Den e columna di e siman aki nos lo dedica nos mes na duna un bista real di tur e desafionan cu ta riba horizonte cercano pa nos isla di Aruba. Di un banda nos ta tende nos ultra-kader ta indica cu no tin inflacion, cu turismo ta na un record absoluto, y cu eigenlijk no tin cu preocupa nos mes. Na otro banda nos ta wak mas y mas señalnan cu ta alarmante, manera criminalidad di desesperacion, incidentenan cu polis y uso di substancia den trafico cu consecuencianan fatal. Bao di superficie Aruba ta den un posicion hopi vulnerabel mes. Mientras cu tabatin tanto alternativa cu por a brinda alivio.

Aruba: Un Paleis di Cristal

Un dicho Hulandes ta: “Un palacio di cristal ta hopi bunita, blink so e ta blink. Pero tira un piedra duro na dje anto full e edificio ta kibra.” Esaki ta parce mi un analogia adecuado pa visualisa e situacion awo. Por ta den rapportnan oficial tur cos ta parce rasonabel, pero bao superficie nos ta wak scheur basta grandi caba. Esun di mas obvio y peligroso den mi perspectiva ta e hecho cu Aruba su reserva monetario segun data oficial di Centrale Bank van Aruba, excluyendo e Oro ta bahando den forma rapido. Na mei 2025, esaki tabata para na 3.721 miyon florin, na November 2025 e suma aki a baha te na 3.430 miyon florin, un caida di 9%+. No lubida cu tur esaki ta den contexto di rapportnan di nos lidernan politico cu inflacion ta abao y cu turismo ta na un record absoluto.

Punto #2 ta e observacion cu prijs di Oro ta hisando den manera “parabolico”. Na e momento di skirbi e columna aki, prijs di Oro ta na $5.535,- US pa troy ounce. Esaki ta nifica cu tin hopi tension geopolitico. Nos no mester lubida con cerca esaki a yega na canto di nos isla, esta cu un accion militar chikito di Merca dentro di curason di Venezuela. Pero segun reportahe di Reuters, tin un pensamento cerca kader politico di Merca cu Venezuela no ta mesun cooperativo cu Secretario di Estado, Marco Rubio, ta spera. Den contexto aki, mas atake dentro Venezuela ta keda un posibilidad basta real na e momentonan aki.

Sumamente mas preocupante ta e hecho cu parce cu Trump lo desea di ataca nacion di Iran. Esaki lo por crea un conflicto hopi mas grandi, cual lo por tin spill-overs negativo pa mundo henter. Aruba no lo ta un excepcion. Segun un analisis breve di mi persona hunto cu Claude 4.5 Sonnet, un conflicto entre Merca y Iran lo por reduci Aruba su reserva monetario cu $435-500 US miyon den un periodo di 12 luna. Aruba su posicion ta sumamente fragil den contexto geopolitico aki cu ta birando mas y mas agresivo en general.

Politica Local ta Hipocresia Total

Nos ultra-kader tampoco no ta haciendo net nada pa prepara nos pais pa tur e riesgonan aki. Nos ta wak diariamente potret di parlamentarionan na hotel of eventonan di high society, mientras cu Gobierno ta gasta un schat di placa pa organisa un conferencia tocantene bon comun. Ta busca oradornan caro di full rond mundo, pero e talento local na nos isla no tin ningun luga. Tambe nos a wak un Banco Central di Aruba, tira un evenemento cu “klinkers en toeters”, no lubida cu tur esaki ta wordo financia cu placa di belasting, esta bo sodo, den funcion di campananan di PR.

Na luga cu nos ultra-kader haci trabao decente cu nos por spera ora nos wak cuanto recurso di manpower nan tin disponibel y nan salarionan barbaro. Te dia di awe, no tin niun reportahe publico, lubida un plan, tocante con lo mitiga e hecho cu Aruba a pasa su carrying capacity pa turismo. No tin ni un gram di inteligencia pa forma un Plan Nacional di Innovacion. Tambe recursonan di salubridad ta bao stress inmenso, y te hasta nos ta wak varios bes cu esaki tin consecuencianan hopi severo pa individuonan afecta.

Innovacion ta e Unico Alternativa: Ki dia lo wak esaki?

Nos a skirbi pa tanto tempo den un speransa naive, cu cambio real tabata posible, cu por bin 3D Printing di Cas, Panel solar y bateria, cas energie-zuinig pa full pueblo, AI RoboTaxi pa Transporte Publico, Container Farms, Fabrica di panel solar di generacion nobo, AI y automatisacion hopi profundo den Ley & Medicina, Entrada Universal.

Esaki no tabata articulo los sin mas den añanan cu a pasa, sino un plan pa mitiga tur loke cu lastimamente nos lo bay enfrenta como pueblo. Te dia di awe, mi no ta compronde dicon e ideanan aki no a haya oido cerca nos machthebbers. Pero en fin, ta nan mes lo wordo culpa pa ora e paleis di cristal cu ta Aruba cuminsa cay den otro.