Julie De Cuba RED

 

Julie De Cuba RED

Durante decenas di aña e refineria a causa cancer y otro malesa. Y no por bisa cu doño di refineria no tabata consciente di esey. No ta por nada tabata tin propio hospital. Awor ta haci todo por todo pa habri bek e refineria y politiconan tradicional ta bringa pa e honor. Ta zorg tambe cu mesun tanto afan pa e leynan di medio ambiente wordo saca for di lachi y wordo implementa porfin y mara na sancion?

Prome cu e apertura? Di otro banda tin partido cu no kier sa nada di molina di biento. Molina di biento ta causa un poco molester of kisas ta baha balor di cas di algun hende pero nan no ta mata. Poco tempo pasa porfin ta firma e tratado di RAMSAR* y ta molestia su mahestad prinses Beatrix pa bin te Aruba pa mira e show. Mientras a kap mata pa loco den Franse Pas y ta bisa “foutje”. Pio ta cu gobierno kier permiti inversionista destrui e silencio y trankilidad di e area di Isla de Oro cu ta habitat sagrado di parha y piscanan. Un area bunita rondona pa mangelnan cu ta e pulmonnan di nos isla y cu ta indispensabel. Un area unico, un di e poco nan cu a keda ainda na nos isla. Tur esaki den nomber di ganashi of kisas ta labamento di placa? Tanto pais grandi cu tin pa desaroya e plannan di e inversionista aki y e ta keda insisti pa haci daño na nos medio ambiente. Ken por splica pakico?

Tin NGO ta bisa cu nan ta proteha nos fauna e.o. Bird Life Conservation. Con anto? Parhanan actualmente ta bibando den libertad den nan habitat na isla de oro. Di ki forma kier proteha nan? Ta solamente door di para tur locual ta haci daño na nan habitat toch? Construccion y movecion constante di hende den e area ta un invasion di nan teritorio. Pa e piscanan ta conta mesun cos. Rainbow Warriors porfin a lanta para y ta pidi pueblo pa bay demostra. Pero cu boto, cano y pamfleta?Arubano por fabor nos mester lanta para pa nos pida baranca. Ban protesta contra e proyecto innecesario na Isla de Oro y e actitud condescendiente di doño di proyecto. En bes cu gobierno inverti den rehabilita e area den su forma natural y original ta laga nan caba cu e area? A ser traha un estudio di impacto ambiental cu ta bisa solamente “wie betaalt bepaalt”. Tristo. Y e dump awor? Ken ta protehando e habitantenan di Parkietenbos? Ken ta worry cu e dump ta un situacion contrario na e supuesto maneho “green” of “greenwashed” (?) di e gobernacion berde. Ocho aña largo tur e organisacionnan cu antes a hiba oposicion fuerte contra e dump a para bira AVP complaciente.

A keda keto den tur idioma. Parlamentarionan di AVP no a ni menciona, corda pa actua contra e monster di Parkietenbos. Awor cu campaña ta den full swing di tur caminda expertonan di awa dushi ta aparece y ta cuminsa toca e disco raya “mester bin un solucion pa e dump”. Hacie un issue nacional. Mester trata e sitio como un sitio di calamidad. Tin hende ta sufriendo a consecuencia di e huma pa añanan largo caba pa no papia di e bacterianan. E realidad ta cu nunca e candela a paga. Ta un crimen hopi grandi contra nos medioambiente ta tumando luga na Parkietenbos. Caminda e lama a bira lama di plastic. Y ta sumamente hopi placa perdi tin eynan. Ohala e “afpakteam” por a traha retro-activo y un dia pone e minister(nan) cu a causa e desaster aki paga e miyones ey bek na pueblo. Awor ta bin acerca e proyecto di Solar Panel riba tereno di Citgo Refinery. ReD ta e partido cu paso a paso lo bay ehecuta un maneho a base di economia circular cual ta encera e.o. energia sostenibel. Nos no ta contra un parke di Solar Panel pero pa preveni cu un proyecto lo bira insostenibel na caminda mester bin prome cu tur cos, cu varios estudio.

Di cual e estudio di impacto medioambiental ta esun basico. Caminda mester pone atencion na por ehempel e parhanan migrante cu semper a uza e area ey pa sosega y sigui nan vuelo. Nan lo susha e panelnan continuamente cu residuo yen di calki. Tambe e aire ta sumamente carga cu salpeter. Algun parti di e panelnan lo wordo afecta constantemente door di corosion. Pues e calidad di material di e panelnan mester ta uno resistente contra salpeter y cu ta rekeri menos mantencion posibel cu lo nifica un inversion bastante substancial.

Pues ta gaba cu ta hibando un maneho “green” y en realidad e maneho ta “greenwashed”. Cu otro palabra pa medio di propaganda y marketing engañoso ta promove e percepcion cu gobierno ta hibando un maneho “green” mientras ta masha poco proyecto ta berdaderamente “green”. (*The Ramsar Convention is an international treaty for the conservation and sustainable use of wetlands. It is also known as the Convention on Wetlands. It is named after the city of Ramsar in Iran, where the Convention was signed in 1971 – Wikipedia.)