Duna pa Departamento di Finanzas: Presentacion di Aruba su finanzas publico na sindicato y gremio comercial

Dialuna mainta e profesionalnan di Departamento di Finanzas a brinda informacion di Aruba su finanzas publico na sindicatonan y gremio comercial.

Aruba tabata bayendo den bon direccion, pero Covid-19 a cambia full e scenario financiero di nos Pais, segun un comunicado di gobierno. Aruba ta depende awor di Hulanda como e inversionista principal pa nos Pais y contrario na un inversionista comercial, e condicionnan pa yega na prestamo ta mas politico cu nan ta economico.

Debi na e situacion di e debe enorme di nos Pais, sigur pa e proximo añanan of decada nos dilanti Aruba lo ta bay depende di e yudansa cu Hulanda por brinda nos.

E condicionnan no ta facil pa cumpli cu nan, pero sin prestamo Aruba lo bay tine ainda mas dificil. Ta un realidad cu nos tur mester tene presente y purba compronde na bienestar di Aruba, segun e comunicado ta finalisa.