Aruba su cultura ta consisti di tradicionnan rico den historia cu ta crea e identidad y estilo di bida Arubano. Sinembargo, e bida di un cunukero ta posiblemente un di e aspectonan mas importante den nos cultura, den sentido di representa na localnan e esencia berdadero di e Rubiano.

Historicamente, cunucu a hunga un rol sumamente grandi den e desaroyo social y economico trempan di Aruba, y su relevencia ta data back te na e prome dianan di e era di colonisacion. Despues di ser descubri pa conkistadonan Spaño den siglo 15, Aruba tabata usa primeramente como un rancho, dunando refugio na cabaynan y cria treci for di Europa. Durante e era Hulandes di colonisacion unda West Indian Company (WIC) tabata domina e esfera economico riba e isla, usa e isla pa crea cunucu y ranchonan a keda popular.

Antropologo Sidney Mintz a dividi e cunukeronan Caribense den 4 categoria:

  1. E “squatters”, kendenan tabata mas tanto colonistanan pober y indocumenta, catibonan cu a huy y esnan cu a tuma bentaha di Spaña su supervision debil riba e islanan Caribense manera Cuba y Republica Dominicana.
  2. “Early Yeomen”, kendenan tabata cunukeronan legal cu a bay west bao contract. Na momento cu nan contract a caduca, nan tabata ricibi un pida tereno pa uso independiente;
  3. “Proto-Peasants” tabata catibonan cu tabata traha riba plantashi cu tabata permiti tin un pida chikito di tereno pa por cultiva nan propio cuminda pa nan consumo. Esaki tabata pa por maneha e costo di bida riba plantashi
  4. Por ultimo, tabatin e “Runaway Peasantries,” cual usualmente tabata catibo cu a huy y a adkiri hermentnan pa agricultura y cria via horta of intercambio secreto cu otro catibonan di diferente plantashi.

Sinembargo, e cunukeronan Rubiano di e tempo aki ta dificil di hinca den un categoria, y nan historia posiblemente ta splica dicon.

For di 1636 (comienso di e era di colonisacion Hulandes) te cu prome cu e industria di petroleo den 1924, Aruba su poblacion tabata consisti di mas tanto cunukero. E cunukeronan aki tabata mas tanto Indigena y tabata caracterisa como campesino. Nan tabata permiti participa den mercado, pero tabata ricibi un pida di tereno di cual nan por biba. Sinembargo, a cambio di esaki, e cunukeronan Indigena aki tabata obliga di traha pa WIC, haciendo tareanan diario manera cuida di of casa cria – un gran mayoria di cual tabatin destino pa Curaçao, limpia tankinan di awa y corta palo entre otro.

Aunke cu e cunukeronan a ricibi e oportunidad di por biba “liber” cu un pida di tereno, nan exclusion for di e mundo di mercado y negoshi, ademas di no ricibi e chens di tin propiedad real of ta doño di cria, a haci cu nan tabata un grupo unico entre cunukeronan Caribense den e tempo aki.

WIC a pone hopi restriccion riba e cunukeronan Indigena – un metodo pa proteha nan deposito di cria riba e isla. E cunukeronan indigena tabata mas tanto ricibi menos di 7 hectar di tereno. Esnan cu tabatin tereno mas grandi tabata of afilia cu WIC of tabata colonista cu a muda na e isla pa wak con bon cos ta bay como cunukero. Den 1767, tabatin alrededor di 120 cas/cunucu riba e isla.

E cunukeronan Arubano aki tambe tabata limita riba e cantidad di cria cu nan por tin. Mayoria tabatin cabrito, mirando cu solamente esnan afilia cu WIC por tin mas. Di e 76 doño di cabrito, alrededor di 45 di nan tabatin menos di 30, y solamente 7 di nan tabatin mas cu 60.

No ta te ora cu WIC a stop di existi den fin di siglo 18 cu e agricultornan aki por a obtene mas libertad como cunukero. Despues di 1824, e gobierno a duna e cunukeronan aki permiso oficial pa tin ganado, y e obligacionnan cu antes tabata riba nan a keda oficialmente descarta.

A causa di e clima seco na Aruba, cultiva cuminda pa proposito comercial no tabata algo popular. E enfoke tabata mas tanto riba cuida di e ganado y demas. Sinembargo, e ganado tabatin mester di cuminda pa sobrevivi y ora cu Aruba a experiencia su clima extremadamente seco, varios di e agricultor tabata sufri un perdida grandi den nan ganado y automaticamente ganashi tambe.

Aunke WIC na un punto si a purba di bin cu un iniciativa cu por a duna mas hende riba e isla un tereno, e clima nunca a permiti tin un ingreso real for di agricultura. A causa di e clima, cunukeronan Rubiano en general no por a mantene e cantidadnan grandi di ganado. A yega un cierto punto na fin di siglo 18 unda e clima tabata asina malo cu varios di e cunukero a dicidi di sali for di e isla pa un tempo.

Pa e motibo aki, e economia di agricultura riba e isla a keda chikito. Mientras añanan a sigui pasa y hende a ripara cu e cunucunan aki realmente no ta produci un ingreso sostenibel, e cunukeronan a keda cu nan pida chikito di tereno pa nan biba. Esaki ta dicon e cunukeronan Rubiano a hunga un rol bastante chikito den e economia di plantashi.

Den Aruba moderno, e cunucunan y cunukeronan te ainda ta existi, y afortunadamente cu mas libertad y oportunidad pa drenta e mercado di agricultura. E cunukeronan aki usualmente ta bende nan cultivo na un escala mas chikito, manera durante eventonan di ‘farmers market’ y otro tipo di eventonan similar.

Fuente; Arubaans Akkoord: Opstellen over Aruba van voor de komst van de olieindustrie di Alofs, Luc; Rutgers, Wim; Coomans, Henny E. red.