Awe un Editorial excepcional pa conta di un homber excepcional. Den casi 100 aña di bida e persona aki, cu a aleha di mundo ayera, a bira pa gran mayoria di nos pueblo un di e icononan cu mas ta uni nos. Poseedor di varios talento, esun cu a resalta semper ta su habilidad y logronan musical. Pa hopi persona, sigur esnan di mas edad, su musica ta parti di e tesoro di musica cu cada un tin graba den nan memoria desde nan infancia. Hopi di nos ta carga cu nos e musica cu a impacta nos desde edad tempran y ta reconoce inmediatamente e tono unico di su piano.

Den loke nos por lesa y lo lesa den e dianan aki, semper ta referi na su persona como un di e autornan di nos himno nacional. Esey sin duda algun ta honor bon mereci, pero laga nos no lubida cu e ta e autor tambe di loke, sin demasiado exageracion, nos por titula nos ‘segundo himno nacional’: “Abo So.” Hopi persona lo tin nan recuerdo personal relaciona cu Padu o cu e cancion di amor nacional aki. Aki un anecdota di algun aña pasa di un di nos redactornan. Relaciona cu un matrimonio celebra na Aruba, a bin riba e idea, no asina original, pa laga un cantante interpreta e ‘evergreen’ di amor aki. Ademas a bin riba e idea pa invita Padu pa ta presente na e evento aki. Padu a acepta. Ora yega e ora di canta, Padu a dicidi cu e no ta bay sinta pa scucha niun hende canta, sino cu e mes ta bay canta su cancion… Ken ta bay bisa cu no? Padu tabata na un edad cu ya su forsa fisico y su voz no tabata manera antes, pero ainda cu algo di e emocion y calor humano cu a haci e cancion aki loke e ta significa pa asina hopi di nos. Despues di e momento unico ey, tur hende emociona, nan kier a continua cu e celebracion y algun ayudante tabata prepara pa gara Padu cu rolstoel cu tur hiba… Padu a reacciona di inmediato: “Kico boso ta haci, unda boso ta hiba mi?” “Wel, nos ta hiba bo cas, no?” “Cas, bay cas? Bay cas bay haci kico…,?” tabata e contesta indigna di Padu. Final di e storia ta cu el a keda te den oranan di marduga ta disfruta di musica y hende den su alrededor.

Padu no tabata solamente musico, y amante di otro arte, sino cu e tabata disfruta inmensamente di bida, y disfruta di musica tabata hunga un papel grandi den esey. Te na edad hopi halto, realmente te recientemente, Padu no tabata perde ocasion pa ta presente na cualkier evento di musica, algo completamente reconocible pa esnan cu ta bay diferente evento musical, por ehemplo na Cas di Cultura. No por cuminsa prome cu Padu yega y keda instala dilanti, na su lugar di honor, un trato igual o miho cu esun pa Gobernador. Ta incontable tambe e ocasionnan unda e tabata presente pa scucha y stimula nos artistanan hoben cu mester a busca nan caminda ainda den e arte aki. Esey pa un gran parti a haci Padu e icono cu e ta y lo keda tambe.

Sin embargo, hende di e taya y comportamento di Padu ta significa algo mas cu musica. Den tur comunidad cultura ta un factor di adhesion importante. E ta yuda defini ken nos ta y con nos ta anda den bida. Den nos comunidad asina influencia pa tanto cambio demografico den un tempo asina cortico, ta logico cu tin momento cu nos ta buscando ta ken nos ta, unda nos ta bay. Y den un comunidad asina dividi ademas pa contradiccion y division politico, nos mester ta consciente di e importancia di figuranan nacional cu no ta parti di e division ey. Arte y sigur musica ta algo cu ta trece hende hunto, irespecto clase social, creencia, raza, nacionalidad, etc. Musica no conoce frontera y Padu mes tambe ta ehemplo di esey, pa e manera cu el a logra penetra cu su musica den gran parti di nos region.

Den tur esey, nos mester pensa tambe riba e miho manera pa recorda Padu. Nos tin un bunita monumento caba di Padu y su amigonan riba e plaza tras di Bestuurskantoor, pero tin algo mas importante ainda. E miho honor ta pa percura pa musica tin berdaderamente e lugar cu e merece den nos comunidad y nos por honra Padu haciendo loke nos mester haci pa logra esaki. Como ehemplo nos ta menciona e importancia pa duna hubentud tur posibilidad pa desaroya nan talento. Esaki por sucede dunando apoyo, financiero y di otro indole, na e proyectonan cu ta orienta den e direccion aki. Nos ta referi aki na institucion estableci manera Scol di Musica, pero tambe na iniciativa nobo manera e Leerorkest cu no ta siña mucha toca un instrumento so, pero ta siña nan colaboracion pa yega na algo mas grandi cu nan mes.

Den e comunidad chikito aki, nos tin un manyen di persona excepcional, esnan berdaderamente grandi. Ta yega un dia cu nan ta despedi, pero di cierto manera semper lo ta presente. Padu sin duda algun ta un di nan.

 

LEAVE A REPLY

Please enter your comment!
Please enter your name here