E ascenso di e politico “influencer”; Con politica ta bira contenido, y politico ta bira un marca personal

Algo ta cambiando den e manera con politico ta comunica cu pueblo, y hopi hende na Aruba probablemente ya a ripara, hasta si nunca a para keto riba dje.

Durante gobierno anterior, ex-minister Ursell Arends (Raiz) a hala atencion cu su cuenta di TikTok, cu tin biaha tabata mustra hopi diferente di loke hende ta spera di un minister tradicional den gobierno. El a participa den meme, usa joke y musica popular, y a filma contenido den su oficina. Den un video di 2024, Arends a sinta casual riba un stoel mientras e texto riba pantaya tabata joke tocante hende criticando e cu “e mesun boca” cu antes nan a usa pa pidi fabor politico. E post a haya mas di 1.300 likes.

Awe, nos ta mira variacion di e mesun fenomeno.

Minister Gerlien Croes (Futuro) regularmente ta aparece no solamente atendiendo actividad, sino participando den nan: boxeo durante Aruba Activo, core, opera un excavator durante proyecto di comunidad, y papiando directo na e camara. Despues di un evento deportivo recien, Croes a comparti un video mustrando un momento den cual el a core cu jeans bisti dilanti atleta Amadee Nicolaas, kende a bira e ganador absoluto di Ronde van Aruba. El a introducie na su siguidornan como “e video mas exclusivo di ayera.”

Minister y lider nobo di AVP, Wendrick Cicilia tin un estilo un tiki diferente. Su rednan social ta combina informacion di gobierno cu video produci profesionalmente, mensahe inspirador, bishita na comunidad, y reflexion personal. Su perfil di Facebook ta identific’e no solamente a traves di su rolnan politico y profesional, sino tambe como “amigo y co-ciudadano.”

Tres politico, diferente partido, diferente gobierno y diferente estilo, pero tin algo ta conecta nan.
E politico ta, cada bes mas, no solo e persona dunando e mensahe politico. E politico ta birando parti di e contenido.

No solo na Aruba

Investigadornan di comunicacion politico ta studia e fenomeno aki internacionalmente. Termino manera “politico influencer”, “influencer politico”, “micro-celebridad” y personalisacion di politica ta ser usa.

Un estudio di 2023 a defini influencer politico principalmente como creadornan di contenido cu ta conecta nan influencia online cu politica of causa social. Investigacion mas reciente di Elizabeth Dubois y Katharine Dommett, sinembargo, ta propone un spectrum di influencia politico, basa entre otro riba comunicacion personalisa, audiencia, control riba contenido y rol politico formal. Pues, no ta necesario pa yama Croes, Cicilia of Arends “influencer”. E pregunta ta: kico ta pasa ora politico ta comunica segun logica di influencer?

Di conferencia di prensa pa For You Page

Prome cu rednan social, e ruta entre politico y ciudadano tabata usualmente mas largo. Un gobierno of partido politico tabata duna un declaracion, un politico tabata duna un conferencia di prensa, y periodista tabata haci pregunta, selecta informacion y duna contexto. Corant, radio y television tabata transmiti e mensahe na e publico.

Rednan social a corta e ruta aki dramaticamente. Un politico awo por graba video, scoge imagen, skirbi e leyenda, selecta e musica, edita e material y distribui tur esaki directamente na miles di persona. En efecto, politico por bira nan propio canal.

Pero tin otro consecuencia importante.
Riba TikTok, Instagram of Facebook, un politico no ta competi pa atencion solamente cu otro politico. E siguiente articulo den e ‘feed’ di un persona por ta un clip di futbol, un receta, un celebridad, un influencer, un amigo, un meme of un pushi cu ta balia.

Politica a drenta e economia di atencion.

Y pa sobrevivi eynan, comunicacion politico, cada bes mas, mester compronde e idioma di e plataforma.

E uso di Arends di e hashtag #fyp ta un ehempel chikito pero revelador. #fyp ta referi na “For You Page” di TikTok, unda contenido ta ser recomenda pa algoritmo. Su videonan no tabata djis anuncio di gobierno subi riba TikTok. Nan a usa meme, musica, texto, joke visual y otro convencion nativo na TikTok. Nan tabata ‘TikToks’.

Autenticidad, intimidad y experticio di plataforma

Un estudio di 2026 publica den e journal academico Political Communication ta duna un marco specialmente util pa compronde loke ta pasando.

Investigadornan Fatima Gaw y Erik Nisbet ta yam’e “logica di medio di influencer.” Nan ta identifica tres principio central: autenticidad, intimidad y experticio di plataforma. Nan ta argumenta cu e practicanan aki por afecta con visibilidad, credibilidad y confiansa ta opera den comunicacion politico.

Autenticidad ta tocante mustra genuino y real. En bes di mira solamente e imagen nechi di un politico tras di un podium, siguidornan ta mira momentonan aparentemente ordinario. Un minister ta core, ta box, ta haci un joke, ta bishita un bario.

Esaki no ta nifica cu e autenticidad ta necesariamente falso, sino cu rednan social ta haci e presentacion di autenticidad mes importante. Gaw y Nisbet ta nota cu influencernan hopi biaha ta comunica autenticidad mediante idioma di combersacion, produccion casual y momentonan aparentemente sin filtro.

