Durante un conferencia di prensa ayera mainta, DOW Aruba (Dienst Openbare Werken) a anuncia cu dialuna 25 di juli ta bay cera e caminda di e brug di Green Corridor pa mantencion. Director di DWO, Sr. Marlon Maduro, hunto cu representantenan di Arubus y CIC (Caribbean Infrastructure Company) a brinda informacion ariba e trabaonan cu ta bay realisa.

Croes a indica cu e trabaonan di mantencion ta relativamente grandi y segun e contract, e trabaonan di mantencion ta responsabilidad di e contratista pa e duracion di e contract vigente. Mantencion di e brug ta algo rutinario cu mester tuma luga y esaki ta prome biaha cu e ta bay tuma luga den e forma extenso aki.

Pa haci e trabao aki, Croes a remarca, tin diferente reto cu mester bay enfrenta. El a splica cu nan a sinta cu tur e stakeholders, cu ta DTI, KPA, Arubus, Brandweer y Ambulance pasobra pa e trabaonan di mantencion aki por tuma luga, mester cera e brug completo.

E solucion cu nan a scoge, Croes a sigura, ta bay mitiga e riesgonan pa e trahadonan y mitiga e riesgonan pa trafico cu ta haci uso di e brug. Pa Gobierno di Aruba y DOW e meta tabata pa tur e mantencionnan grandi aki, pa cual mester cera caretera, tuma luga den vakantie grandi pa evita cu ta molestia e trafico severamente.

E trabaonan di mantencion ta bay cuminsa dia 25 di juli, dialuna binidero, for di 9or di mainta pa 7or di anochi, durante cual ta bay cera e caretera for di e rotonde di Kibaima, e rotonde Drive-In, te cu e rotonde di Pos Chikito. E mantencion ta bay ta na e top di e brug unda ta bay haci trabaonan di sandblast, kita frusto y verf e brug. “Esakinan ta mantencionnan preventivo pa evita cu e ta empeora”, Croes a indica.

Pa loke ta desviacion di trafico, el a splica cu ta bay haci uso di e brug bieu, conoci como e brug di TeleAruba y tambe trafico di San Nicolas pa Santa Cruz, y vice versa, por haci uso di Mondi Fierno, Franse Pas

Entre di 7or di anochi y 9or di mainta ta bay habri e brug parcialmente, ya cu e ekiponan pisa ta bay keda riba e brug y e dos caminda mas pafo di e brug ta bay keda accesibel pa trafico core normal durante e oranan aki.

Segun Croes ta indica, e trabaonan ta bay dura dos siman y manera menciona anteriormente e trabaonan aki ta rutinario. Croes a remarca tambe cu e trabaonan di mantencion manera esaki ta bay tuma luga cada cinco aña. El a splica cu e prome fase ta tuma luga e aña aki unda ta bay concentra ariba e parti top di e brug y otro aña ta bay ta e pianan, y cada cinco aña ta bay realisa e trabaonan aki.

E director di DOW a menciona tambe cu nan a yega na un areglo cu servicionan di emergencia, KPA, Brandweer y Ambulance cu si acaso nan mester haci uso di e brug, ta bay tin comunicacion estrecho cu e contratista pa nan por duna acceso y haci uso di e brug na momento cu trabao ta tumando luga.

Sannin Daou, vocero di Arubus, a informa comunidad y tur persona cu ta haci uso di e servicionan di Arubus cu nan ruta ta bay desvia. Na e rotonde di Pos Chikito ta bay pasa e caminda parti paden y ta bay sali back na e rotonde di Drive-In y sigui e ruta normal. E cambionan aki ta specificamente pa e busnan di liña 1, 2 y 3 cu ta core entre San Nicolas y Oranjestad.

El a remarca cu na momento cu e brug habri back, for di 7or di anochi en adelante e busnan ta bay core ruta normal cu ta pasa ariba e brug grandi atrobe. El a enfatisa cu tur persona cu ta usa e servicio di bus mester tene cuenta cu e cambio di ruta y na unda mester subi bus.

Daou a haci un yamado na demas automobilistanan, vooral chauffeurnan di truck y di bus, pa ta mas cauteloso na e brug chikito, mirando cu e peliger mas grandi ta na e brug chikito ya cu e bista ta un tiki dificil y no tin bista directo riba e brug

“Nos a compronde cu ta bay tin hendenan eynan cu ta bay indica ken tin preferencia. Dus e ora di nos banda nos kier pone mas atencion riba e parti di seguridad pa tur automobilista, chauffeurnan di truck, tene na cuenta cu ta bay tin hende para eynan cu ta indica ken tin preferencia pa evita cu ta bay por tin cualkier accidente”, el a agrega.

Lysander Wernet, coordinador di e proyecto y representante di CIC, a splica cu di nan banda nan ta bay tin nan propio personal disponibel pa yuda dirigi trafico den coordinacion cu KPA. Ya caba nan a yega na cierto acuerdonan pa dirigi e trafico ora ta necesario, vooral na e brug alternativo, e brug di Telearuba.

Wernet a indica cu e idea inicial tabata pa cera e brug parcialmente, pero si haci esaki, e oranan pa traha tambe ta bay ta mas limita y trabaonan di ehecucion ta bay tarda mas o menos cuater siman. Pero mirando cu nan ta bay haci ciere completo pa tema di seguridad, e contratista hunto cu nan a yega na un acuerdo pa logra haci e trabaonan den dos siman.

El a remarca cu e brug ta den bon condicion y e trabaonan ta tuma luga pasobra simplemente un brug di structura metalico mester un mantencion preventivo cada tanto tempo, cual segun e plan estableci, ta bay ta cada cinco aña.

Wernet a haci peticion na comunidad pa por fabor tene comprension mientras cu e trabaonan necesario ta tuma luga. “Nos ta pidi comunidad comprension pasobra e trabaonan aki ta esencial pa e parti di durabilidad di e brug. E ta un corto tempo, dos siman, nos ta haci todo posibel pa logra keda cla cu e trabao den dos siman”, el a comenta.

LEAVE A REPLY

Please enter your comment!
Please enter your name here