Di mesun manera cu cualkier otro pais, Aruba tin barionan cu ta unicamente nombra y tur ta forma parti di su cultura y desaroyo. Varios di e nombernan aki tin un antecedente historico y un significado cu ta siña nos tocante e isla y su cultura rico tur dia.
Cu e articulonan aki, nos kier bay riba un aventura di descubrimento, unda nos lo siña mas tocante no solamente e bunita nombernan di e partinan di nos isla sino tambe e historia tras di e nomber cu ta dun’e bida.
Tierra Del Sol
Nos ta cuminsa cu e storia di e nomber di Tierra Del Sol, cual antes tabata Anabui. E bario aki por ser mira riba Van Raders su mapa y Werbata como Anna Boei.
Anna Boei ta un nomber di cual no tin hopi informacion tocante su origen. E miho expertonan den historia por a deduci cu e nomber aki a surgi a causa di mal comunicacion entre Van Spengler y e nativonan cu tabata biba riba e isla. Den e idioma Arawak/Taino, bo por haya e palabra Anaiboa, cual ta consisti di Aña; nificando flor of e miho y Iboa; cual ta nifica e juice di un cassava, unda hunto e palabranan ta nifica “e miho juice di un cassava.”
Si nos asumi cu e palabra berdadero cu a tende ta Anaboio, cual ta consisti di Aña – cual nos sa caba cu por nifica e miho – y Boio; cual ta nifica cas, eora Anabui lo nifica E miho cas. Esaki ta e origen cu ta mas o menos specula y ta asumi pa cu Anabui y su nificado.
Durante e di dos guera mundial y despues, e area aki a ser usa como un tereno pa training den tiroteo y militia, y despues Korps Mariniers. Pa fin di e siglo anterior, un gran parti di Anabui a ser desaroya pa tin veldnan di golf y villanan luhoso, cual na final a duna e area e nomber di Tierra Del Sol.
E nomber no ta un nomber oficial, pero e nomber di e proyecto di desaroyo cu a tuma luga.
Te ainda tin e speransa cu e nomber original y ‘bieu’ di Anabui nunca ser perdi y cu awo nos generacionnan mas recien tambe por conoc’e y cord’e.
Angochi
Otro bario cu nos conoce ta Angochi, cual nomber riba e mapa di Werbata por ser mira cu letranan chikito y cursivo. E ta e nomber no oficial cu un persona bibando den e area a duna na e tereno cu el a huur.
E probabilidad mas grandi cu expertonan den historica ta kere ta cu e ta bini for di descendencia nativo, durante e tempo den siglo 19 unda Mestizonan te ainda tabata biba riba Aruba. E nomber realmente no por ser splica y segun bukinan tocante su historia, ta mas un señal di corupcion.
Sinembargo, aparentemente e ta bini for di combina A(n) y Goeiza, cual ta nifica ‘e spirito di un homber bibo.’ E origen di e nomber Angochi ta keda mas un adivinansa, pero toch mesun stima y aprecia den nos historia.