Djey ta bin intimidad. Siguidornan ta invita den partinan di personalidad y bida di un politico cu antes nunca lo a aparece den comunicacion politico oficial: humor, ehercicio, vestuario, emocion, reflexion personal y momentonan tras di cortina.

Y finalmente tin experticio di plataforma: compronde kico ta traha riba e plataforma particular cu ta usa.

Un comunicado di seis paragraf copia riba TikTok no ta experticio di plataforma. Un joke cortico construi rond di un formato ‘trending’, musica y un punchline visual si.

Politico como marca personal

Un post individual por nifica tiki. E efecto ta bira mas interesante ora centenares di post ta acumula durante tempo. Un persona publico reconocible ta cuminsa aparece.

Den e ehempelnan cu nos a examina, comunicacion di Croes frecuentemente ta presenta e minister como un participante activo: experenciando actividad hunto cu publico en bes di djis observando nan.

Comunicacion di Cicilia ta pone enfasis particularmente fuerte riba proximidad, balornan personal y liderazgo: core cu residente, bishita bario, duna man, mensahe inspirador y documentando su transicion den liderazgo di AVO.

Arends tabata usa humor, meme y e lenguahe informal di TikTok.

E observacionnan aki no ta bisa nos con e politiconan aki ta realmente den priva, ni ta establece nan motivo. Nan ta describi e comunicacion publico produci. Pero hunto, nan ta ilustra algo cu investigadornan a asocia cu micro-celebridad: mantene atencion rond di un persona publico reconocible mediante comunicacion ripiti y personalisa. Investigacion recien tocante influencer politico explicitamente ta usa e ramo aki di estudio di micro-celebridad anterior ora ta purba di compronde e comunicacion politico di awendia.

E cargo, e partido politico, y e maneho ta keda importante. Pero banda di esaki, awo tin algo mas: e marca personal di e politico.

‘Mi ta sinti mi conoc’e’

Tin otro concepto cu ta yuda splica pakico esaki ta importante: e relacion parasocial. E idea ta relativamente simpel. Imagina sigui e mesun politico pa añas. Bo ta mira e video pret. Bo ta wak e persona ta haci ehercicio, bishita comunidad. Bo ta scucha su pensamento personal. Bo sa kico ta pon’e hari. Tur dialuna, otro mensahe motivacional ta aparece den bo ‘feed.’ Eventualmente, e politico ta cuminsa sinti familiar. Bo no conoce e politico realmente, y probablemente e no conoce abo. Pero exposicion ripiti por crea un sentimento di familiaridad di un banda. Investigadornan ta yama esaki un relacion parasocial.

Investigadornan politico a cuminsa examina e relacionnan aki cada bes mas mientras politica a bira mas personalisa, incluyendo e rol cu medionan social y tradicional tin den crea nan.

Esaki no ta nifica cu sigui un politico riba rednan social ta determina un persona su voto automaticamente. E investigacion ta considerablemente mas complica cu esey, y efectonan ta varia segun contexto. Pero estudionan recien ta investigando conexion entre experiencia di rednan social, relaciona parasocial, participacion politico y intencion di voto.

Esaki ta lanta un pregunta importante: Ciudadanonan ta evaluando un prestacion of maneho di politico so – of tambe e persona cu nan ta sinti nan conoce?

Tin bentaha

Nada di esaki ta necesariamente malo pa democracia. Rednan social por haci politico mas accesible, specialmente pa hende cu probablemente nunca lo lesa un rapport di gobierno. Politico por comunica directamente cu ciudadano, splica nan trabao y mustra nan banda humano.

Pero rednan social tambe recompensa atencion. Legislacion, presupuesto y maneho ta dificil pa transforma den contenido atractivo. Coremento, boxeo, un meme of usa un excavator ta hopi mas visual y interesante. Esey ta lanta un pregunta importante: si visibilidad politico ta depende cada bes mas di contenido atractivo, esaki eventualmente por influencia kico politico ta scoge pa mustra, of hasta con actividad politico ta wordo ehecuta?

Y kico ta pasa cu periodista?

E cambio tambe ta afecta e rol di periodista.
Politico no ta depende asina hopi riba corant, radio of television pa yega na audiencianan grandi. Den un sentido, esey ta democratisante. Medionan tradicional no tin control exclusivo mas riba ken ta ser scucha.
pero tin un diferencia mayor entre un cuenta di rednan social di un politico, y periodismo independiente.

Un politico ta controla e camara, scoge e clip, e potret, e leyenda y e edicion. Pero un periodista por haci un di dos pregunta. Con hopi el a costa? El a funciona? Kico a pasa cu e promesa anterior? Kico oposicion ta bisa? Con hopi el a costa? Kico a laga afo?

E rol di periodismo tambe ta cambiando, di simplemente distribui declaracion politico, pa awo cada bes mas verifica y contextualisa contenido politico.

Politico influencer

Rednan social a duna politico un oportunidad extraordinario pa papia directamente cu ciudadano. E por haci politica mas humano, mas accesible y tin biaha mas leuk.

Pero tambe a pone politica den un economia di atencion cu ta recompensa personalidad, intimidad, visibilidad y un suministro sin fin di contenido nobo.

Talbes, anto, e pregunta mas importante no ta si politiconan di Aruba ta birando influencer, sino kico ta pasa cu nos politica ora bira un politico exitoso ta rekeri cada bes mas pa sa con pa comporta como influencer.