(AFP) – 2 piloto a perde nan bida y decenas di persona a keda herida despues cu avion di Air Canada a accidenta cu truck di bombero riba pista na New York su aeropuerto LaGuardia, autoridadnan Mericano a bisa dialuna.
E accidente diadomingo a para vuelo na LaGuardia, un punto di transporte grandi, mientras imagennan di AFP ta mostra e cu e jet Bombardier a bay patras cu un cockpit machuca band di e vehiculo di emergencia.
Pa 2or di atardi dialuna, e aeropuerto a bisa cu el a bolbe habri pero a informa e pasaheronan pa anticipa atraso of te hasta cancelacionnan.
Investigadornan di aviacion Mericano, cu asistencia di coleganan Canades, a habri un investigacion tocante loke ta parce LaGuardia su prome accidente fatal desde 1992.
Un grabacion di audio di e toren di trafico aereo a mustra cu un controlador a duna permiso na e truck, cual tabata respondiendo na un incidente separa, pa crusa e pista prome cu urgentemente a ordena esaki pa para. “Stop, truck un, stop!” e controlador a bisa momentonan prome cu e accidente. Despues por a scucha un alarma.
E piloto y co-piloto a perde nan ida, Kathryn Garcia, hefe di e ciudad su autoridad a bisa na un conferencia di prensa.
41 persona mester a bay hospital, “algun cu herida serio,” aunke 32 di nan por a bay cas mas adelante segun Garcia.
E avion tabata opera pa Jazz Aviation, un partner regional di Air Canada, cual a bisa cu e aeronave a bula bay LaGuardia for di Montreal como vuelo 8646. Un pasahero preliminar su lista a demostra 76 persona a bordo di e vuelo, incluyendo 4 miembro den tripulacion segun Jazz Aviation a bisa den un declaracion.
E plataforma cu ta monitor vuelo, FlightRadar24, a bisa cu e avion “tabata bayendo riba e pista ora cu el a accidente” e vehiculo di rescate ora cu esaki a drenta su caminda.
Jack Cabot, un pasahero riba e vuelo, a recorda un escena caotico ora cu e avion a “inmediatamente dal algo” ora cu el a aterisa. “Tur hende tabata baha, nos no tabatin ningun ordo pa motibo cu e cabina di piloto tabata destrui,” el a conta media di Merca. “Pues un hende a bisa ‘ban pa e salida di emergencia, habri e orta y ban nos tur sali’ y esey ta exactamente loke nos a haci.”
New York su autoridad di maneho di emergencia a adverti pa pasaheronan “anticipa cancelacion, ceramento di caya, atraso den trafico y personal di emergencia,” y usa rutanan alternativo cerca di e aeropuerto.
Reporteronan di AFP a mira pasaheronan na LaGuardia ta drumi na un terminal ora cu centenares di vuelo a keda cancela.
Presidente Mericano Donald Trump a describi e accidente como “terible,” bisando reporteronan cu “nan a comete un eror. E ta un trabao peligroso.”
Secretario di Transporte Sean Duffy a bisa cu e ta bayendo LaGuardia den respuesta na e “accidente hororoso.”
El a comparti un potret di e escena riba rednan social cu ta mustra e cockpit di e avion cu servicionan di emergencia ta rondona esaki. Prome Minister di Canada Mark Carney a bisa cu e accidente fatal ta “profundamente lamentable.”
“Oficialnan di Canada ta trahando di cerca cu nan coleganan Mericano na e sitio mientras e investigacion ta sigui. Mi pensamentonan ta cu e victimanan, nan famia y tur esnan impacta,” el a publica riba X.
Localisa na Queens, LaGuardia ta e tercer aeropuerto mas druk na New York, cu 33,5 miyon pasahero den 2024, segun e cifranan di e autoridad encarga.
El a completa un redesaroyo di 8 biyon dollar den 2024, actualisando su infrastructura cu terminalnan y pistanan nobo.
Accidentenan mortal aereo na Merca den añanan reciente ta inclui un accidente entre un jet di pasahero y un helicopter di ehercito cerca di Washington den januari di 2025 cu a laga 67 persona fayeci.
