Pa hopi aña caba, e mercado di Latino America ta e di dos mas importante pa Aruba, despues di esun Norte Americano. E crecemento a bay rapido y impresionante, aportando na un bon mix di pasahero pa por cumpli cu e demanda pa camber y actividadnan turistico riba nos isla.

Pero pa por a logra e resultadonan aki, ta rekeri hopi preparacion, mercadeo, strategia y bon relacion cu tur partner den e mercadonan. Y ta precisamente esaki ta locual e siman aki ehecutivonan di turismo di Aruba ta haciendo na Brazil.

E siman aki Ronella Croes, CEO di Aruba Tourism Authority (A.T.A.), ta di bishita na Brazil hunto cu Jordan Schlipken-Croes, A.T.A.’s Area Director pa Latino America y Jo-Anne Arends di Aruba Airport Authority pa reunionnan cu entre otro e aerolinea Gol, cu Copa, y Decolar, cu ta e bendedor mas grandi di biahe den e mercado. Banda di esaki tin un delegacion mas amplio di representantenan di A.T.A. y sector priva entre otro reuniendo cu tur socio clave, y asina tin mas activacion e siman aki cu ta inclui tambe presencia di Aruba na ‘Taste’ cu chef Urvin Croes.

Ta bon pa menciona cu den e investigacionnan haci pa Visa y Mastercard, a conclui cu Brasileronan ta entre e bishitantenan cu mas ta gasta na Aruba durante nan vakantie. Como tal, A.T.A. ta haci extra esfuerso pa por sigui desaroya e mercado aki, pa atrae mas di e turistanan afluente cu ta gasta mas, tanto na alohamento, na transporte, cuminda y bebida y na haci compras.

Mercado di MICE

Adicional, e ekipo di mercadeo di Latino America a enfoca riba e segmento di MICE (Reunionnan, Incentivonan, Conferencianan y Exhibicionnan) y biahe di tempo liber (“leisure”). E delegacion di MICE di Aruba na Brazil lo probecha di e bishita pa promove nos isla como un destinacion MICE y pa promove uso di e vuelo nobo di un aerolinea di Brazil.

Pa e segmento di mercado aki, A.T.A. a invita y ta conta cu participacion activo di partnernan. Ta tene reunion y sesionnan di entrenamento cu instancianan grandi di MICE y enfoca riba grupo y tambe eventonan exclusivo pa cliente.

Promoviendo Aruba como destinacion gastronomico

Diamars dia 10 di juni a organisa un evento di cocktail conhunto pa clientenan di e mercado Brasilero. A.T.A. Brazil tambe lo participa na e evento culinario di mas grandi di São Paulo, “Taste Brasil”, entre dia 12–15 di juni, cu Chef Urvin Croes pa promove Aruba como un destinacion culinario “premier” y tambe como un destinacion gastronomico den Caribe, cu enfoke riba e diversidad y autenticidad di e cushina Rubiano.

Latino America creciendo den aña 2025

Den e prome kwartaal di e aña aki ta nota un resultado stabiel di volumen di huespednan “stay-over” aumentando cu 3% compara cu e prome cuater lunanan di aña 2024. Aruba a ricibi un total di 518,840 huesped “stay-over” for di januari pa april 2025 compara cu 503,938 den januari pa april 2024. Un demanda stabiel y indicacion di normalisacion despues di varios aña di crecemento record den volumen. Esaki ta den linea cu e strategia di A.T.A., cu ta uno di stabilisa e volumen di huesped pa Aruba.

Den e mesun periodo menciona, 81% di nos huespednan a yega for di Norte America, 12.9% for di Latino America, 4% for di Europa, y 2% for di otro regionnan di mundo. Brazil a mustra un crecemento sobresaliente cu un aumento di 76.5% den cantidad di bishitante, y un participacion di mercado record di 15.4% den Latino America compara cu 9.5% den 2024. E mercado Brasilero ta indicando un recuperacion fuerte y un potencial di crecemento continuo pa futuro.