(Infobae) – E presidente di Merca, Donald Trump, a ratifica e ultimatum dirigi na e regimen pa yega na un acuerdo: “Nos tin un plan cu ta preveni cu tur brug den Iran lo ser destrui, y cu tur planta di coriente lo keda fuera di servicio”.

E presidente di Merca, Donald Trump, a adverti dialuna cu henter Iran por ser “saca for di combate” diaranson ora e plazo cu el a impone pa e republica Islamico reapertura e ruta marino clave di e Estrecho di Hormuz caduca.

Mientrastanto, el a ratifica e ultimatum dirigi na e regimen pa yega na un acuerdo: “Nos tin un plan cu ta preveni cu tur brug den Iran lo ser destrui durante anochi, mañan anochi, cu tur planta di coriente lo keda fuera di servicio”. “Y tur esaki lo ser haci den cuatro ora, si nos kier”, el a agrega, referiendo na e deadline cu ta caduca 8:00 p.m. pa Iran acepta su condicionnan.

Durante su aparicion, Donald Trump a detaya e operacion militar cu a ser ehecuta pa rescata dos tripulante di un jet F-15 Mericano cu a ser tira diabierna den teritorio Irani. E presidente a indica Cu mas di 170 aeronave militar Mericano a participa, incluyendo 21 avion pa recupera e prome tripulante y 155 den e di dos mision, loke a permiti saca e copiloto. E aeronavenan a inclui cuatro bombardero, 64 jet, 48 tanker y 13 avion di rescate. Donald Trump a bisa cu dos avion di transporte a keda tranca den santo y mester a ser destrui pa evita cu e tecnologia cay den man Irani.

E director di e Central Intelligence Agency, John Ratcliffe, a splica cu e agencia a ehecuta un “campaña di engaño” pa confundi e autoridadnan Irani, cu tabata desesperadamente buscando e pilotonan cu a cay. John Ratcliffe a informa cu un di e tripulantenan a keda scondi den un sero pa casi 48 ora y a logra evadi captura danki na uso di un sofistica aparato di rastreo.

Donald Trump a bisa cu e copiloto herida a subi e sero mientras e tabata tratando su heridanan y a usa e aparato pa transmiti su locacion na forsanan Mericano, loke a permiti coordina e rescate. E operacion a ser haci bao di fuego enemigo, sin casualidad Mericano, den loke e presidente a describi como un demostracion di “habilidad y precision, letalidad y fortalesa” di e forsanan arma.

Di su parti, e Secretario di Defensa, Pete Hegseth, a anticipa cu e volumen di atakenan Mericano contra Iran lo aumenta diaranson, superando e nivel observa riba e prome dia di e operacion. Donald Trump, acompaña pa asesoranan principal di seguridad nacional, a insisti cu Merca lo laga Iran “sin brug ni planta di coriente” si no yega na un acuerdo prome cu e plazo menciona.

E presidente a expresa cu e ta kere cu Iran ta negociando “di bon fe” pa yega na un acuerdo prome cu e ultimatum caduca. Ora a puntr’e tocante e posibilidad pa e poblacion Irani lanta contra e regimen, Donald Trump a bisa cu “nan mester haci esaki” y el a anuncia cu e consecuencianan lo ta “grandi”. El a agrega cu, segun intercepcionnan, ciudadano Irani lo tabata pidiendo pa mas atakenan contra e gobierno di Teheran.

Tocante e rol di e forsanan Kurdo den e conflicto, Donald Trump a expresa su preferencia pa nan keda al margen. E presidente a subraya cu e decision pa extende e plazo te diaranson a ser tuma pa “ta un bon hende” despues di Pasco Grandi, pero a reitera cu, un bes venci, Iran lo enfrenta “e Edad di Piedra”, referiendo na e destruccion di infrastructura esencial.

E operacion di rescate, cu a dura siete ora cu vuelonan durante dia riba teritorio Irani, a inclui e despliegue di tropanan Mericano bao di fuego enemigo intenso y e extraccion di tropanan den intervalnan di 15 minuut. Donald Trump a subraya cu e prioridad di su administracion ta no laga ningun ciudadano Mericano atras, aunke e operacion a implica riesgonan considerable pa e forsanan envolvi.

E presidente a adverti cu si Iran no habri e Estrecho di Hormuz atrobe prome cu diaranson anochi, ora di Merca, e lo ordena atakenan masivo contra infrastructura clave den e pais, incluyendo brug y plantanan di coriente. Donald Trump a yama e plazo final y a reitera e menasa durante e evento den presencia di prome dama Melania Trump: “E pais henter por ser venci den un anochi so, y e anochi ey por ta mañan”.

Media estatal Irani a reporta cu Teheran a rechasa e propuesta, yamando esaki un iniciativa Mericano. A indica cu varios nacion ta buscando un solucion diplomatico despues di 38 dia di conflicto, causa pa atakenan di Israel y Merca contra teritorio Irani. Iran a responde cu lansamento di misilnan y dronenan riba diferente blanco den e Medio Oriente.

Donald Trump a reitera cu, si a keda na dje, lo e tuma control di e petroleo Irani, aunke el a admiti cu opinion publico Mericano ta prefera pa termina e guera. “Mi lo keda cu e petroleo y traha hopi placa”, el a declara.

Donald Trump a endurece su posicion sigurando cu si Iran no cumpli cu e reapertura di e Estrecho di Hormuz, “nan no lo tin brug, nan no lo tin planta di coriente, nan no lo tin nada”. E presidente a agrega cu tin “otro cosnan pio” cu e no a detaya dilanti di prensa. E menasanan aki a ser agrega na publicacionnan reciente riba red social, unda Donald Trump a anuncia atakenan riba infrastructura civil Irani y despues a pospone e deadline pa un dia.

E presidente di Merca a describi esnan cu ta opone e guera cu Iran como “estupido”, argumentando cu e unico obhetivo di e conflicto ta evita pa e pais ey obtene armamento nuclear. “Guera ta pa un cos so. Pa Iran no por tin un arma nuclear”, e presidente a conclui.

E desaroyo di e conflicto y e menasanan for di Washington, D.C. ta mantene tension den e region, mientras esfuerso diplomatico pa yega na un solucion negocia ta sigui.