(Infobae) – Declaracion di presidente Mericano ta bini despues di bombardeonan reciente di Israel riba regimen Irani na Teheran y ofensiva na Beirut contra grupo terorista Hezbollah.

Na inicio di e cuarto dia di conflicto na Medio Oriente, presidente di Merca, Donald Trump, a declara cu su pais tin un “suministro sin limite” di arma y cu reserva di municion nunca no tabata mas halto.

“Reserva di municion di Merca, den rango medio y medio-halto, nunca no tabata mas halto ni miho. Segun mi a ser informa, nos tin practicamente un suministro sin limite di e arma nan aki,” presidente Republicano a declara.

“Guera por ser pelea pa semper — y exitosamente — usando solamente e suministro nan aki (cu ta miho cu e miho arma di otro pais!)”, Trump a agrega riba red social Truth Social. Presidente a indica cu e reserva di arma “na nivel mas halto” ainda no ta loke el lo kier y a culpa su antecesor, Joe Biden, alegando cu nan a ser entrega gratuitamente na Volodímir Zelenski pa Ucrania.

“Sleepy Joe a pasa tur su tempo y placa di nos pais regalando tur cos na Zelenski di Ucrania cu balor di cien miyonnan di dollar. Y aunke el a aregla hopi di e arma halto (gratis), e no a preocupa pa reemplasa nan,” Trump a cuestiona.

Trump a afirma cu el a “reconstruí” ehercito durante su prome mandato y cu ta sigui fortaleciendo esaki. “Merca ta bon abasteci y cla pa gana, grandi,” el a conclui.

Dialuna, presidente a señala cu operacion “Epic Fury” contra Iran por intensifica den proximo dianan y extende mas aya di loke tabata plania, sin exclui un escalada militar mas grandi. “Nos ni sikiera no a cuminsa dal nan duro. E gran ola ainda no a pasa. E cos grandi ta bini pronto,” el a declara.

Trump a reitera cu Merca ta “elimina” e pais Persa y cu campaña por dura mas cu cuatro o cinco siman inicialmente plania. “Mi semper a pensa cu lo dura cuatro siman. Awor nos ta un tiki mas avansa, pero nos tin capacidad pa bay mucho mas leu di esaki,” el a indica.

Pa otro banda, e presidente a insisti cu e cadena di mando na Iran ta incierto despues di morto di lider supremo, Ali Khamenei, ken el a elimina den un atake dirigi. “Nan mes no sa ken ta lidera nan awor. Nos a elimina 49 di nan lidernan. Nos no sa ken ta na mando,” el a declara.

Cas Blanco tabata spera un postura mas pasivo for di paisnan manera Bahrain, Jordan, Kuwait, Qatar y Emiratos Arabe Unidos. Sin embargo, tur a bira blanco di atake Irani y a responde activamente, involucrando nan mes mas cu loke tabata anticipa. “Nos a bisa nan: ‘Nos lo cuida di esaki’, y awor nan kier pelea. Awor nan ta insisti riba involucra nan mes,” el a relata.

Riba proximo fase di operacion, Trump no a exclui despliegue di tropa terrestre si ta necesario, aunke el a priminti evita un guera nobo na exterior. “Mi no tin problema manda tropa si ta necesario,” el a declara na New York Post, aunke a clarifica cu, pa awor, ofensiva ta basa riba bombardeo aereo y misil.

Secretario di Defensa, Pete Hegseth, a sostene e posicion: “Nos no lo drenta den ehercicio di bisa kico nos lo o no lo haci. Nos lo bay te unda ta necesario.” Segun Pentagon, diferente di Irak y Afganistan, no lo tin ningun mision di “nation-building” ni regla restrictivo di enfrentamento.

E declaracionnan aki ta bini despues di escalada di guera cu a cuminsa diasabra cu bombardeonan di Merca y Israel riba regimen Irani, cu segun reportenan a causa morto di lider supremo Irani, Ayatollah Ali Khamenei.

Respuesta di Iran tabata un serie di atake contra Israel y base militar Mericano na Kuwait, Bahrain, Qatar, Arabia Saudita y Emiratos Arabe Uni. Por lo menos seis soldaat Mericano a muri desde inicio di operacion contra Iran. Awe mainta, embahada di Merca na Riyadh, Arabia Saudita, a ser ataca door di drone, sin reportenan di victima te awor.