Prome cu Oranjestad a bira e nacion isla su capital, Aruba su prome capital tabata e districto di Savaneta. Aki ta unda e identidad cultural di Aruba a nace, y for di unda e resto di e isla a desaroya y converti den loke e ta awe.
Ta bisa cu Savaneta ta e prome luga unda e habitantenan Caquetio prome a trapa tera na e isla. Aunke no tin evidencia concreto pa sostene esaki, considerando e leyenda di Cacique Arua, ta kere cu ya caba tabatin movecion na Aruba – y Savaneta – alrededor di 88 AD.
E Caquetionan probablemente a yega e isla for di Venezuela, Colombia of otro islanan Caribense den e region, pero cu bon tempo e tabata relativamente facil pa nan bay y bin den nan canoa. Pues, desde cu e Caquetionan a descubri Aruba, Aruba a haya su prome forma di civilisacion.
Te cu 1499 Aruba a conoce otro grupo di hende cu a trapa tera na e isla: E explorador Spaño Alonso de Ojeda. De Ojeda prome a ripara Aruba cerca di e costa di Venezuela durante su exploracion di e pais Latinoamericano. Esaki ta dia 9 di augustus 1499. Sinembargo, De Ojeda no a nabega bin e isla te cu dia 23 di augustus 1499. Esaki a marca e comienso di e era Spaño na Aruba, for di 1499 pa 1636.
Alonso usualmente no tabata stop na cada isla cu e mira, specialmente no den Caribe. Hopi biaha e tabata mira tera for di leu y sigui nabega, Sinembargo, Aruba tabata un excepcion. El a tende cu tabatin mata di e tipo “quebracho” riba e isla, cual tabata usa comunmente pa produci pintura of tint. Sinembargo mirando cu e no por a haya e matanan aki na Savaneta, el a sigui explora den e area cu awo ta conoci como Santa Cruz. E miho manera pa transporta e mata tabata via un ruta cu ta pasa door di Savaneta, pues e prome caya entre Santa Cruz y Savaneta a keda crea.
Era colonial Hulandes (1636-1805)
Durante e guera di 80 aña entre Hulanda y Spaña, exploradornan Hulandes y bendedornan a cuminsa biaha pa e islanan ABC. Na momento cu nan a yega Aruba, nan a deporta e comunidad chikito di Arawak y Spaño cu tabata bibando riba e isla. Esaki tabata e comienso di e colonisacion di e islanan ABC di parti di e imperio Hulandes. Alrededor di e mesun tempo, West Indian Company (WIC) a nace. Boneiro y Corsou tabata usa mas tanto pa plantacion, unda e Hulandesnan a transporta catibo for di Africa. Aruba, di otro banda, tabata usa mas tanto pa criadero y fabrica. E Hulandesnan hopi biaha a obliga e comunidad Indigena traha pa nan. Den 1936, ora cu Hulanda a gana e guera contra Spaña, e pais a entrega e islanan na Hulanda.
E administracion Hulandes a nombra e prome comandante, un homber Irlandes yama N. Williams. Pa motibo cu e Hulandesnan tabata interesa den otro islanan Caribense y otro paisnan den Sur America, nan a importa negociantenan y bendedornan Hulandes, tur kende a biba na Savaneta. Di e forma aki, Savaneta oficialmente a bira e isla su prome capital.
Sinembargo pa fin di e siglo 18, e comandante di e tempo aki J.R Lauffer, a move su oficina na loke awo ta “Horse Bay” na Oranjestad. Pa motibo cu e oficina mas halto riba e isla a bay for di Savaneta, e capital a perde su titulo na loke e tempo ey tabata yama Playa.
Con Savaneta a haya su nomber
E nomber Savaneta probablemente tin un Origen Spaño. Ta bisa cu ora cu e Spañonan a subi un sero yama Yara, nan a mira cu e area tabata mas tanto habri y no tabatin mata grandi. Den Spaño, asina un area ta yama un “sabana.”
A causa di su superficie, Savaneta tabata un bon sitio pa construi cunucu. For di aki, e cultura di cunukero a cuminsa. Prome cu Aruban Gold Rush y e construccion di Refineria na San Nicolas, mayoria residente tabata cunukero, y Savaneta tabatin varios habitante cu a cultiva fruta y berdura. Tambe nan a sigui e tradicion di cria bestia manera carne, baca, cabay y porco, entre otro.
Savaneta tabata un di e prome sitionan na e isla cu tabatin un cultura di cunukero general. For di e cultura aki, varios otro tradicion a nace manera e anteriormente celebra Dia di Dera Gay.
Fuente; Historia di Savaneta skirbi pa Adolf “Dufi” Kock.
