Diahuebs anochi Departamento di Progreso Laboral (DPL) a tene un charla na Centro di Bario Noord tocante e tema di entrevista laboral. Durante e anochi informativo aki, vocero Richenel Stamper a profundisa riba algun puntonan importante, incluyendo con e proceso di solicitante pa trabao ta traha, algun tips pa tene na cuenta cune y con DPL por yuda esnan buscando empleo.
E Departamento di Progreso Laboral ta un departamento gubernamental cu ta cay bao di ministerio di Labor y tin como meta principal pa yuda buscador y dunadornan di trabao local pa yega mas cerca di otro riba nos mercado laboral. Vocero y empleado di HR, Richenel Stamper a conta cu DPL sa haci charla specialmente na scolnan, preparando studiantenan pa e mercado laboral despues di nan estudio. Stamper a enfatisa cu a nota cu hopi hende no sa of no ta tene na cuenta suficientemente cu algun aspecto importante den e proceso di solicitante di trabao, pues e charlanan aki ta crea un oportunidad valioso unda pueblo por probecha di dje.
Stamper a menciona cu DPL ta diferencia for di otro agencianan laboral pasobra e ta actua como un ‘stepping stone’ pa hende busca trabao, en bes di actua como contratista. A splica cu personanan por acerca nan gratuitamente pa ta registra den nan sistema, y un bes cu nan haya trabao, e personanan aki no ta den servicio di DPL mas y por traha independientemente.
Proceso di solicitud
Naturalmente, e proceso di solicitante pa trabao ta varia entre sector y algun vacatura por rekeri menos of mas stap di parti e solicitante pa por ser considera un candidato. Sinembargo, Stamper a subraya cu awendia e proceso ta mustra un poco diferente cu antes. Esaki ta pa varios motibo; banda di e hecho cu mundo ta bayendo mas den un direccion digital, awendia mayoria vacatura ta encera un proceso di solicitante mas largo, den cual solicitantenan por anticipa al menos dos ronda di entrevista pa por yega na remarke.
A splica cu e proceso di solicitud ta encera varios etapa. Prome ta bin e entrega di documentonan, incluyendo CV y carta di motivacion, entre otro. Despues HR di compania lo analisa e documentonan aki, selecta candidatonan a base di cualificacionnan tecnico, entrevista e candidatonan aki y pa ultimo scoge e mihor candidato(nan).
Stamper a splica cu e meta di un entrevista ta pa e solicitante convence e dunador di trabao pakico nan ta e miho candidato. Di e dunador su banda, esaki ta un momento unda lo “screen” e solicitante su personalidad. Den otro palabra, e entrevista ta actua mas como un “kennismaking” entre e dunador di trabao y solicitante.
Manera a splica, prome cu tuma parti di un entrevista, ya e dunador di trabao a haya y a analisa e “hard skills” di e solicitante riba papel caba. Cu hard skills Stamper ta menciona e habilidadnan tecnico pa por cumpli cu un trabao, por ehempel e conocemento cu lo haci e solicitante tecnicamente adecua pa e trabao. Stamper a splica cu loke lo mester resalta mas durante un entrevista ta e solicitante su “soft skills” of “people skills”, manera Stamper ta yam’e. Al contrario cu hard skills, soft skills ta encera e personalidad y actitud di e solicitante. A enfatisa cu dunadornan di trabao no ta recluta solamente a base di habilidad tecnico (aunke esaki sigur ta hunga un rol importante) sino (mayormente) a base di e actitud di e solicitante. Hard skills ta algo cu semper por siña mas despues. Stamper a splica cu den 2025, tin algun soft skills cu dunadornan ta enfoca mas riba dje, entre otro:
- Gusta colabora cu otronan
- Keda calmo den conflicto
- Customer service (sirbi/asisti cliente)
- Dispuesto pa adapta
- Tin empatia pa otro
- Ta creativo cu ideanan nobo
- Por maneha tempo bon
Banda di esey, Stamper ta menciona cu otro puntonan importante tambe ta ser considera, manera comportamento den pasado y experencia cu e solicitante a recauda pa por cumpli cu a trabao. Pa esaki, a duna e conseho pa pidi un carta di referencia for di e compania unda a traha prome. De hecho, Stamper a enfatisa cu esaki ta un derecho cu tur trahador tin. Esaki por ta specialmente beneficioso pa personanan cu historia di comportacion menos deseable, unda e carta por yuda convence e dunador cu e solicitante en berdad ta adecua pa e trabao, a pesar di tin un pasado scur. Stamper a splica cu como parti di su servicionan pa yuda hende haya trabao, DPL tambe por actua como un mediador pa yuda e personanan aki haya un oportunidad pa empleo.
