Algun luna despues di e tragedia cu a costa bida di atleta di basketball Kobe Bryant y su yiu menor, e scandal a bati porta di su viuda, Vanessa Bryant. E heredera di e mas di $200 miyon cu tabata bin di inversionnan haci pa e leyenda di basketball ta parce di no ta suficiente, pues Sofia Laine, mama di Vanessa, a acusa su yiu muhe di sak’e di su cas y inclusivo lag’e sin un auto cu Kobe a cumpra pa su suegra.

Den un entrevista cu e programa El Gordo y la Flaca, Laine a acusa Vanessa di sak’e di su cas y kit’e e auto cu a fi’e, y hasta a afirma cu no a lag’e mira su nietanan y cu a pidie pa no tene contacto cu nan, a menos cu video yamada.

“Ami no sa, simplemente nos tabata sinta un dia Natalia, Vanessa y ami, y mi baby Natalia no tabata por ta unda nan tabata biba antes, pasobra cada biaha cu e tabata yega e tabata pensa cu a mira su tata y mi Gigi sinta riba sofa, manera semper. E ora ey mi yiu muhe a bisa, cua cas nos ta bende? Ok, esun di wela, esun di wela lo bende y asina ta con el a tuma su decision y despues el a djis bisa mi, mi mester bo sali di e cas ey. Ademas el a bisa cu e tabata kier su auto back. Kico mi por haci, mi no tin unda pa bay. El a bisa mi: ‘Abo mira con bo ta haci’.”

Sofia Laine tabata hopi cercano cu Kobe, su yerno, na tal grado cu Kobe a adkiri un cas den un zona residencial exclusivo di California, den localidad di Irvine, na balor di $1.7 miyon, tur esaki pa e por tin un luga pa biba independientemente. Esaki ta e propiedad di unda Vanessa a sak’e, ademas di bay cu a auto cu Kobe a cumpra p’e. Sinembargo e investigacion di periodista David Valadez a demostra cu e cas ta den nomber di Erika Williams, secretaria cu ta traha pa famia Bryant.

Laine a bisa cu actualmente e ta bibando den un apartamento cu Vanessa a yud’e haya, y cu ta paga te cu maart 2021. Sinembargo, el a sigura cu su yiu a bis’e cu despues di e fecha ey, e mester busca su propio caminda su so y con cu e por. Laine tin 67 aña di edad y a sufri un lesion na su lomba cu ta restringi demasiado pa por traha y haci actividad pisa, ademas cu pa su edad avansa e no por haya un trabao fiho.

Ademas el a revela e motibo y posibel ubicacion di restonan di Bryant, informacion cu e famia a reserva cu meta di tin privacidad pa su duelo y pa esakinan sosega na paz. Sinembargo, e ubicacion exacto aun ta desconoci, pero Laine a indica cu por ta den e Pacific View Memorial Park na California.

Di su banda, Vanessa a duna di conoce den un comunicado cu loke su mama a bisa ta falso, y cu den e momentonan mas complica e nunca a dun’e sosten. Ademas el a afirma cu su mama a probecha pa duna entrevistanan cu a resulta negativo pa su famia y nunca a duna apoyo despues di perdida di su esposo y yiu muhe, inclusivo despues di cu nan a yud’e economicamente pa mas di 20 aña.