drs. Mervin Wyatt-Ras (AVP): Introduccion di lista positivo di medicina y aumento di BBO (7%) ta preocupante

Drs. Mervin Wyatt-Ras ta trece padilanti di ta preocupa y desapunta cu gobierno toch entrante prome di october 2022 ta introduci austerisacion di e lista positivo di medicinanan cu pashentnan tin derecho ariba dje den e pakete di AZV. Aki ciudadanonan tin cu bay paga pa cierto medicamento.

Ya caba na aña 2021 gobierno kier a introduci cortamento den e lista positivo, pero a trek e in dor di reaccion di nos pueblo y tabata net prome cu eleccion. Y awor ta bolbe introducie a base di un landsbesluit fecha dia 17 di mei 2022. Den e landsbesluit tin describi tambe e medida di eigenbijdrage cu por lo pronto no a ser introduci.

E austerisacion di e lista positivo aki ta encera cu diferente medicina lo no bay cay mas bou di e pakete cu ta ser cubri pa AZV. Remedinan manera Valium, Diazepam, Omeprazol lo por haya via di AZV ora tin permiso pa esaki. Pa loke ta trata Dika, Paracetamol y Hoestdrank lo haya nan via counter y tin cu bay paga pa nan.

Tin otro medicinanan cu ta ser menciona den e lista di austerisacion cu ta medicina pa hala rosea, medicina dermatologico of pa cuero, medicina pa adernan, medicina pa stoma y pa metabolismo, laxante, medicina pa tripa y stoma, medicina pa zuur, medicina pa controla musculonan, medicina hormonal-urina, medicina pa nervio, anti-epileptico, psycho-epileptico y remedi pa wowo.

Tin hopi medicina pues cu no ta cay bao di e pakete mas y esaki ta medida cu ta dal nos pueblo duro. Paso nos hendenan ya no tin placa pa paga locual ta nan necesidadnan basico, cuminda, pago di huur, awa, coriente, auto, scol pa nan yiunan tur e debenan cu nan tin y toch gobierno ta scoge pa introduci e medidanan aki. Ya caba AZV ta urgi tur hende pa pone placa un banda pa paga pa medicina, pero no por pluma galiña sin pluma. E consecuencia ta cu pashentnan lo no bay cumpra e medicinanan aki y nan salud lo empeora y deteriora dor di cual toch lo keda cu gastonan halto di salubridad of lo aumenta esakinan. Tambe pashentnan lo bira dependiente di decision pa por haya vrijstelling pa no paga locual por conduci na mas vriendjes politiek y nepotismo.

Banda di e medida den cuido Parlamentario, drs. Mervin Wyatt-Ras, a tuma nota di presentacion di minister Xiomara Maduro encuanto di aumento di BBO na 7%. Esaki despues cu e gobierno aki a uza profesionalnan pa haci e trabou di informa esnan envolvi encuanto di BTW y na momento cu gobierno a mira cu BTW no ta cumbini nan, Xiomara Maduro a bay sconde pa Evelyn bin bisa pueblo cu BTW no ta bay dor sino ta bay hisa BBO cu 1%. Awor cu tur cos a calma minister Maduro ta bolbe subi tarima di finanzas pa bin sigui gaña pueblo. Paso ta tur a pega cu malesa di gaña di Evelyn. Minister Maduro ta haci comosifuera BBO ta algo positivo pa pueblo di Aruba y ta bay den shirishiri di pasado pa hustifica dicon BBO ta bon. Esaki mientras un par di siman pasa el a haci esaki pa BTW.

Parlamentario Wyatt-Ras ta expresa su disgusto y lamento pa loke ta trata aumento di BBO te na 7% cu na su turno lo hisa tur prijs y lo haci esnan cu ya no tin placa den nan cartera lo bira mas pober ainda. Esaki despues cu ta cortando den lista positivo di medicina, es decir cu ciudadanonan tin cu paga ora nan busca remedi, locual lo baha calidad di nos salud paso esnan cu no por paga lo no bay dokter mas y lo trece cune cuido di clase.

