Si nos observa noticia internacional, tension social ta un tema grandi y creciente. Debi na e crisis di costo di bida, inflacion monetario y aparatonan politico cu no kier enfrenta e Status Quo pa beneficio di sociedad en general.

Nos ta wak protestanan cu te hasta ta bira violento na paisnan manera Francia y Inglatera. E motibo mas cardinal pa mi persona como autor fiel den e delaster añanan cu mi columna semanal, ta pa juist preveni e scenario aki na Aruba.

Usando e motor di prosperidad universal, esta Innovacion Tecnologico mi a propone diferente solucion den e añanan cu a pasa. Awo e holoshi di tempo, tambe a bira un problema door cu nos a yega e comienso di crisis Stagflationario cu mi a adverti p’e pa mas cu 2 aña, cu e decision di Banco Central Americano pa baha interes mientras cu inflacion ta na 3% caba.

E articulo aki ta un ultimo noodkreet, pa bin cu accion “radical” riba e vooravond di un crisis global di stagflation, pa nos preveni scenarionan socio-economico cu no lo cumbini ningun lector riba plaso largo.

E mensahe ta cla: Innovacion radical, hyper-automatisacion y redistribucion di rikesa.

Nos sa tambe cu e mensahe aki no lo haya e accion cu debe ser, door di esaki nos tambe lo sufri e consecuencianan.

Automatisacion ta crea prosperidad & ta baha prijs

Si nos wak civilisacion humano, nos por nota cu tur pero tur forma di prosperidad a bin door di innovacion tecnologico. Con esaki ta tuma su forma ta door di baha prijs di diferente sorto di producto of servicio. Un crisis di inflacion por wordo combati door di hisa entrada, esta e topico di siman pasa, cu ta via Entrada Universal, y na di dos luga door di baha prijs. Awo e parti aki ta parce mas complica, con nos por baha prijs di producto y servicio na Aruba?

Wel por ehempel door di automatisa mas hopi posibel den sector di Salubridad, Gobierno, Energia y Ley. Nos sa cu e premie di BAZV riba consumo y di belasting direct (10.5%), ta un peso riba nos. Mesun cos cu aparato Gubernamental ineficiente, prijs di coriente mucho caro etc.

Door di usa innovacion tecnologico por automatisa partinan sumamente grandi den tur sector local, cual lo eventualmente zorg cu prijs den tur sector lo cuminsa baha. Ora cu prijs di salubridad (BAZV), coriente, transporte, ley & gobierno baha den manera radical, lo tin hopi mas espacio den manera directo esta den prijs pa full Aruba, pero tambe pa un bes mas hisa Entrada Universal. Asina creando un feedback-loop unda besparing, reduccion di prijs y Entrada Universal ta reenforsa su mes. Cual ta e unico manera pa scapa di un crisis di Stagflation, sin hopi dolor socio-economico.

Mester actua inmediato: Prijs di oro como barometer

E necesidad severo pa accion por wordo ilustra cu e prijs internacional di Oro. Esaki no ta un opinion personal di Simon Waslander, of te hasta di un Minister na Aruba, pero un maatstaf completamente neutral di politica y opinion di Aruba. Manera nos por wak, e prijs di Oro ta hisando den manera parabolico, cu ta indicando cu tin hopi stress economico na caminda. No cu esaki ta un informacion nobo pa lectornan di Bon Dia Aruba.

Awo nos ultra-kader local, mester realisa cu den e proximo 2-3 aña, no lo ta bringando, pa por ehempel un carera politico individual, of te hasta di full un partido, pero pa e fundeshi fundamental di stabilidad socio-economico di Aruba. Es decir, ta ora pa lanta fo’i soño y bin cu accion “radical” prome nos wak loke ta pasando na Francia y Inglatera, pasa na Oranjestad dilanti Bestuurskantoor.