Aruba ta un isla rico den historia y cultura, y awe nos lo papia tocante e bunita historia di nos moneda y biyetenan nacional, e florin Arubano. Nos lo papia tocante su historia, su diseño y simbolismo.

Na Aruba nos conoce e monedanan di 5, 10, 25 y 50 cent, conhuntamente cu e moneda di 1 y 5 florin. E biyetenan ta esnan di 10, 25, 50 y 100 florin, y de bes en cuando nos ta mira tambe e biyete di 200 florin.

Den Papiamento nos ta yama nos moneda florin, pero tambe tin un termino general pa esaki cual ta placa y cent ta yama cen ambos den forma plural y singular. Mayoria moneda ta rondo y nan tamaño ta depende riba nan balor, aunke e moneda di 50 cent ta facilmente reconocibel pa su forma cuadra, di mesun manera cu e moneda di 5 florin cual ta facil di reconoce danki na su color oro.

E monedanan di 1 y 5 florin sinembargo, tin e emblema di un banda y e cara di Rey Willem-Alexander di otro banda. Antes, tempo cu su mama Prinses Beatrix tabata Reina, e tabata mira riba e monedanan.

Monedanan bieu y nan nomber

Den pasado, monedanan Arubano tabatin nomber distinto y tabata varia den su balor. Por ehempel, den pasado tabata yama un moneda di 5-cent Dos placa; un moneda di 10 cent tabata yama debchi; un moneda di 25 cent tabata yama dies placa y e moneda di 50 cent tabata yama yotin, cual ta custumbernan cu pa cierto generacion of hende te ainda ta forma parti di nan vocabulario ora di referi na placa.

Tambe nos tabata usa monedanan distinto cu tabatin balor di 2 ½ cent, yama placa tambe. Sinembargo, esaki no ta den uso mas y a bira un relikia di placa Arubano. E tempo aki, e moneda di 5 florin tambe tabata cuadra.

Biyetenan Arubano y nan simbolismo

E coleccion di Florin Arubano ta contene un variacion di biyete colorido, riba cual por mira diferente diseño sumamente detaya y bunita cu ta conta e storia di Aruba riba un solo pida di papel.

Prome cu aña 2019, e biyetenan di florin Arubano tabata conta cu un diseño relativamente mas simple cu esun di awo, sinembargo toch semper, e biyete di Aruba tabata inclui colornan y diseñonan precioso, unda hopi biaha bo por a mira bestianan local.

E diseñonan aki den pasado tabata haci pa e artista Arubano Everino Fingal den 1990 te cu 2019. Entre 1990 cu 1993, e moneda di 5 florin tabata un biyete. E diseñonan di Fingal tabata inclui un biyete di 500 florin, cual awo ta descontinua.

Den 2019, Banco Central di Aruba a comisiona un diseño nobo pa e biyetenan di Florin Arubano, e biaha aki scogiendo e artista y ex docente di arte, Nigel Matthew, pa present su diseño nobo. Sr. Matthew a mantene e tradicion di inclui bestianan local y e colornan familiar riba e biyetenan. Sinembargo, el a inclui tambe diseñonan adicional cu ta representa e cultura Arubano y ta ilustra nos conexion na e habitantenan Indigena cu tabata e prome den trapa tera riba nos isla.

Diseño actual y simbolismo

E diseño actual di cada biyete ta carga su propio composicion y simbolismo, cu ta haci cada un unico y importante pa conta e storia den su totalidad.

Riba e biyete di 10 florin, bo por mira un Turtuga blanco. E color blauw ta simbolisa e lama di Caribe. Tambe bo por mira Bishiribana Gold Mill, motif di coral y e simbolonan di Cas Floria, cual ta e diseño cu ta mira hopi riba e casnan tradicional Arubano.

E biyete di 25 florin tin e color oraño, riba cual bo por mira e planta medicinal Arubano yama Shoshoro. E parhanan Trupiaal, Shoco, pintura di piedranan y simbolo tambe di Cas Floria. Tambe tin un ‘purun di ceramica’, den referencia na e relikianan cu nos ancestronan Indigena a laga atras pa nos.

Cu e biyete di 50 florin nos por mira e Cododo, Cangreu di tera, e toren di Wilem III y un biaha mas e simbolonan di Cas Floria, ademas di un mata haya na nos lama cu ta yama Banana di rif. E colornan ta un mescla di biña cu ros.

E color berde, cual ta representa nos naturalesa, ta resalta riba e biyete di 100 florin. Aki nos ta mira e Yuwana, Aloe, Toteki, simbolonan di Cas Floria y un grupo di baile cu ta bailando Baile di cinta, e baile folklorico cu cinta.

Por ultimo, riba e biyete di 200 florin, nos ta aprecia e color bruin cu ta simbolisa e tera di Aruba. Aki nos ta mira Dornasol y Warawara – ambos parha local conhuntamente cu e simbolonan di Cas Floria, e cadushi Tuna y Caha di Orgel, e instrumento folklorico usa pa varios cantica tradicional.

Fuente; Placa, Placa, Placa di Biblioteca Nacional Aruba