Algun dia atras a reporta cu un candela na San Nicolas a destrui un cas por completo, sinembargo a resulta cu e victimanan den e caso aki ta un famia Dominicano, kendenan awo a keda sin hogar.
E famia a perde nan cas diaranson despues cu un candela a destrui nan csa por completo. E residente Emiliano Paredes-Garcia, originalmente for di Republica Dominicana, a perde tur su pertenencianan.
El a declara cu e tabata drumi ora cu huma a lant’e mainta trempan. Na momento di investiga di unda e ta bin, su cas ya caba tabata na candela, lagando e famia sin paña, mueble of shelter.
Un miembro di Parlamento, ken ta conocido di e famia, a presenta na e escena y a yama trahado social pa asisti esnan afecta y na mes momento a apela na comunidad pa yuda e famia, ken ta den necesidad urgente pa paña, cuminda y vivienda temporario entre otro.
Esaki ta marca otro incidente den e ambiente continuo recientemente unda e comunidad Dominicano ta mirando su mes afecta den rango amplio di tragedianan y incidentenan mortal.
Manera nos a menciona den edicionnan anterior di Bon Dia Aruba, e situacion a desaroya di tal manera cu e ta hayando atencion na Republica Dominicana y entre e diaspora Dominicano.
Berdad e situacionnan aki ta algo cu por pasa cualkiera, sinembargo e cadena di coincidencia den poco tempo cuminsando cu e asesinato di Luz Divina Paulina, e hit & run mortal unda Josely Paulina Vasquez Gonzalez y Carlos David Vialez Valerio a perde nan bida, e perdida di Ronal Heredia-Heredia den accidente di trafico y awo e famia aki perdiendo tur su pertenencianan y hogar, ta un fuente di preocupacion amplio y profundo continuo den e comunidad di Dominicanonan tanto aki na Aruba como na Republica Dominicana y e diaspora Dominicano.
