 aña residencia na Aruba, pero e ta haya cu apesar cu nan ta bibando den exterior, tambe nan tin derecho pa exigi respet pa nan derechonan como ciudadano Dominicano. Pasobra for di exterior nan ta manda divisa pa nan pais cu ta un di e fuentenan di entrada mas importante pa Republica Dominicana su economia, y tambe pa caha di gobierno por draai.

El a declara cu e accion aki ta un expresion di apoyo total na e pueblo Dominicano. “Akinan nos no ta apoyando niun partido politico,” el a bisa. E tabata un accion civilisa y pacifico pa expresa nan malcontento cu tur loke ta sosode den nan pais di origen.

E ta haya cu e gobierno actual no tin respet y no tin na cuenta e derechonan di e ciudadanonan Dominicano. Pero tampoco e gobierno no tin respet pa nan constitucion. “Nos no por permiti cu e cos aki por sigui sosode,” el a declara na e matutino aki.

Otro manifestante Dominicano tabata Ramon Valdez kende a bisa cu aunke e ta pertenece na un partido politico, e accion di protesta aki no tin nada di haci cu politica.

El declara cu nan plan ta esun di organisa un marcha pa bay reclama dilanti di e consulado Dominicano, ya cu nan ta nan maximo autoridad di nan pais na Aruba. Nan ta bay reclama pa e problemanan actual den nan pais natal, pero tambe e problemanan cu e comunidad Dominicano ta confronta na Aruba. Ya cu e comunidad Dominicano tin cierto problemanan y retonan cu no a haya oido ainda cerca nan.

P’esey nan ta cansa y fada, ya cu si e representantenan di e consulado Dominicano no ta haci nan trabou debidamente, nan lo organisa un accion di firma pa pidi nan retiro. Nan lo pidi pa otro consul bin Aruba, no ta importa for di cual partido e lo por ta miembro. Pero nan kier un persona como consul cu por traha na bienestar di e comunidad Dominicano na Aruba.

Valdez a bisa cu e accion aki ta parti di e team mundial di hendenan jong Dominicano, cu ta bin protesta di un forma sano y pacifico den henter mundo.