Diahuebs 28 di november 2019 Camara di Comercio y Industria (KvK) a entrega su zienswijze riba e concepto ROPv (Ruimtelijk Ontwikkelingsplan met Voorschriften). E documento ROPv ta formalisa e reglamentacion di e Plan Preparatorio di Desaroyo Teritorial. Manera KvK a indica den un comunicado anteriormente, e ROPv ta percura pa e desaroyo di e areanan y e funcionalidad di e areanan di pais Aruba.

Un ROPv ta carga e reglanan cu ta describi na kico areanan ta wordo destina, kico por wordo construi y e uso di e terenonan di Aruba. E regulacion di e ROPv ta e reglanan huridico na cua tur hende tin cu mantene nan mes. No ta solamente pa gobierno, pero tambe tur individuo y entidad existente. Como representantenan di KvK, sr. Kawish Misier, presidente di directiva di KvK y sra. Sonja Velthuizen, directora di KvK a haci entrega di e zienswijze den forma oficial.

E proceso di ROPv y e contribucion di sector comercial den esaki.
E zienswijze ta e opinion cu ta wordo formula encuanto e concepto ROPv. A base di e articulo 19 di e LRO por haci cambionan a base di zienswijzen. E Minister di Infrastructura tin cierto autoridad cu ta brinda e posibilidad pa haci cambionan den e regulacion di e ROPv a base di zienswijzen cu a wordo deposita.

KvK a formula su zienswijze a base di informacion cu KvK a ricibi via e directiva di KvK y tambe loke a drenta via e-mail. Asina tambe ta tene cuenta cu tur ideanan y preocupacion cu e comunidad ta expresa y ta inclui esaki den forma structura pa yega na un ROPv cu ta tene consideracion cu comunidad den tur aspecto y den un forma transparente.

KvK ta aprecia e diferente puntonan cu a wordo treci dilanti door di comercio y directiva di KvK ta comparti y ta haya e aporte uno hopi valido. KvK ta para tras un ROPv cu mester tene cuenta cu comunidad completo y cu tur doño di propiedad of negoshi por eherce nan derecho y asina cumpli cu rekisitonan. Asuntonan cu den e concepto ROPv, cu ta desvia di e ROP di 2009 mester tene consideracion cu situacion precedente y carga cu un splicacion y estudio profundo pa por hustifica e ROP y ROPv 2019. Mester remarca cu ROP 2009 no a wordo acompaña pa un ROPv y cu e formalisacion di un ROPv ta hopi importante. E ROPv lo describi e reglamentacion di zonanan y nan uso pa e siguiente diez aña y e ta afecta e desaroyo di Aruba den tur aspecto.

KvK ta spera cu Ministerio di Infrastructura ta mira e importancia di scucha e pueblo cu sigur no kier sali perhudica pa via di un decision no bon delibera pero cu ta tene consideracion cu nan aporte a base di nan propio conocemento y experiencia. KvK kier recorda pueblo cu si kier mas informacion por haya esaki riba www.dip.aw y cu tin te diabierna 29 di november pa entrega nan opinion den forma di un zienswijze por escrito.

Por lesa e zienswijze di KvK riba su website medio e siguiente link:

https://arubachamber.com/zienswijze ROPv.pdf