Loke e gobierno intransparente kier haci tambe ta no haci distincion entre e diferente destinacion, p.e. no lo por verifica mas si BAZV lo ta bay pa AZV. Un djis nos lo haya nos mes atrobe cu tin deficit grandi den AZV a pesar cu ta saca 60 miyon for di stakeholders pasobra e control no ta bay t’ey mas, p.e. pa medio di recibonan.

Gobierno riba dia mundial di nos grandinan a gaba cu lo aumenta e reparatietoeslag cu 45 florin. Loke e no ta bisa ta cu dor di aumento di BBO, productonan lo bira mas caro y cu nos grandinan lo mester paga pa nan medicina. Kiermen e 45 florin aki lo no yega pa paga net nada. Pa completa obra despues di 5 aña ta bay lanta un departamento di Ouderenzorg sin menciona cu e departamento aki a ser lanta dor di e ley di ouderenzorg cual ta un proyecto di AVP pa asina tin mas control riba cuido di nos grandinan y garantisa calidad di e cuido aki. Por cierto por menciona cu partido MEP e tempo ey a vota contra di e ley di ouderenzorg locual ta un crimen. Ta p’esey Dangui Oduber no por a lanta e departamento aki y e mester a pasa ouderenzorg pa un otro minister paso e no tin cara pa lanta tal departamento despues cu e tabata contra di un ley cu ta reglamenta cuido di nos hendenan di edad.

Awor Wyatt-Ras ta desapunta di minister Arends cu ta bay den mesun trend di Dangui y Evelyn y ni ta menciona cu ta continuacion di e ley. Wyatt-Ras ta haya e momento cu nos pais ta pasando den duro inapropia pa lanta departamentonan pero ya cu ta dicidi esaki tin cu menciona di unda e ta bin. Paso e no a cay for di shelo. Mescos por bisa tambe di e proyecto di oncologia na San Nicolas cu no ta un proyecto cu a bin di AVP sino a inicia desde gabinete Eman 1, cu a busca contracto cu Baptist di Florida pa haya acreditacion pa asina por traha hunto y a lo largo desaroya turismo medico.

Ta tuma medida den nos hendenan sinembargo di otro banda practicanan priva ta lanta. Por a tuma nota di minister Dangui Oduber ta felicita esnan cu ta bin cu practicanan priva pa nos pueblo paga pa servicio medico. Aki dunando sosten na klassezorg. Esta cuido di clase.

Gobierno pues no tin un vision dirigi pa cu cuido of tin un vision oportunista.

Hecho ta cu Evelyn Wever-Croes a palabra cu Hulanda cu lo mester bay corta den cuido y awor mester cumpli paso tin un Aanwijzing ariba mesa. Gobernantenan mester sinta analisa prome cu nan bin cu medidanan si no tin alternativanan cu lo afecta nos ciudadanonan menos.

Aki Wyatt-Ras ta menciona compra di medicina hunto y central na tarifanan mas abou, mehora e proceso di manda pashentnan Colombia y di menos duracion, mehoracion di cooperacion entre instancianan y profesionalnan cu ta duna cuido, inversion den prevencion y amplia eerstelijnszorg. Tambe desaroyo di turismo medico ta un opcion cu lo mester wordo explora. Desde Gabinete Eman I a explora a posibilidad di cooperacion cu Baptist Health na Florida pa acredita IMSAN pa asina por atende pashentnan di exterior, tambe for di paisnan di Reino den region. Awor e minister di salubridad ta bay corta sinta y ta bati bel na IMSAN pero no ta splica ta con a yega na esey.

Gobierno no ta corta den su propio gastonan di luho pero si ta keda hinca man den cartera di nos ciudadanonan. Esey ta inaceptabel segun Wyatt-Ras y nos ta spera cu gobierno ta realisa ki daño e ta haci na nos hendenan y ta spera e scoge alternativanan adecuado pa bin cu recortenan na un manera responsabel.