Durante parada escolar: Motor Unit y Mobiele Eenheid a detene dos hoben pa bringamento y a confisca arma blanco

Diabierna mainta a tuma lugar parada escolar na diferente districto rond Aruba. Cuerpo Policial tabata presente pa cu e orden publico y seguridad. Diferente team di polis tabata presente pa asina percura pa e seguridad di tanto e participante y mirones. 

Polisnan presente tabata Mobiele Eenheid (ME), polis uniforma, polis di bario, K-9, SBV, planologie, OCC, y Flex team.

Na comienso di e parada na Avenida Milio Croes a surgi un bringamento entre algun hoben. Di biaha polis a presenta y a bay over na detencion. Ta trata di dos menor di edad (masculino) cu a keda deteni y ora a ristra nan a topa cu arma blanco riba nan (boksbeugel y sambechi).

Cuerpo Policial un biaha mas ta recorda cu nos ta drentando e ultimo simannan di carnaval na unda nos ta pone enfasis riba e control y tambe polis t’ey pa e seguridad pa cada persona cu lo ta sea den parada of na banda.

Corda FAYA BO HAYA ta bay ta na vigor como tambe controlnan den trafico prome durante y despues di cada parada. Si bo ta bebe, no stuur. Percura pa bo tin Bo Amigo Respondabel. Un trafico sigur ta responsabilidad di nos tur.