Algun tips pa prepara bo mes
Durante e charla, a menciona algun tips cu hende por usa pa prepara nan mes pa un entrevista. Pa prome, mester tuma tempo di antemano pa busca informacion tocante e compania y kisas hasta e vacatura. A enfatisa cu por haci esaki via Google of rednan social di e compania, pa asina por ta bon prepara pa preguntanan. Banda di esaki tambe ta importante pa tene na cuenta riba e rekisitonan di e vacatura y enfoca mas riba nan y riba bo mes durante e entrevista. E ultimo parti ta crucial, Stamper a splica, pasobra si cuminsa papia di otro tema cu no ta relevante pa e entrevista, por core e riesgo di ofende of revela algo cu lo por haci bo menos atractivo pa e candidatura.
Otro parti di e preparacion ta pa prepara pa contesta preguntanan strategico di e dunador di trabao, specialmente e tres preguntanan aki:
- Por conta un tiki di bo mes?
- Menciona 3 palabra pa describi bo mes
- Menciona un punto menos positivo di bo mes
Stamper a splica cu e tres preguntanan aki por zona simple, pero cu hopi hende sa cay den e trampa di contesta inadecuadamente.
Stamper ta splica cu mester enfoca riba bo bida profesional, pues conta un tiki di bo experencia, conocemento y kisas algun momento cu a resalta den bo otro trabaonan. Pa loke ta algun palabra pa describi bo mes, e mesun principio ta keda. Sinembargo, mester considera di ki manera e palabranan aki ta remarcable. Es decir, si bo menciona cu bo ta creativo, den ki manera bo a mustra creatividad den bo trabao. Esaki ta e tipo di informacion cu e dunador di trabao ta interesa den dje. Si puntra pa menciona algun punto menos negativo di bo mes, Stamper a splica cu ta importante pa no solamente menciona esaki, pero tambe splica den ki manera ta mehorando of atendiendo cu esakinan. Por ehempel, si bo menciona cu bo sa yega laat, kisas menciona algun medida cu bo ta tumando pa preveni esaki, manera sali na tempo, planea bo dia pa yega trabao trempan of tuma bus mas trempan. Esaki ta mustra cu bo ta dispuesto pa mehora bo mes, cual ta un aspecto atractivo pa e dunador di trabao. Ta prepara tambe pa puntra algun pregunta di bo mes, por ehempel tocante e organisacion, posibilidad di crece den e compania, reglanan di compania, y expectativanan di e dunador. Esaki atrobe ta mustra interes den e vacatura.
Actitud y aparencia tambe ta hunga un rol den un entrevista exitoso. Con bo ta comunica durante e entrevista ta hopi importante, y por laga un impresion positivo of negativo. Stamper a splica cu pa prome, ta importante pa mustra gratitud pa e oportunidad cu bo a haya. Tambe mester scucha atentamente y tene na cuenta cu bo lenguahe corporal (body language), ya cu segun e vocero, e ta conta pa 55% di con bo ta comunica. Tambe mester ta alegre y mustra animo y interes, y tene cuidou pa no desvia di e combersacion.
Pa loke ta vestuario, Stamper a splica cu esaki tambe ta hunga un rol importante, specialmente den companianan cu tin un politica estricto tocante aparencia. Aunke tattoo y renchi no ta ser considera inadecua mas, otro cosnan manera uso di demasiado color, acesorio, make up, cabey y paña si ta algun punto cu e dunador di trabao lo evalua. Pues ta importante pa tin un aparencia nechi y simple—un carson y camisa nechi, sapato nechi, cabey peña y estilo di cabey adecua pa e funcion. Tambe a conseha pa evita bisti paña cu mensahe of texto riba nan.
Tur e aspectonan aki den e proceso di busca trabao ta puntonan cu DPL ta atende cune hunto cu nan cliente. Ademas, DPL por yuda cu creacion di CV, email, y otro cosnan cu e cliente lo tin mester di dje pa por tin mas chance pa haya empleo.
E charla aki ta un di varios cu a tuma luga na Centro di Bario Noord. E organisacion comunitario tin tempo ta organisa diferente charla gratis pa comunidad, cu e meta pa crea oportunidadnan pa hende por eleva nan mes.
