Cu e vision di tene un maneho riba tereno di energia enfoca riba durabilidad, sostenibilidad, accesibilidad y calidad, ayera minister di Energia, Labor y Integracion Glenbert Croes conhuntamente cu directornan di companianan como Utilities Aruba N.V, WEB Aruba y Elmar N.V a organisa un conferencia di prensa pa anuncia e construccion di e dos parke di Molina na Aruba.

Den esaki, a trece dilanti tambe cu mester dispone di un energia pagabel, sostenibel, duradero y limpi pa hogarnan ademas di logra di cumpli cu e tratado di Paris pa aña 2050 unda Aruba tambe ta contribui na un medio ambiente mas sostenibel.

Minister Croes a splica cu mester reduci e dependencia y consumo di petroleo crudo den un transicion pa energia alternativo solar y di biento rumbo pa e introduccion di energia di hydrogen.

Pa continua den caminda aki, minister Croes a señala cu gobierno a logra interesa e compania di gas natural Eagle LNG pa suministra WEB Aruba cu gas natural como e fuel di transicion y ayera nan a anuncia e expansion di e capacidad di energia di biento cu e construccion di e di dos parke di molinanan na Aruba.

“Tur esaki ta bon pa nos economia, nos salud y bon pa nos planeta”, el a sigura.

Di su parti, Anthony Rojer director di Utilities Aruba N.V a declara cu nan ta den e lucha pa combati emision, purba salba e planeta y biba den un ambiente mas limpi.

Den varios sheet cu a wordo mustra na medionan local presente, Rojer a ilustra cuanto porcentahe e planta nacional di electricidad y awa ta produci na emision, electricidad ta contribui na 60%, transporte ta produci 27%, desperdicionan di Parkitienbos ta contribui cu 13%, cu ta e 100% di emision cu ta wordo emiti na Aruba, incluyendo e molinanan di Vader Piet.

“Nos tin cu haci algo pa combati esaki, si nos no ta haci nada e ta bay afecta nos tur”, Rojer a bisa.

Compara cu paisnan industrial, Aruba ta emiti 9.3 di emision per capita unda cu Merca ta 16.5 per capita, Hulanda 9.9, Hapon 9.5, Alemania 8.9, China 7.5, entre otro.

Pa mitiga esaki, Rojer a declara cu nan a cuminsa haci diferente plannan na 2019 pa Aruba su energia, na aña 2020 nan a dicidi di sinta hunto como grupo Utilities Aruba N.V, WEB Aruba y Elmar N.V pa haci diferente ehercicionan unda cu e resultado di e esaki despues cu e acuerdo cu Eagle LNG nan a yega na un maximo di capacidad di biento nobo cu por wordo instala ta 65 MW pa ta optimal, cu solar panel 15MW y bateria 20MW.

“Tur esaki ta e new renewable energy mix, cu e mix aki nos ta bay reduci nos emision cu 64%” Rojer a comenta.

Di esaki, nan a yega na un ‘Request for Expression of Interes’ (EOI) unda cu e grupo ta invita expertonan den mundo energetico pa por expresa nan interes pa haci oferta di energia unda cu companianan tin di haci nan oferta y ora ta bay den un Request of Interest ta bay haya diferente interesadonan cu lo presenta diferente prijs “y logico ora bo tin competencia, bo prijsnan por mehora y nos por pas’e pa consumidor”.

E ta un proceso cu ta bay wordo canalisa via notario unda cu esunnan interesa por registra te dia 1 di october via e website www.utilitiesarubanv.com.

E ubicacion di e parke di molina aki lo tuma luga na Rincon pa motibo cu Rojer a expresa cu un parke di molina no por ta menos cu 850 meter di un vivienda unda cu tin Vader Piet caba y e biento cu Aruba tin ta un di e miho bientonan na mundo, esey a wordo demostra den pasado y mester tuma bentaha di e biento aki.

E motibo di pakico e parke aki no ta bay rima lama, segun Rojer a splica, ta pasobra e parti cu posibelmente por pone e off shores aki segun el a yam’e, ta hopi cerca di Venezuela, ta hopi leu di Aruba y tambe ta bira algo costoso.

Alfredo Koolman hefe ehecutivo di WEB Aruba N.V a trece dilanti cu den transcurso di tempo tabatin esfuersonan haci door di WEB Aruba N.V pa baha e dependencia di azeta (Heavy Fuel Oil – HFO) unda cu nan a haci esey den un nivel di 6.200 bari pa 4.100 bari den ultimo decada y mey.

Cu e ultimo motornan cu nan a introduci cu a bay operacional na juni, esey lo reduci ainda mas e nivel di 3.100 pa dia. Aunke gas natural ta un combustibel fosil, hunto cu motornan RECIP Fase IV e lo yuda baha emision di dioxido di carbon drasticamente y cumpli cu acuerdonan internacional pa combati calentamento global.

“Si nos kier evita e emision di gasnan dañino pa nos medio ambiente, nos tin cu reemplasa e HFO unda e companianan aki conhuntamente cu gobierno a traha riba e opcion di gas natural y esey lo conduci na disminucion di dioxido di carbon alrededor di 45% di e emision”.

E transicion pa gas natural manera Koolman a menciona no ta suficiente pa Aruba como pais na unda nan mester bay na e opcion di expande energia renovabel y ta p’esey cu a bin cu e decision di construi e di dos parke di molinanan na Rincon.

“Pa 2030 e mision di pais Aruba ta pa trece e nivel di energia renovabel na 50% pero esey tin su retonan cune”, Koolman a bisa.

Aworaki, Aruba tin un dependencia di energia fosil (HFO) di un 85% y renovabel (biento/solo) di 15%.

Pa loke ta trata N.V Elmar, Albertico Koolman director interino a expresa cu na aña 2012 Elmar a introduci su interconnection policy y cu esaki a haci posibel cu clientenan por bin cu nan mesun solar panels y conecta riba e grid unda cu esaki na e momentonan aki ta na 10KW pa residencial cu ta nifica alrededor di 1.500 KWp pa luna.

Di e parti comercial nan tin’e na 100KWp cu ta cerca di 15.000 KWp pa luna, tin un parti di grid cu por wordo usa cu un costo di 15 florin pa KWp.

For di e aña ey, ya caba tin instala 8.430kW cu clientenan tin instala cu solar panel na diferente localidad di Aruba como den e parti residencial, 5.345kW di e parti comercial, 176kW no comercial cu un total di 13.951 kW.

El a splica cu esaki a bin creciendo den ultimo añanan y pa fin di e aña aki nan ta premira pa surpasa e cifra cu tabatin e aña pasa.

Elmar tambe tin plania pa bin cu parke solar segun Koolman a expresa unda nan tin diferente localidadnan caba cu nan ta explorando pa coloca di dos pa cuater parke cu tin cu wordo poni cerca di unda e demanda ta cu un produccion entre 15 pa MW.

Pa finalisa, el a informa cu pa proximo añanan nan oficinanan tambe ta bay conta cu solar panels igualmente cu nan sub-stations.