Literalmente ‘di nochi pa mainta’ e panorama politico na Aruba a cambia drasticamente. E mesun partido cu tres aña pasa a celebra un victoria electoral historico cu 13 asiento, na e momento aki ta mustra hopi menos stabiel.
E salida di e ministro encarga cu turismo no tabata completamente un sorpresa, ya cu na cuminsamento di aña e mes a bay di bishita cerca Gobernador pa conta di e problemanan grandi den e ekipo di ministro. Nos ta bisa ekipo pasobra esey e ta supone di ta, pero ta resulta cu e tabata mas bien e famoso bari yena cu cangreu, cu no ta laga niun subi bay halto. Y cu un obvio falta di liderazgo, sigur despues di e sucesonan di 2014, tabata un cuestion di tempo pa mira e problemanan pasa limite.
Pero manera tur storia, esaki tin dos banda. Den su rueda di prensa di ayera e (ex-)ministro a duna un magnifico relato di con e tabata para den e conflicto y mira di su banda, por comprende su motibonan pa distancia su mes di e gobierno aki y alabes di e partido mayoritario cu ta sostene. El a menciona por ehemplo e accion cu finalmente a pone tuma su decision, unda cu e ministro di Salubridad Publico y su colega di Infrastructura a haci uzo di su ausencia pa aproba permiso pa un hotel mayor expande cu e 600 cambernan all-inclusive di reserva cu e mes tabatin warda, pa ken?
Ta keda e hecho cu si tabata e mes a otorga e reserva aki na mesun of na un otro competido, anto e tabata bon haci? Loke ta keda un problema pa nos tur ta cu no ta haci nada pa regla e asunto, cu dos ministro por ignora totalmente e opinion di e ministro cu, bon of malo, ta maneha e sector principal di nos economia. Y den esey e critica pa gran parti ta bay den direccion di e ministro encarga cu Infrastructura, cu na bista di tur hende ta hiba su mes maneho, ignorando hasta hues.
Aki atrobe ta falta e man duro di un berdadero lider, cu no t’ey. Aunke tambe mester tuma na cuenta cu hamas y nunca e lider lo bay laga e representante di e bario di e sede di partido cay.
Naturalmente henter e bom cu a rementa den e partido berde tin hopi di haci cu ego grandi, y e ministro aki sigur no ta un excepcion. Ta bisto cu e tabatin e ambicion di yega na e nivel mas halto como politico, esey ta su ambicion ainda, y cu esey no tin problema. Tur hende por aspira yega na algo grandi.
Por ta, sinembargo, cu e tambe a cuminsa ripara cu den e partido di famia aki, no tin luga pa hende cu no tin e fam corecto. E politiconan mas grandi den Aruba su historia a cuminsa nan carera den e partido aki: Juancho Yrausquin y Betico Croes. Nan tur dos a yega na e conclusion cu no tabatin espacio pa nan crece eyden y nan a bay nan mes caminda. Mientras tanto e partido berde ta disfrutando su di cuatro lider di mesun famia y esunnan eyden ta parce feliz cu e situacion ey. Pa esunnan cu ta desea di logra mas, aparentemente no tin otro opcion cu corta e lasonan na cierto momento. Nos por a comprende di e ex ministro cu su carera politico no a caba, por lo tanto e ta bay sondea otro posibilidad pa logra su ambicion: esey ta practicamente igual na bisa cu bo ta bay lanta un partido nobo. Nos lo tende ora ta asina leu. Futuro lo mustra si e por sigui e caminda di e dos grandinan cu nos a menciona, loke no ta facil pero ‘time will tell’.
Interesante ta bay ta kico e resultado lo ta den e partido mes, y mas cu tur cos cu su representacion den parlamento. Ta imaginabel cu na prome momento ningun parlamentario di e partido ta bin dilanti y bisa cu nan ta di acuerdo cu e disidente y ta bay sinta otro caminda den sala. Por ta cu mas den curso di tempo, ora un alternativa bira mas visibel, esey por bay sucede.
Sinembargo, no por descarta e posibilidad cu sali di e partido gobernante a bira mas urgente, o en todo caso mas oportuno, pasobra tin mal tempo na caminda pa loke ta e relacion cu Hulanda, pa gran parti relaciona cu e maneho financiero.
Un bentaha grandi henter e kiebra aki tin pa gobierno y esey ta cu na momento cu sinta un otro ministro pa e cartera di turismo, ta bira mas facil pa pasa mas placa di e reservanan di Aruba Tourism Authority (ATA) pa e caha general di gobierno. Un problema cu basta tempo caba ta hungando un papel y cu a keda sin solucion. Esey ta mustra den direccion cu, si Otmar Oduber tabatin su plan pa na cierto momento bandona e barco berde, e partido tambe tabatin su motibonan pa pusha e conflicto te crusa e limite.
