Durante conferencia di prensa di fraccion di AVP, parlamentario, drs. Mervin Wyatt-Ras a trece padilanti su preocupacion y di sector di cuido pa loke ta trata e eigenbijdrage cu gobierno kier introduci desde 1 di april binidero. Stakeholders tin cu bay cobra pashent.

Esaki sin cu a consulta cu nan. Wyatt-Ras y su coleganan a base di un carta publica di stakeholders di cuido di dia 11 di februari 2022, ta cuestionando gobierno.

E pashent lo mester paga eigen bijdrage na Spoedeisende Hulp y Huisartsen Post di 15 florin, na specialista: 5 florin, botica pa cada remedi riba receta: 2 florin y laboratorio pa cada test :1 florin.

E cobramento aki lo trece problema no solamente pa e pashent sino pa e dunado di cuido tambe.

Pa e dunado di cuido por cobra ta necesario trahadonan encarga cu administracion di eigenbijdrage y controle di esaki, sistema di cashier y machine di swipe. Den caso algo no bay bon por hasta conduci na fraude, loke ta sosodiendo caba na DVG. Esunnan cu ta cobra turistanan pa PCR-test a horta placa y tambe tin e fraude cu vacunanan.

Di parti di e pashent cu no tin placa pa paga un eigenbijdrage, lo no haci cierto testnan di lab, no lo tuma of paga cierto medicina y lo por bay nenga di bay specialista, locual lo tin su consecuencianan negativo.

Aki ta di importancia pa gobierno por indica con ta haci cu esunnan cu no por paga medicina of pa cuido. Consecuencianan a lo ta grandi pa salud di e pashent y a lo largo lo haci gastonan di cuido mas halto. Alabes lo keda introduci, segun stakeholders, division den cuido y e asina yama cuido di clase, unda cu friends and family por haya prioridad riba esunnan cu tin derecho. Aki nepotismo lo sigui desaroya, segun Wyatt-Ras.

Gobierno no a papia nada di e vangnet cu nan a priminti. Den caso e vangnet ta manera FASE cu tabata un farce, esaki lo traha averechts riba e pashent. Paso esunnan cu kizas net no ta cai bou di e criteria indica pa haya un sosten lo mester bay paga y kizas nan lo skohe pa no haci uso di cuido. Tambe e vangnet por yuda friends and family enbes di yuda esunnan cu netamente tin mester di e yudansa aki.

Anja pasa caba gobierno a tuma medida di baha e positieve lijst cu 90 pero gobierno a core cancela e medida aki ora cu nan a haya porta sera pa nan drenta casnan den campanja electoral.

E anja aki, dia 17 jan 2022, Parlamento a haya un presentacion di AZV “Ban Reforma pa Garantisa”, den cual a describi un 5 wave model.

Ya caba a tuma medida riba djente di nos grandinan y riba eigenbijdrage ora di tratamento den exterior. Aki e acompanjante tin cu paga 300,- di su ticket y e daggeldvergoeding a bira mita, esta 10 dollar. Awor ta sigui cu e eigenbijdrage y un djies tambe e recorte di e lista positivo.

 

Un cantiad di nos hendenan, despues di COVID, no tin cuminda den nan frigidaire, no tin pan pa pone ariba mesa, no tin placa pa paga cas, awa y coriente, no por core nan auto y move paso no tin placa pa pone gasoline cu a bira cada dia mas caro, tin hasta a perde nan cas. Anto awor aki tin cu bay paga medicina. Esaki no ta un situacion saludabel ni acceptabel pa nos pais.

AZV a inicia cu e meta principal pa haci cuido accesibel (toegankelijk), segun metanan (doelmatig), y efectivo. Sinembargo minister Evelyn Wever-Croes sin consulta, a cambio di ayudo di liquidez, a firma ya caba na mei 2020 cu Hulanda cu lo corta den diferente area y den cuido cu 60 miyon florin. A firma e asina yama landspaketten, cualnan lo ensera recorte riba den diferente area.

Pa medio di e landspakketten lo introduci e.o. BTW, lo flexibilisa leynan laboral, kitando hende foi trabou y lo tuma medidanan den cuido.

Segun Wyatt-Ras tin cu mira interes di nos cuidadanonan y no interes propio y ta spera cu gobierno por recapacita y stop medidanan descabeya. Den e landspakket aki nos como pueblo ta horca y e rol di Parlamento tambe ta minimalisa. Pesey e parlamentario y su coleganan ta para akinan y lo boga pa interes di pueblo. Pa interes general di pais Aruba y interes di e pashent prevalece.

Sigur cu e carta di stakeholders lo mester haya su debido atencion pa por keda garantisa bon cuido y pa keda mantene cuido di salud accesibel.