(NLTimes) – E confiansa di e residentenan di Hulanda den politica ta na un nivel mas abou historico. Den e di tres kwartaal di e aña aki, 39% di e residentenan di Hulanda no tin confiansa mas den politica, y 75% a bisa cu nan confiansa den gobierno a baha durante e ultimo aña, segun un relato trimestral titula “Know your people: The Netherlands” di e agencia Noruego Norstat.
E confiansa abou den politica ta bay compaña pa un sentido di pesimismo. Mitar di e Hulandesnan ta kere cu Hulanda ta bayendo den mal direccion, y 74% ta hopi preocupa cu e desaroyonan na Hulanda. Solamente 2% ta positivo tocante loke ta pasando na Hulanda.
E preocupacionnan mas grandi di ciudadanonan Hulandes ta inflacion, migracion y conflictonan internacional. Un gran parti di e poblacion tambe ta preocupa pa criminalidad y cambio di clima, aunke esakinan ta ser menciona menos frecuentemente como e preocupacion principal di hende.
A pesar di e malcontento di sociedad, mayoria residente di Hulanda ta contento cu nan bida personal, segun Norstat. 72% ta balora nan calidad di bida como bon of hopi bon, y 83% ta considera nan mes rasonablemente feliz.
Hulanda no ta e unico pais Europeo caminda confiansa den politica ta bou di presion, pero e situacion Hulandes ta remarcablemente malo dentro di Noordwest Europa. Gruponan grandi di ciudadano tambe ta desconfia nan gobiernonan na Italia (60%), Reino Uni (49%) y Alemania (42%).
E porcentahe ey ta significantemente mas abou den e paisnan Scandinavo. Na Dinamarca, solamente 15% di ciudadanonan no tin confiansa den politica. Na Suecia, esey ta 17%, y 19% na Noruega. Segun Norstat, e paisnan Scandinavo tin gobiernonan transparente y stabiel, y esey ta refleha den e nivel halto di confiansa den nan.
