Diabierna mainta a keda reporta cu despues di un investigacion largo tocante un caso di droga, polis a realisa un inval na dos sitio, cu a resulta den detencion di un sospechoso. Ayera dialuna, a bira conoci cu e persona deteni ta un trahador di Aduana.
Diabierna despues di e detencion inicial, Ministerio Publico a nenga di duna mas informacion ya cu e caso ainda ta bao investigacion. Sinembargo, no a descarta cu por tin mas detencion relaciona cu e caso aki.
Loke si a bira conoci ayera ta cu e sospechoso, un ambtenaar trahando na Aduana, ya tabata suspendi pa sospecho. Esaki pasobra a indica cu e tabata busca manera di usa su funcion pa permiti cierto iregularidad tuma lugar. Sinembargo, diabierna finalmente el a keda deteni relaciona cu e caso di droga, aunke no tin hopi detaye conoci publicamente.
Durante e accion diabierna, autoridadnan hudicial a haci un entrada na un cas y e oficina di un negoshi na Saba Liber, unda ademas di detencion, autoridadnan tambe a confisca diferente material cu ta di relevancia pa nan investigacion.
