Den e ultimo dianan, e topico di revitalisacion di San Nicolas a surgi atrobe riba red social, unda par den comunidad ta treciendo nan preocupacion dilanti tocante e segundo fase di e proyecto di revitalisacion di San Nicolas, cual ta cay bao maneho di minister di Finanzas Geoffrey Wever. Aki a referi specificamente na e parkinglot situa dilanti plaza Lolita, unda minister Wever a informa cu lo introduci un ‘farmers market’. E minister a enfatisa cu e farmers market aki lo atrae mas bishitante pa San Nicolas, y di e manera aki stimula crecemento economico den e distrito.

Sinembargo, varios ta cuestionando e planificacion di e farmers market, subrayando un contradiccion den e fase aki di e proyecto di revitalisacion. Entre nan ta Sr. Hilario Doncker, ken ta un voz conoci den abogacia pa San Nicolas, y ken den un publicacion riba Facebook a nota cu deshaci di e parkinglot pa un proyecto cu supuestamente lo stimula economia di San Nicolas lo ultimamente trece mas consecuencia negativo pa negoshinan den bisindario. Esaki pasobra espacio pa parkeo lo ta aun mas limita den e area, cual a lo largo lo por descurasha bishitantenan keda.

Doncker a haci varios publicacion tocante e proyecto di revitalisacion, y ta keda urgi minister Wever pa duna mas clarificacion pa comunidad di San Nicolas den forma di un ‘town hall meeting.’

Na momento cu e haci e publicacion aki, un otro voz relevante a drenta e combersacion, esta di Sr. Rondel Heyliger, conoci den comunidad como Spice Heyliger. Heyliger ta un empresario y miembro di partido FUTURO hunto cu minister Geoffrey Wever. Den comentario bao di e publicacion, Heyliger a splica cu e argumento cu deshaci e parkinglot causa disturbio no ta funda. Manera el a splica, datonan di investigacion ta mustra cu e parkinglot aki ta mayormente bashi durante dia, unda apenas 1/3 ta ser usa diariamente.

E ta sigui enfatisa cu e parkinglot ta mas ocupa durante dianan di siman entre 9or di mainta y 12or di merdia. Despues di merdia ocupacion ta cuminsa cay y ya pa 3or y mey di atardi e ta hopi keto. Durante oranan di anochi, e parkinglot ta practicamente completamente bashi, unda a conta un averahe di apenas siete auto.

Durante weekend tambe, e parkinglot ta keda mayormente bashi tambe, cual ta indica cu usuarionan ta usa esaki mas tanto pa ora ta bay trabao.

Aunke ta berdad cu e espacio ta practicamente “espacio desperdicia”, manera Sr. Heyliger a comenta, e argumento pa pone un farmers market eynan ta keda cu un buraco, den e sentido cu lo anticipa mas bishitante, pero espacio pa bishitante staciona legal y comfortablemente ta reduci.

Pakico a scoge pa pone e farmers market den e parkinglot ey no ta conoci. Bon Dia Aruba a acerca Sr. Heyliger cu un peticion pa mas informacion tocante e decisionnan tuma rondonando e fase aki di e proyecto di revitalisacion, pero te ciere di e edicion aki, no a logra haya contesta.

Doncker, den su reaccion na e comentario di Heyliger a referi na e hecho cu e motibo pakico no tin hopi auto ta parkeer den e parkinglot dilanti Visitors Information Center ta pasobra mayoria sa para mas pabao, den e promenade di San Nicolas. Aki ta enfatisa cu autonan sa para riba acera y polis ta tolera esaki. Algun persona den comentario tambe a echo esaki, agregando cu sa hasta staciona auto dilanti porta di negoshi.

A sugeri pa pone e farmers market banda di e edificio di RDA, unda tin un espacio habri cu por desaroya. Di e manera aki, e entrada di bishitantenan anticipa lo keda cu un espacio unda nan por staciona nan auto libremente sin preocupa cu seguridad y interferencia policial. Tambe a menciona otro sitio, incluyendo Carnival Village, cu algun cuestionando pakico no ta usa e espacio grandi aki (cu ta keda pa gran parti di aña bashi) pa e farmers market. E sitio tin suficiente espacio, tin kiosk y parkinglot caba, haciendo e ideal y mas accesible pa bishitantenan.

Ademas, mester considera seguridad di bishitantenan si ta pone e farmers market den e parkinglot pega cu Arubus. Debi na e distancia corto, mester nota cu por existi un peligro pa bishitantenan cu ta crusa caminda of ta cana riba acera cerca di e stacion. Aki, busnan grandi mester tuma biradanan relativamente chikito pa por sigui nan rumbo, frecuentemente usando espacio di acera pa por bira completamente. Esaki por trece riesgo cune, specialmente si ta anticipa mas peaton den e area.

E punto aki a surgi caba den e prome fase di minister Wever su proyecto, unda ciudadanonan a haya e birada bayendo Caya Captain Rogers hopi smal, cual a trece preocupacion cu e por ta peligroso pa peaton.

Ta parce cu e proyecto di revitalisacion di e distrito ta keda haya critica di ciudadano. Un iniciativa cu meta pa engrandece e distrito ta parce di tin algun buraco cu pa hopi den comunidad no tin sentido.

Y esaki no ta prome biaha cu proyectonan di minister Wever ta haya e tipo di criticanan aki.

Bon Dia Aruba a reporta algun luna atras riba e asunto di Agri-Innovation Park, unda a compronde cu e proyecto aki no ta algo cu e agricultornan a pidi p’e necesariamente. Manera nos a reporta den november 2025, United Farmers Association (UFA) tin casi 20 aña ta bogando pa cambionan structural pa asina agricultornan por haci nan trabao adecuadamente, pero ainda no ta mirando resultadonan concreto. Un motibo pa esaki tabata cu a pesar di reuni cu ministernan den pasado y actual, e argumento cu nan ta keda tende ta cu cambionan structural ta un proceso cu lo tuma demasiado tempo.

E comentario aki ta remarcable: E ta sugeri e ora cu gobernantenan ta prefera solucionnan rapido (pero innecesario) en bes di aborda e raiz di e problema?

Proyectonan ta iniciativanan atractivo: E ta yama atencion riba e problema y ta mustra pueblo cu gobierno lo traha riba dje. Sinembargo, despues di tempo ta cuminsa ripara cu e proyectonan introduci no ta duna un resultado duradero. Esaki por ta pasobra e proyecto en realidad no ta un solucion, sino un “pleister” riba e problema—un problema cu mester di solucionnan structural.

E tipo di maneho aki ta birando mas y mas notable den gobierno, y ta keda causa frustracion entre pueblo. Tambe e ta trece den duda e motivacion pakico ta scoge e caminda mas facil en bes di esun mas sostenible. Ta posible cu algun decision tuma ta djis pa aparencia? Pa por bisa durante campaña cu “ami a haci esey”?

Esey ta critica cu ta keda surgi entre ciudadanonan, pero e pregunta si esakinan ta funda, nos lo keda di mira.