Despues di un dia largo y emocionante den parlamento, na cierto momento loke a cuminza manera e estocada final den un corrida di toro virtual, a caba den un suspension tactico pa e supuesto ‘matadornan’ di e ministro. A yega na suspension di e reunion, pa haci un intento nobo di mediacion, via Promer Ministro. Esey a bira necesario pasobra den e promer tanda caba e ministro a laga e contrincantenan na ruina. A bin un pausa largo despues di promer tanda, pa evalua e daño ricibi. Y a dicidi cu no ta bay risca laga e ministro bolbe den segunda tanda cu mas municion ainda.

Di un manera impresionante e ministro den su defensa a tuma un paso historico. E mandatario bao di ataque a percura pa un dia berdaderamente historico, unda el a duna Aruba un regalo, un tesoro pa futuro: el a desnuda completamente e practica cu tin decadas andando, di nepotismo y proteccion di amigo y famia den gobierno, regalando hende puesto sin cu nan mester traha mes, y dunando proteccion na esnan cu ta haci malo. Pa no papia mes di e corupcion den otorgamento di tereno, cu cual el a haya su mes confronta. Ademas e situacion cu el a bin haya den Serlimar, unda e ex-mandatario cu a core baha promer cu husticia a bati na su porta, pero ainda tabata pretende di dirigi su sucesor. Su partido tabata spera di su persona cu e lo a actua manera semper (casi) tur mandatario tabata actua, pero den e situacion special aki, nan lo mester por a anticipa cu no a ked’e otro caminda pa cana tampoco. Si e mester a salba algo di su dignidad anto lo el a haci loke el a haci.

Cu esey, independiente di e resultado final, dependiendo di con e mediacion bay, ya el a duna su mes un futuro, e posibilidad di sali cu su cara na halto, lagando atras un parlamento cu involuntariamente a haya un les den con bo mester comporta bo mes den un situacion asina. Su actuacion a haci nos corda otro intervencion impresionante di su persona, na 2016 tempo cu a trata e contrato cu Citgo, mejor dicho cu e gobierno corupto y malvado di Nicolas Maduro, cu a resulta den e fracaso cu nos como medio desde e promer momento a predeci. Como unico persona den parlamento el a haci lo corecto y a vota contra e contrato delincuente aki cu no a trece nada mas cu problema pa Aruba.

Contrario na e mandatario, e partido na cual el a pertenece te poco dia pasa, a keda sin caminda di hinca nan cara, e lider actual, logicamente ausente, na promer lugar. Cu ki cara nan kier bay defende e maneho cu aparentemente e ex-lider tabata purba impone, a pesar cu supuestamente el a tuma despedida di politica? Cu ki cara nan ta bay defende cu mester ignora ley y tratado internacional, djis pa por keda cumpli cu nan seguidornan, cu no ta mira mas leu cu e trabao cu nan kier, e pida tereno, e fabor politico pa por haci e negoshi cu nan tin pensa? Na e altura aki hasta a bira irelevante kico ta bay pasa despues, si lo tin eleccion aki poco luna, o cu e coalicion aki sobrevivi te september otro aña, pasobra e partido aki, practicamente sin liderazgo, ta condena di fracasa den e proximo eleccion, ki dia cu e ta.

Pero nan no ta e unico cu lo a haya golpi. E partido grandi den e coalicion, si a sigui cu e intencion di simplemente vota pa baha e ministro, lo a bay paga un prijs grandi pa tolera cu e partner menor aki por malcomporta su mes, sin cu nan tabatin animo pa pone un paro na e actonan aki. Claro cu e interesnan ta grandi. Laga un gabinete cay bao di e circunstancianan aki no ta un decision facil, pero tur chantahe tin su limite. Di otro banda, ta di comprende cu e partido grandi no ta para cla pa critica e partido menor, pasobra e practica di nepotismo y corupcion absolutamente no ta algo desconoci den nan circulonan. Nos no mester di wak mas leu cu e despachonan di varios ministro, cu ta yen di famia y amigo, y den esey hasta e Promer Ministro no ta excepcion.

Sin embargo, cu su intervencion den parlamento, pa promer biaha den e existencia di partido politico na Aruba, a habri un capitulo nobo den ki direccion politica drechi mester bay den futuro. El a establece standardnan nobo, cu pa tur e otro politiconan tambe tabata conoci, cuanto biaha nan no a expresa bunita palabra manera ‘integridad, transparencia’ pero awor nan a haya un persona cu conoce e practica di paden revela ta con esaki ta funciona. No cu nos no tabata sa, pero e ta diferente ora e ta bisa esey. Asina el a bira e testigo principal den e huicio contra e Cosa Nostra di politica na Aruba. Independiente di con e asunto termina despues, parlamento y politica na Aruba a conoce un cambio fundamental ayera. E ministro a crea pa su mes un futuro, cualkier cu e ta. No por bisa mesun cos di e partido, cu ta parce elimina promer cu cualkier eleccion.

 

 

LEAVE A REPLY

Please enter your comment!
Please enter your name here