E siman aki Sr. Daryl Lue, hoofdbeheer di infrastructura na Dienst Openbare Werken (DOW) a tene un conferencia di prensa pa divulga detayenan tocante e preparacionnan cu e instancia tin pa loke ta drechamento di caminda y otro facilidadnan di trafico pa 2026.

E conferencia aki, publica pa otro medio noticiero riba Facebook, a bin despues di un temporada di yobida fuerte fin di 2025 cu a trece dañonan na varios caretera na Aruba, lagando hopi den comunidad disgusta atrobe cu e falta di mehoracion structural.

Sr. Lue a enfatisa cu actualmente DOW ta haciendo analisis di e careteranan riba e isla y ta inventarisando tur detaye importante den un proyecto nobo pa yuda nan mehora caminda y otro facilidadnan di trafico. Segun e ta splica, a constata fin di 2025 cu yobida en berdad ta habri caminda hopi mas lihe. El a sigui splica cu aña pasa DOW a enfrenta un impasse cu compania di produci asfalt y pues no por a atende cu tur e casonan surgiendo riba nos careteranan.

Sinembargo a subraya cu pa 2026, lo sinta atrobe cu e compania pa mehora nan acercamento. Es mas, Leu a anuncia cu pa e aña nobo aki, DOW lo ta trahando cu dos compania di produccion di asfalt pa asina por garantisa produccion di asfalt consistente.

Cu e pasonan aki, hunto cu analisis di e caretera, e instancia lo investiga cua caminda ta den estado mas critico pa conseha ministerionan con pa anda den 2026.

Pa loke ta e proyecto di inventarisacion, a divulga cu te awo a registra tur borchi di trafico, verkeersplateau y palo di luznan, entre otro. Conhuntamente cu Dienst Technisch inspecties (DTI), lo investiga con pa traha lo mas eficiente posible y yena buraconan den loke ta maneho di infrastructura di trafico, Lue ta splica.

A pesar di declaracionnan prometedor, varios ciudadano den comentario a mustra un duda den e instancia, recordando cu pueblo tin añas ta urgiendo pa drecha camindanan den hopi mal estado sin mira mehoracionnan duradero.

Aña pasa, DOW a anuncia cu pa 2025 e instancia a mira un aumento significante den nan presupuesto—di 2,5 miyon florin pa 18 miyon florin. E tempo ey a splica cu e aumento di presupuesto pa e suma aki lo crea mas espacio pa DOW aborda partinan mas deteriora. Tambe a subraya cu pa por ‘haal in’ mantencion di careteranan den deterioro, e instancia lo mester sigui haya e 18 miyon florin pa un periodo di 25 aña consecutivo, insinuando cu falta di mantencion lo ta principalmente debi na un falta di fondo adecua durante e ultimo añanan.

Pa 2026, gobierno a aproba un presupuesto nobo, pero no ta cla kico ta e suma exacto pa DOW.