E dianan 27, 28 y 29 di september proximo, Villa Floralina lo ta e cas di e Feria Internacional, Interpaso 2019. E feria ta uno mundialmente conoci y e biaha aki atrobe ta premira un asistencia grandi pa loke ta e participacion internacional di cabay na Aruba.
Mañan lo tin competencia di cabaynan macho y yegua di Trocha y Trote y Galope.
Diasabra lo tin e competencia di cabaynan macho y yegua di Paso Fino, mientras diadomingo lo tin e competencia di nos Jinetes y Amazonas.
Mester bisa cu pa varios luna e Organisacion Caballista Arubano, OCA ta preparando pa e competencia di cabay mas grandi riba nos isla. Nos propio competidonan local ta cla pa e competi contra e mihonan den nos region. Paisnan participante na e Interpaso 2019 lo ta Colombia, Republica Dominicana y nos isla ruman Corsou. Nos amazona y jinetenan semper a duna bon presentacion y logra premionan grandi den e competencianan di Interpaso teni na Aruba. Pa loke ta e prestacion di nos atletanan den exterior esakinan semper a sobresali den e diferente competencianan cu nan a competi na dje logrando titulo mundial pa nos dushi isla.
Stichting Sportsubsidie Aruba ta contento di por aporta y brinda e ayudo na e federacion di OCA cu ta organisa e di 34 edicion di e Feria Internacional Interpaso.
